Acozah Le Kachin Ralkap Thurel Tlang Nan Kapaw Thotho

Kachin Independence Army (KIA) ramthu lam ih hoha tu Kachin Independence Organization (KIO) le acozah lam in Union Peace-making Work Committee (UPWC) cu zohman ih theih pinak um loin thu relkhawmnak an nei nan tu ni tiang khal ah KIA le acozah ralkap cu an kap aw ringring lai. UPWC ihsin Railway Minister Aung Min in a hoha mi le  KIO lam ih palai thlah mi pawl cu ni 19 in 20 tiang Kachin ram nisuah nak lam ih Maijayang ah an tongaw. Asinan ziang thu hman rel fiangnak um lo in an tiak sal.

KIO cun Kachin ram ih acozah palai Colonel Than Aung ih hoha mi thawn vei hnih tonawknak an nei ih cun parliament dinhmun ih rualrem nak tuah tu Aung Thaung thawn khal vei hnih tonawknak an nei zo. Cu lawng silo in UPWC ih Aung Min thawn khal mi theih pinak um lo thurelkhawmnak (unofficial) vei li lai an rak nei dah zo. Cabuai pakhat parah to lang in rualrem nak vei tam pi an tuah zo nan tusun ni tiangah an do awknak cu a dai hrih cuang lo. Ni kum sung ah Aung Min cun thlangpar mi Karen, Shan le Mon pawl thawn kapaw lo ding ih lung kimnak a rak tuahpi thluh thei nan kap aw lo ding ti mi in do awk lo ding ti mi a sawh lo a bang.

Shan State Army-North le Shan State Army-South pawl khal acozah ralkap thawn lungkimnak pahbal in an kap aw rero phahpha. KIO in acozah thawn kap aw lo ding ih lungkimnak tuah hlan ah leitlun huap zohfel tu pawl ih ciang tei lungrualnak tuah ding mi an zoh fel ta atul ti in dil nak a nei ti in La Nan cun a sim.

“Lungkimnak kan neih thei ding ah cun pakhatnak ah acozah ralkap pawl kan ram ihsin an tlun thluh a tul. A pahnih nak ah rualremnak kan tuah tik ih leitlun huap zohfeltu pawl theih pit le zohfiang kan tul cu lawngah kan rualremnak kan tuah mi a hngetkhot ding. Zohfeltu pawl khal cu acozah thawn rualrem nak kan tuah tik ih tel ve ding in, an tel lo ah cun khat le khat rualrem nak sign kan thu mi hi rei a daih lo ding,” tin La Nan cun a sim. Cun June 20 sungah vei nga lai kachin ralkap ramsung ah doawknak a theng. June 17 ni khal ah KIA ralkap pawl in Shan ram ih Pangsai khua ih palik zungah meithal an kap, an kap nak san cu sii vai hmang ih sumdawnnak, palik pawl ih phiar nak ruangah tin an sim. Kum 17 sung rualrem nak tuah a si hnu ah June 19 ni hi kachin ram sung ih ral a thawk nak kum khat kim nak a si. (DVB, June 22).

(Visited 50 times, 1 visits today)

Comments

comments

Comments

%d bloggers like this: