Alfred Paro ih Valung (Bamboo camp) khua kang thu hmuhtawnpawl

Valung (Bamboo Camp) Kang thuhla ka hmuhtawn mi pawl

Kan dung February 20th 2009 ih Valung (Bamboo camp) kang kha February 26th 2009 ah Kalay in a lehlangin ka rualpa Sangte thawn motorcycle sangin kan hung zoh. A kang ti thu cu group email ah ka rak hmu zo. Cun a zuk khal ka hmu zo. Asinan mai mit rori ih hmuh cu a lamdang hleice cuang. Aiha! A va pawi ve. Ziangti thu saw tiih ti lo hi a theih lo.

Keimai hna’uan kel tour guide ‘uan in ni 13 Feb, 09 ah Kalaymyo ka thleng zo. Tui ‘um ka khualtlawn cu ka rei nguarngo nasa. Ka mikhual hruai mi hman 25th Feb ah a tlung hlo zo. Keimah lawng kan unau harsa tuar zoh duh ah le thil dang pawi hai ‘ulah ka tang nuarni lai a si hi teh. Thil dang cu rel duh loin tui ka ngan duhsan bik Valung inn kang thu hi ka ngan mei ke.

Valung meisa kang hi Kalay ih ka um laiah an reldan a bang aw lo celcel. Zoih an rel khalle aw a si maw tiin ka ti men. An theih dan cio a si ih a dik maw dik lo ti cu ka thei ve lo tikah ka ngai khiaukhi men. Ka hung zoh ding pam tiin ka tiawk ruangah a si bik. Tui ka hung zohnak san bik cu keimai duhnak le Canada ih kan Falam pawlih bawm an duh ruangih in zingzawitir phah ruang khalah a si bik. I rak fialtu hi keimah contact tu dingih Canada Falam pawlih an hril mi Za Hup a si. Canada ah hin kan Falam lam mi hi an mal zet na’n kan Falam hrangah an ‘angkai ngaingai ti ka thei ih ka tha a tho zet.

Meisa kang dan

Pastor Thang Lio tei’ inn in a kang thawk. Pastor Thang Lio hi Lumbang tlawng ka kai laiih ka tlawngkaipi ka rualpa a si. Inn kang ‘umah hin amah cu a um lo. Yangon ah an kawhhran CC (Church of Christ) meeting kaiin a rak tlawng ngelcel. An nu le a pi nu (an nu ih nu) le nauhakte pakhat kum 3 lai ti lawng an um ti a si. A kang laifangah zohman an innah an um lo. Pastor pa ih nupi le thlacam in Biakin ah a um. Cun nauhakte le a pi nu khal an innah an um lo. An inn cu sangka kharin an tlansan. Meisa khal an tik lo lawlaw ti a si.

A kang thawhdan a hmutu pawlih rel dan cun an tappi(Kitchen) lamin si loin an tidaibualnak (bath room)lamin ti a si. Mangbangza rori a si ko. Zohman in a kang dan hi an theifiang lo. Misual ih ur teh a si kei maw ti khal an thei thei lo. Ziangvek a va si khalle an khua cu kang hma a kang ta zoih a kang dan thuhla hnakin meisa kang tuar pawl hi ziangtin kan bawm thei ding ti hi ruat sawn sehla a ‘ha ko lo maw.

Meisa kang hmaisatnak bik inn a si tikah inteknu Pi Sai ~ial cu kan ramdan in an kai ih Falam ah an hruai. Tu tiang cu amkham (amah-khan) khal a theih lo an ti. An khawbawi(u-ka-‘hah pa) Pu Bawi Den Thang in a cang thei tawkin pastor pa ih nupi cu nasa tukih ti lo dingin ka tawlrelsak rero tiah a ti. Amai mawh ruangah si loin kan khua pawlih vanduai hrimhrim mi a si tiah a ti.

Laimi kan si bangin kan Laidan tla malte ngan sehla hi inn kang thu thawn pehpar aw in. Miphun pakhat le pakhat ih ruahdan tla cu a dangaw thei na’n tui in ruah mi Valung khua kang thu ih an khua pawlih in sim mi hi lo hlawm ve hai ka duh. An khua a kang hlanah an khaw sungah sakhi a lut ti a si. An khua ih khawbawi rak ‘uan hlun Pu Thang Mung in Kan khua ih Sakhi a luh hi ralring in um uh law kan khua a kang ding hokhawtiah a rak ti an ti. A tivek ngaingai in an khua cu a kang ngaingai. Sakhi a lutnak ihsin a tlansuaknak tiang a kang thluh ti a si. A tlansuahnak hmun in a kang hmaisa bik an ti. A tlansuahnak hmun cu Pastor tei inn a rak si.

Inn 26 a kang. Mi 149 cu inn nei loin an um. An khawbawi Pu Bawi Den Thang ih i sim mi hi ka thinlungah a cam nasa. Kum 30 lai ka ‘uan ka hawl mi cu minute malte sungah a cem thluh a ti. Pacang ka siih ka tuar thei ka ti aw nan ka fale tlawngkai pawl an hung tlun ih, riahnak nei loih riahnak nei loih an um cun ka tuar aw thei loih ka mithli a tlaa ti. Cu mi i ruah laiah a ‘ap leuleu na’n a supaw thei. Kei khal ka mithli a hal ve na’n ka supaw thei ve. Tu ka ngan lai khalah ka ruahsak tuk ruangah a si ding ka mithli a tla thei rori. Zohman ka kiangah an um loih a ti zia. An khaw bawipa hi an inn a kang laiah amah a rak um ve lo. Tu cu a pai unau tei’ kodawng (an thilri retnak) ah an um.

A inn kang ruangah a cem mi hi ting Kyats 200 (20,000,000) tluk hrawng a si ding a ti. Sidawr neite hi ting 300 (30,000,000) tluk hrawng an cem ding. Rawl dawr te pawl le midang pawl cu an rel lemloih ka thei fiang hai lo. An ti dan cu a tlangpi thuin ting 2000 (200,000,000) hnakih tam deuh hrawng a si ding ding an ti. Motorcycles khal pahnih a kang tel. Thirleng(cycles) paziat ciah si maw, cun vawk (6) me (4) khal an kang tel thluh. A tamsawn cu an thilri ziang khal an la man mo. A kang cak tukih anmai reldan cun minute 45 tluk hrawngah a kaifang thluh an ti.

Valung ih maw’aw zin parih um le hanghnah hangrah cinnak hmun a si tikah ruah hnakin paisa an rak nei zet. Motorcycles nei an um hnuaihni. An motorcycles khal a kang miah a tel um hnuaihni. Zangfahza ngaingai an si. A kangnak hmun hi an khaw laili a hmunpitnak bik hmun a si. Rawldawr tivek pawl umnak hmun a si.

Bawm dan ding

Valung inn kang hi bawmtu an nei hnuaihni ko. Kawhhran lam in si maw, bulpakin si maw, acohzah lam thawn ‘angtlang in si maw, NGO lam le organization lam in si maw, phun le hnam zawng in si maw an bawm ruri ko. Asinan hi an bawmnak hi a ‘hahnem zet ti ding a si na’n duhthusam cu a tling thei deuh lo. Duhthusam le tlamtling ko ih bawm cu a theih lo ding na’n kan ti thei tawkih kan bawm vialvo cun malte an zia a um deuh ding. Bawm dan cu a phunphun a um ko. Asinan ‘ha ka ti bik mi cu anmah khua ih direct rori ih bawm hi a ‘ha bik ka ti. An khuaah hin Relief Committee an dingih cu mi pawl kha bawmnak pe sehla a duhum bikin ka thei. Anmah khalin an duh bik. Valung khua inn kang ruangih an dinmi an khua Relief Committee pawl cu:-

(1) Pu Bawi Den Thang

(2) Pu Bawi Uk Thang

(3) Pu Bawi Lian Sang

(4) Pu Phun Ling

(5) Pu Thian Kan Thang

(6) Pu Kheng Mung

(7) Sayakyi Zul Khuai

(8) Pu Sai Kap

(9) Pu Cung Awng Thang

(10) Pu Phil Lian Sang

(11) Pu Ral Lian Cawm

(12) Pu Sai Thawng

(13) Pu Zing Tin Kham

(14) Pu Thawng Luai

(15) Pi Hau Za Nem

Pu Bawi Den Thang hi tufang ih an khawbawi (u-ka-‘hah) ‘uantu a si. Thuhla thei duhtu hrangah telephone khalin zingzawi theih a si. Cherry rawl dawr tei’ innah telephone in biak an theih. An telephone number cu 070-40520 a si. Pu Bawi Den Thang hi Cherry tei rawl dawr thawn an nai aw te. Falam peng ti fam cu Falam khaw sung hman phone ahar tikah Valung sinsin cu phone cu a har nasa. Nan phone thei pang le a ‘ha bik a si ko.

Kan unau harsa mangbangih a um pawl hi a tam a mal ti a um lo kan ti thei tawkin kan bawm cio uh si law.

Alfred Paro

Yangon

falam-le-kalay-hi-peng-79-a-si-ti-nan-theihnak-dingah-ka-zukawk-mi-a-si1

falam-le-kalay-hi-peng-79-a-si

valung-khua-hlaral-ihsin

valung-khua-hlaral-ihsin

kalay-lam-ihsin-valung-khua-luhnak-lam-signboard

kalay-lam-ihsin-valung-khua-luhnak-lam-signboard

valung-khua-kang-thu-kawl-ca-ih-an-ngan-mi

valung-khua-kang-thu-kawl-ca-ih-an-ngan-mi

a-kang-thawhnak-pastor-tei-in-hmun

a-kang-thawhnak-pastor-tei-in-hmun

valung-khua-kang

valung-khua-kang

inn-sak-pawl-an-cawlh-lai-fang

inn-sak-pawl-an-cawlh-lai-fang

Inn sak bawmtu hrekkhat pawl cu Tisen khua mi an si.

Inn sak bawmtu hrekkhat pawl cu Tisen khua mi an si.

thirleng-khal-an-an-la-man-loih-hitin-a-kang

thirleng-khal-an-an-la-man-loih-hitin-a-kang

valung-khua

valung-khua

alfred-paro-le-valung-khua-upa-pawlih-meisa-kangnak-an-hal-lai

Alfred-paro-le-valung-khua-upa-pawlih-meisa-kangnak-an-hal-lai

bawmnak-an-dilnak-receipt-voucher

bawmnak-an-dilnak-receipt-voucher

bawmnak-an-dilnak-hmun-ihsin-kan-tlun-zik-lai

bawmnak-an-dilnak-hmun-ihsin-kan-tlun-zik-lai

Comments

comments

One Comment

  1. “Kum 30 lai ka tuan ka hawl mi cu minute malte sungah a cem thluh a ti. Pacang ka siih ka tuar thei ka ti aw na‘n ka fale tlawngkai pawl an hung tlun ih, riahnak nei loih riahnak nei loih an um cun ka tuar aw thei loih ka mithli a tla” a ti

    A si rori, riahsia le ninghan pi a um tuk aw. Zangfak hai in Pathian in an neihcia hnak ih a let in thlawsuah pe hramseh.

    Hitivekin Alfred Paro in thuhla kimcang tuk in in rak than thei cu a lungawi um riai.

    Pathuam

Comments

%d bloggers like this: