Afghanistan ih opium hmuan neitu pawlin siatnak an tong

Afghanistan ih opium hmuan neitu pawlin siatnak an tong

Afghanistan ram acozah theihpi lo ih ‘opium (Kawl tong in Bing)’ hmuan tuahtu pawl cun 2010 ahcun an thilri 70% tiang a hloral thluh ding tiah an ti.  Acozah theihpi loih Opium hmuan zokiltu (illicit farmer) pawl cu ‘US secret agent’ pawl cu ‘an hmuan sungah ‘tur phunkhat’ rak toih ciamco tu’ tiah an puhmawh. US thuneitu pawl cun Aghanistan ih Taliban tapung in sumpai a hawlnak ah ‘opium’ hmuan a tuah ciamco ti a thei zo ih, an hmuanthlai pawl siatsuahnak dingah ‘fungus (hanghnah hangrah tawtter theitu) phunkhat ‘fusarium oxysporam le pleospora papveracae’ timi cu a hmang ih, 2000 ihsin acozah theihpi loih opium hmuan tuahtu pawl khaliin an thei zo. Afghanistan ram hi leitlun theihpi rori ih ‘opium’ hmuan tuahnak tumbik a si ih, an tuahmi tamsawn cu ‘sizung’ le ralkap pawl (hliamhma tuartu) hman dingih zuar suah a si. Asinan 2003 ihsin ‘leitlun in tuah ding bikhiah a pekmi hnakih tam sawn a tuah ringring’ tiah puhmawhnak a tuar. Taliban tapung pawl khalin kum tin ‘opium’ zuarnak ih an ngahzat cu US$ 2.8 billion tiang a si tiah ‘secret agent’ pawl cun an sim. (Atlun zuk: Opium neitu in a kung a zohfiang lai)

Afghanistan ahhin Soviet Russia sanlai (1980-1989) ihsin ‘Opium’ hmuan an rak tuah zo ih, 1980 ah 200 tonnes an tuah suak ih, 1989 ahcun 1,200 tonnes an tuah suak. Cumi theh ah ram sung do awknak can a ra thleng ih, 1990 ah Afghanistan ram ihsin opium 1,500 tonnes a suak, cun 1994 ahcun 3,400 tonnes tiangin an tuah suak. (Ahnuai zuk: Opium a par ih, meithal thawn kil a si)

1994 ihsin Taliban pawlin uknak an co ih, 1995 kum ah 2,300 tonnes an tuah suak thei. 1999 ahcun Osama Bin Laden pawl cun ralkap thilri leinak dingah sumpai nasazet in an hawl ih, himi kum ahhin 4,600 tonnes an tuah suak thei. 2001 ahcun US in Afghansitan a do ruangah kum khat sungah 200 tonnes lawng an tuah man. 2002 kum ihsin acozah thar (rei lote hrang) a rung ding ih, tulai ih an president Hamid Karzai ih hohanak in leitlun pursumleilawnnak hrangah ‘3,400 tonnes tuah an sian sak. 2003 kum ah 3,600 tonnes, 2004 kum ah 4,200 tonnes ti’n a kai vivo.

Aman thu thawn pehpar in Russia san ihsin Taliban san tiangah 1 kg ah US$ 40 (a kung man lawng a si) tiang a si ban ih, 2001 ahcun US$ 301 a si ban. 2002 ah US$ 350 a sina’n 2003 ahcun US$ 283, 2004 ah US$ 92 tiangin a tum sal. – Universal Press/www.nps.edu

(Visited 34 times, 1 visits today)

Comments

comments

Comments

%d bloggers like this: