A Vei (6) Nak Chin Christian Youth Combine Worship Service Melbourne Hmang Thlang Ding

64757_741939299194589_2303148753850800081_n

Van Bawi Lian

Melbourne: Australia, Melbourne khua ih um Chin mi zumtu kohhran le pawl 30 lenglo cun Nov 29, 2014 ah Pathian thangṭhat biak khawmnak cu Melbourne nisuahnak ih Discover Church ah tlailam sml 3:00 ah hman an tum. 

Hi a vei (6) nak Chin Christian Youth Combine Worship Service Melbourne hi awnmawi le zaihlasaknak pawl thawn Pathian biak thangthatnak hman tum a siih Emmanuel Christian Church Melbourne Mino pawl in inn tek ṭuanvo an la ding.

Hivek ih hmunkhat te ih Pathian biakkhawmnak hi Australia ram piih kumkhat veikhat an neih mi um sun a siih Chin mino 1000 lenglo an suak khawm ding tiah zum a si thu ECCMY mino upa hnen ihsin thu kan dong. Kum tinte in hi biak khawmnak caan ah Chin mi zumtu 500-800 karlak tluk suak khawm in Pathian thangṭhatkhawmnak neih a si ṭheu.

‘Mi 1000 lenglo rak mikhual dingin kan ralring. A vei (1) khatnak kan rak hmanlai ahcun kohhran le pawlkom 7 pawlin kan biakinn ah kan rak hmang. Tu ah kohhran le pawl 30 lenglo pawlin kan hmang sal ding. Kan mino pawl in a ratu zaten kan rak hmuak a si.’ tiin Salai Uk Lian, ECCMY sungṭuan cun CT Media hnenah a sim.

Tuiṭum ih Pathian hmunkhat ih biakkhawmnak ah zaihlasaknak, laam le choir, drama pawl thawn caan hman a si ding hleiah, Rev. Van Dawt Thawng, Victoria Chin Baptist Church ih Associated pastor in ‘Mino le Thangṭhat biaknak’, Rev. Dr. Ronald Laldinsuah, Mizo Christian Church Pastor in ‘Mino le Thlaraulam Ṭhalennak’ timi thupi hmangin thutawi simnak khal an nei ding.

Chin Christian Youth Combine Worship Service hi November 14, 2009 ah Emmanuel Christian Church, Melbourne Youth pawl ih rak hohatnak in rak hman thok a si. An rak hman dahzonak pawl tla cu, Emmanuel Christian Church Melbourne, Chin Christian Church Melbourne, Melbourne Chin Church le Victoria Chin Baptist Church, Chin Baptist Church pawl tla an si.#

(Visited 219 times, 1 visits today)

Comments

comments

Comments

%d bloggers like this: