A vei (4)nak Chin Christian Youth Combine Service Melbourne, Australia Ropi

Chinland Today
10 November 2012

Melbourne: A vei (4) nak Chin Christian Youth Combine Service Melbourne cu tuini tlailam 4:00-7:30 tiang tluang le nuam zet in Melbourne ah an hmang. Melbourne ih um Chin Khristian le Fellowship mino pawl cun sunglawi zet in hi caan ah Pathian thangṭhat tlang khawmnak an nei. Zuk : Khawmnak ih Zuk © Chinland Today

‘A liamcia kum 2000 ahcun mi malte lawng Melbourne, Australia ah kan tleng. Zarhtin, Thlatin a kumin hmunkhat ah kan khawm aw ih,  mimalte lawng kan si. Pathian in Chin mi pawl lam in onsak ih tu ahcun mi 5000 tluk Melbourne ah kan thleng ve zo. A hlan ahcun Melbourne Chin Christian Fellowship tin hmunkhat ah kan khawm tlang ih Pathian ih tlawsuahnak in tu ahcun mino himi zat in pawlkom tin le fellowship tinih Pathian kan thangṭhat hi a ropi a si’ tiin Melbourne ih a thlenghmaisa tu Pu Chan Thang, Lai Christian Church Melbourne Pastor cun a sim.

Tui zan ih zaihlasak khawmnak le Pathian thangṭhat khawmnakah Melbourne ih um biaknak pawlkom 26 pawl hnenah sawmnak pek an si. Pawlkom 12 pawl ih mino pawl an tel ih a teltu tin in thangṭhatnak hla pakhat ciar an sak. Mi pathum in thupi dangdang hmangin thutawi simnak an nei. Victorian Chin Baptist Church Melbourne Mino pawl in inntek ṭuanvo an la.

Khawm thok ihsin Praise and Worship thawn Pathian thangṭhatnak an neiih a teltu pawl in nuam an tibiknak le kum dang hnak khalih an porhbiknak khal a si.

‘Duh vekih biaknak pawlkom dang pawl an rat theilo cu a poi kan ti zet. Thuhla kan thanawk nehlo ruangah tla a si men thei!. Hmaikum lam ahcun nisuahnak lam hrangah ṭuanvo latu le nitlaknak lam hrangah ṭuanvo latu tiin ṭhenaw sehla tampi hnaṭuan a olsam phah ding. Biaknak pawlkom dingthar pawl kan thei cawk lo tikah pehtlaihnak lam hi a harsa deuh’ tiin Pa Thawng Za Tong, VCBCY hotu cun CT palai hnenah a sim.

‘Tui kan tuahmi hi mino pawl, a ṭhangthar lai dingmi kan fanau hrangah sunmang a si. Hivek ih ṭongdang le miphun dang, unau hmunkhat ih Pathian ṭhangthat hi a um dahlo. Kan mino pawl ih nan tuah miin kan miphun, ka sakhuanak le kan Chin nun a cawisang ding a si’ ti khal cun VCBC pastor Japheth Lian cun CT palai a sim ve.

Hi biakkhawmnak hi 2009 ah Emmanuel Christian Church Melbourne mino pawl ih huaihotnak in rak thok mi a siih  ahmaisabiknak khal ECCM biak inn ah rak hman a si. Chin Christian Fellowship le Melbourne Chin Church pawl ah 2010 le 2011 cu hman a si. 2013 cu Chin Baptist Church, Melbourne nitlaknak lam ah a thleng ding. ‘Mino zaten tuikum hnak in danglam le nuam in Pathian thangṭhatnak kan nei tum ding. Danglam zet le nuam zet ih hman thei ding le a ratu hmuahhmuah khal lo hmuah kan tum ding a si’ tiin MiMi, CBCY hotu cun CT palai a sim.

Tui kum ih biakkhawmnak ah mino 600 lenglo an khawm aw. Khawm banah inn tek in zanriah tisawp thawn an dar.


Comments

comments

Comments

%d bloggers like this: