Amah Cu A Tawk Famkim

 

August 12

Tlawngkai Nithum

 

Amah Cu A Tawk Famkim

 

Siar:

Matthai 14:22-33

 

Jesuh in hmakhatte ah, “ttih hlah uh! Keimah ka si!

Zianghman phaan ding a um lo,” tiah a ti.       –Matthai 14:27

 

Kumkhat Sung Baibal:

–   Saam 84-86

–   Rom 12

 

Kan nunnak ah a caancaan cu thinlung retheinak, natnak le ruahsannak a cemtermi beidonnak, thin naunak, vansannak le buainak in in khuh ttheu. Jesuh ih dungthluntu pawl khal cuvek an tong ve. Kei khal cuvek ka tuar ve.

 

Jesuh in Amah cu kan hrangah a tawk, a famkim zia thu pathum sim in in hnem, tha in pek, ruahsannak in pek. Pakhatnak cu Jesuh in Satan ih sualforhnak pathum a let tikah Pathian Ttongkam cu a dik ih huham a cakzemi hniksaknak pawl neh dingah a tawk famkim a si ti a langter (Matthai 4:4, 7, 10).

 

A pahnihnak cu Jesuh in ttihzet le thinphaangzet ih a um mi a dungthluntu pawl hnenah Amah ih umpinak cu thlisia, tisuar le tilet daiter dingah a tawk a famkim a si ti a langter (Matthai 14:27).

 

A pathumnak cu Jesuh in thinglamtah parah, “Ka ttheh zo,” ti’n nehnak thawn a au tikah a thihnak cu kan sual leiba kuannak le miluat in siter dingah a tawk a famkim a si ti a langter (John 19:30).

 

Ziangvek hmun ih kan um khal ah Jesuh cun a duhdawtnak, a zawnruahnak le a zaangfahnak thawn in umpi ringring. Jesuh ih umpinak le cawmhlawmnak cu kan himnak hrangah a tawk a famkim a si ti Amah in a langter.

 

Harnak in ka thlarau a neh ih,

Beidong dingin in tukforh tikah;

Bawipa hnenah pan kan ttul,

Neemte’n in kilkawinak rinsan in.

 

Pathian duhdawtnak cun harnak tuar lo dingin in kham lo,

harnak sungin luat dingah in bawm.

(Visited 22 times, 1 visits today)

Comments

comments

Comments

%d bloggers like this: