Airport Ih Asian Fala Pahnih

Airport ih Asian fala pahnih

Mike Zuung Ceu

Woman-traveller

26 March2012, Tlawngkai nikhat, Indianapolis Airport in ka training kainak New Haven, CT lam pan in vanzam ka to. Zinglam 5:10 am vanzam to ding ka si ruangah zing 3:30am ah ka tho. Rev. Ci Kap cu 4:00am ah Airport ih I hei thlah dingah an mileng khan ah timcia in a to. Ka thawh veten ti ka kholh ih ka timtuah aw ve. Zing 4:00am ah inn tlunta khan in ka rung tum. Rev. Ci Kap thawn a motor in Airport lam kan pan mai. Cuti tluk ih zingpit ah ka pawh a tulnak khal cu zanlam 1:00pm ah ka training thok ding a siih, cumi caan khelh dingin Rev. Ci Kap in vanzam I leisaknak  a si. Hivek zingtuk ih ka zam tul caan a um phah theu ih I thlahtu pawl le ka riahnak inntek pawl cu an zon a zaizet theu. Lungawiten ziangkim in ngaihtuah sak hai ko na’n keimah lam cun ihhmu khop lo ih ka tuah hai mi parah ka hmai an song zet theu. Pathian in thluasuah hai hramseh ti  thla camsak lawng hi keimah lam ih ka ti theisun a si. Tarining kai phah ih kawhhran vehvai ka si ruangah hiti ti locun hril ding dang ka nei ve lo. Asinan hiti te in kawhhran vehvai thei ih ka um thei khal hi Pathian ih remruah le kawhhran pawl ih hmarngainak ruangah a si ih Pathian ka thangthat zet a si.

Indianapolis Airport in an caan khiah vekin ka poksuak. Vei tampi cu caan khiah vekih pawhsuak lo caan tla a um theu ih ka vanzam thlengawk caan (Connection Time) a bicih thluh ruangah Airport ah pirpilik ih ka zuan ciamco tawk khal a um theu. Tuitum cu tuante ih thawhman a um kan ti ding, amah caan khiah vekin ka poksuak. Vanzam parah ka itthat nasa ih ka hahdam zet. Motor par ah siseh, Vanzam par ah siseh, kan ihthah hluarhlo thei hi Pathian thluasuah phunkhat a si ding tiah ka ruat. Kawlram ihsin USA kan zam caan tla cu nazi 20 lenglo a si theu ih to cuahco hi a bangthlak nasa ve. Kan ihthah thei ahcun kan hah a dam ngaingai. Khui maw caan tete ah thli a hrang natsat deuh caan tla a um ih vanzam par ah kan thin tla a hung phang phah theu. Ziang hman le tuah theimi kan nei fawn lo ih cuih caan pawl ah ihthah san thei hi thluasuah phunkhat a si, ka ti.

Indianapolis Airport ihsin a rei hlan ah Washington DC Airport ah kan thleng. Philadelphia Airport lam pan in zuang peh lai ding ka siih ka nazi ka vun zoh. Caan lawng ka neilai pam ka tiih thawhhlam ka hawl. Ka eiman lo khal le vanzam parah ka ei thei ko tiah ka ruat. Ka ril khal cu a rawngphah ve thlang ruangah a cangthei tawk in ei-in ding ka ngaihtuah. US Domestic Flight cu Kawlram vanzam pawl vekin rawl mi an pek lo, a tii in ding lawng mi an pek. Lamhla deuh zam mi vanzam tlun ahcun hmuk tivek ei-in ding an zuarmi a um na’n aman khun le kannih zuhzawng thawn a mil aw thei lo. Curuangah vanzam kai hlante ah Starbuck Coffee dawr ah ka feh ih hmuk pakhat le coffee haikhat ka lei. Ka coffee khuathai par ih ngan dingah ka hmin in sut ih ‘ Mike ‘ tiah mirang pawl theih ol dingin ka sim. Paisa ka pek theh hnu ah khatlam ihsin ka coffee ka va hngak ve. A rei tuk lem lo, ka hmai ah mi 4 lai lawng an um ih ‘ Mr. Mike ‘ tiah in run ko ih ka va feh. Coffee dawr hnatuantu nu ih kut in coffee khuat ka vun lak zik zawngah, “ Hei…Saya Mike na si lo maw?” tiah kawl tong in I run ko ih ka lau dukdi. DC Airport ah I theitu ka tong ding tihi ka ruahban lomi pakhat a si.

Cunu cu 1996, Yangon a um lai ah Yangon Chin Baptist Churches Fellowship (YCBCF) mino pawlkom ah kan mino committee sungtel pakhat a rak si. Anmai’ kawhhran ah mino secretary khal a rak si. Culai ah kei cu YCBCF Mino Chairman ka rak tuan ih mino cangvaihnak ah hna kan rak tuan tlang dah. Coffee zuartu uniform a hruh ruangah ka theithiam nawn lo. Ka vanzam zam caan le a nai thlang, amah khal cu biak tam ding caan a nei ve lo ruangah US daan in,”See You” ka tita ih vanzam ah ka kai san. “Sayapa kan khua ah in ra tlawng leh aw maw” I ti ih,” Ee law” tiah ka ti ta. Vanzam par ah keimah te cu nui’ thu ka ruah rero mi cu,”Hi nute hi kawlram a umlai ahcun Univesity tlawngta a rak sita sikhawh hilam ah teh tlawng a kai sal pei maw? Degree the a ngah zo pei maw?Hih hnatuan maw a tuan lanta ding?A nuam aw ko pei maw? Hmailam hrang teh ziang tumtahnak a nei pei?…” ti pawl hi a si.

A rei hlan ah Philadelphia airport ka thleng. Malte lawng ka cawl man vanzam par ah kai a cu lala ih New Haven, CT feh dingmi vanzam par ah ka kai. Vanzam ka luh veten, “How are you?” tiah cibai in rak buktu cu vanzam kilkhawitu ‘ Le-yin-may ’ nu a si. Ka vun zoh ih mirang nu a si ta lo. Thaten ka zoh tikah “Tuluk fala” a si. A hmel a piang verve ih a ruangrai tla a tha ziamzi. Mirang tong a naal daan cu mangbangza a si. US ah suakmi a si pei maw, asilole US ah a nauhak lai ten a rak thlengtu cu a si ding. US ih state 23 lai ah khual ka tlawng zo na’n Asian mi vanzam kilkhawitu ka ton hmaisabik a si hmang ka ti. Keimah te ka lungawi nasa. Uar um nasa in ka thei. Amah teh ziangtin a ruat aw pei maw cu ka thei lo. Mirang le midum pawl nih teh ziangtin an ruat pei maw ka thei cuang lo…keimah te ka lung a kim zet ih ka lung  a hmui nasa.

Asinan…DC Airport ih ka tonmi kan laimi nute kha ka vun mang saal. A hnatuan mi hi ka zawmtaihnak a um hrimhrim lo. Nautatnak thinlung khal malte hman ka nei lo. Tlawngkai phah in khal hna  a tuan a si thei ko. Paisa tampi nei in a hnatuan ah a nuam aw zet tla a si thei ko. Hmansehla…US ih thlengmi kan Laimi fala le tlangval pawl hi…ni nikhatkhat ah…Airport ih ka hmuh hai saal tikah…Taluk Le-yin-may nu dinhmun ah hmu ve leh thei sehla ka va duh so…ti hi cuih ni ih ka saduhthah tumbik a sita ko.

Comments

comments

6 Comments

  1. Saya Mike cu siar nuam thei dutdo male.
    Sayapa, ca tampi in in ngan sak theu aw.
    A siar ding kan man ringring.

  2. Saya Mike cu Tiger Wood ah ka lo ruat lawk cu teh.
    Na cangan mi ka rak siar ngah.
    Ka lungawi.

  3. Saya pa,

    Coffee tla na ding/in ta lo hmange,,,a um lai pei maw tiah,,,,,,,,,,,,,,,,,

    US thleng zo pawl hrangah tumtah nak ti hlawh tlin ter tu a si a duh um nasa,,

    Hmun dang i sin a siar tui hrang khalah cu thotho…

  4. Mai Zilthli Lal Nei Thluai says:

    Saya Mike, na ca te cu awwww… mi lung a khawih nasa
    Na ca te ka siar ngah cu thu tampi in riatter.
    Ka siar ka rak hlawkpi ngaingai. Lungawi

  5. Siangte Senhri says:

    Saya Mike,na ca te ka siar ih ka hlawptlo nasa,thazang ka ngah lawng si lo in ruahnak thar le kaupi ih mit meng ding in in bawm a si,…….ka lungawi nasa……..

  6. Saya Mike cu a hmin vek in mike tla a mike zet sokhaw!

Comments

%d bloggers like this: