A Tlai Zo (True Story) Mai Sokhlei Par

A TLAI ZO

(True Story)

Mai Sokhlei Par

‘M’ ka ngai. Tuini tiang ‘M’ thawi kan thuanthu hlunpawl ka ruahsal tinten ka mitthli a runghal tuamtoih ka thin khal a na duahdo lai. Hivek ngelcel ka rak tong hi zo bik ruangah ti thei loin cung Khuanu lamlam ka mawhsiat theu.

Kum 2000 kum ah ka rualnu ‘K’ thawn Kalay Phunsang Tlawngah kan rak kai tlang. Kum khat a rei hnu-ah kan rualpi a si leh ding mi ‘M’ kha kan tlawng a ra thleng ve. Cutin K le M le kei cu rualza ah kan run cangih a suk a so ah kan thlun-aw hnohno theu. ‘M’ cu tong nei lemlo, daitei umpawl a si ih, ‘K’ cu tong duhzet le pawl nuam ngaingai a si. Cun, ‘M’ cu a hmel le ruangrai a tha lawng siloin a nuncan khal a mawi ngaingai ih, mi neinung sungkua ihsin ra mi khal a si.

‘M’ thawi kan theihawknak a rei hlanah kei cun ‘M’ cu ka thinlung thupten ka uar cih mai. Ni le thla malte a hung rei cun ‘M’ ka uarnak cu duhdawtnak ah a thlengaw vivo. Asinan cumi cu  ‘M’ ka theihter duh lo. Ziangahtile anih cu uartu tampi a nei ih kan dinhmun le a tanaw tuk bet fawn, ka beisei ngam lo lawlaw. ‘M’ hin in duhdawt ve thei ding khal ka zum lo. Curuangah ‘M’ ka duhdawtnak cu ka thinlung muril kawmte ah ka thup hlenhli theu.

Ka rualnu ‘K’ cu mitlaitluang le polite zet a si vekin amah thawn hin kan kopaw tam deuh. Lakphakdawr (Canteen) kan totlang, kan lengtlang, kan vaktlang theu. Veikhat tla cu Lungpili ah ti leuh dingin kan sawm-aw khawm. Asinan ‘M’ cun ca zoh ding ka nei a ti ih in thlun lo. Curuangah ‘K’ thawn kan pahnih lawngin Lungpili ah ti kan va leuh.

Cuvekih ‘K’ thawn kan thlunawk tam tikah mi tampin ‘K’ thawi ngaiaw ah in ruat thluh. Cumi cu kan pahnih in kan thei ko nan makah kan than duh lemlo. ‘K’ khalin poi a ti lo. Cutin kan kawmawkdan kelten tlawng kai sung hmuahhmuah kan rak um.

Vei hnihkhat cu ‘M’ in ‘K’ thawn nan ngaiaw thlang mawsi? tiah in sut theu. Kei cu ka hni men. Vei khat lawng si lo, vei tampi ‘M’ in cuvek cu in sut theu ih, in suh tinten kei cun ka rak hnihsan men theu. Mi in relnak a rak theih theu ruangah ralrinnak in pe duh a si ding tin ka ruat ih saupin ka rak simfiang dah lemlo.

‘K’ le kei cu tlawng kan vun theh. Asinan ‘M’ cu kum khat a tang lai. Kei cu tlawng ka theh veten ka umnak Falam khua ah hna ka lut cih. Cutin kan rualza cu khaw dangdangah kan thenaw thluh.

Kum khat a rei hnu tawkfangah ‘M’ khal tlawng a theh ve ih, Falam khaw kiangih khawte pakhat ah cozah hna tuan in a ra um ve. Anih cu a tlawng kai lai ihsin ca zuam tuk mi a si ruangah cuvekih hna tha a run ngah lohli mai cu mak ka ti lo.

‘M’ cu Falam a rat tinten in ra tong theu. Lakphak dawr ah titi thunuam rel in kan kawmaw theu ih, cuvek caan tinten hrelh lotei in suh ringring theu mi cu, “K thawn nan duhaw maw?” ti mi thusuhnak hi a si. Kan tonawk tinten ‘K’ thawi kan dinhmun in sut ringring hi ka mangbang theu. Asinan kei cun ka rak ti theudan kelten, “Hiti hi kan si ko,” ti hrawng lawngin ka rak let ringring.

Vei khat cu Falam ah ‘K’ le ‘M’ thawn Biakinnpi ah kan tongaw dukdi. Annih pahnih cu kawhhran thil thu ih Falam hung an si. Kan pathum, kimtei kan vung ton-awsal cu kan lung a awi cio. Khawm tiakah sabit ti kan intlang ih titi thunuam rel in sunni-hlawh ten kan kawmaw. Ka rual tei pahnih cu ka ngai hai tuk. ‘M’ cu ka ngam lo nan, ‘K’ cu ngai riamah ka kuah thul, ka pom thul, zoh men thei loin ka tokthai leuhleuh. Ka ngai hai tuk mi cu!

Kan rualvah thum kan vun thenaw miarmo cu um a har in lung hmuah a leng thluh. Anmah khal an si ve ko ding ka ti ngam. Keimah te lawng Falam ah ka rung tangta cu umdan a vavaiaw duh nasa.

2005 kum, December thla cu khua a sik nasa. Hitluk khawsik can ah ‘M’ cu a umnak khawte ihsin Falam a hung tlawng phutphi. “In ra leng seh” ti mi ‘M’ ih thucah ka theih leveten  amah tong dingin ka pok vurvo.  ‘M’ thawn kan tonawk tinten ka lungtur hi a rang ringring theu ih, tu khal ‘M’ a ra tlawng ti ka vun theih veten ka lungtur cu coplecilhin a rung rang ciamco. A si, ‘M’ hi ka duhdawt mi a si!

‘M’ hnenah tawkfang ka len hnu-ah inn tin dingin ka pok ih ‘M’ cun in ra thlah. Thla eng hnuaiah nuamnaitei feh phahin thu phunphun kan rel phah vivo.

Kan inn kan thlen zik thlang cun ‘M’ cu a cawl dukdi. Cule thungaithlak zet mithmai thawn thu in sut: “K thawn nan duhaw maw?” in ti. Kei cun ‘M’ ih mithmai ka zoh tikah a thutak tuk ti ka thei. Curuangah ‘K’ thawn cuvek zawngih ngaiawknak kan rak neih dah lo thu le rualpi tha lawng kan si ringring thu pawl kimcangten ka sim thluh lawlaw. ‘M’ cun ka thu sim mipawl cu ngunthluk zetin a rak ngai ringring. Ka tong thluh cun ‘M’ cun,

“L, ka thu lo suh mi thaten in sim ruangah ka lungawi tuk. Cule ka thaw khal a suak. Ziangahtile Kalay phunsang tlawngih ka rak lo hmuh veten ka lo duh zo. Kum hizat a rei zo nan ka lo duhnak hi a ziamral thei dah lo; ka lo duh sinsin. Hitlukih ka lo duh ruangah ‘K’ thawi nan fehnak khalah ka rak lo thlun ngam dah lo. Ziangahtile nan nelaw tuk fawnih nan duhaw ah ka rak ruat. Ka rak lo thik thei tuk! Nan pahnih nan nomawkdan ka hmuh tinten ka thin hi a na ih ka tuar thei lo theu. L, ka rak lo duh tuk sokhaw. Tu khalah ka lo duh. Nang teh in duh maw?” tin i run ti hlunhli!

‘M!”

Zianghman ka tong thei nawn lo. Mak ka ti tuk. Keimah zoh ih ka hmai ih ding ‘M’ cu ka tang sungah ka vun pom cutci. Ka mitthli cu ka biang parah ruah bangin a sur in an sur thla zuizo. Ka thinlung mitthlamah cun tuihlanih ‘M’ ih tongkam le mithmai umdan pawl cu a sangsang ten an rung lang ciamco. ‘K’ thawn nan duhaw mawsi? tiah tu le tu i rak sut theutu ‘M’, ‘K’ thawi kan nomawk tinten mithmai nau zet tei in rak thlir ringring theutu ‘M’, keimah tong dingih Falam a ra theutu ‘M’…

Aw.. tu cun thil umdan hmuahhmuah ka fiang vuarvi thluh thlang. ‘M’ hin ka rak duh zatin in rak duh ve! Ka phu lo, in duh ve zik lo ti ih ka rak beisei ngam dah lo mi ‘M’ hin keimah hi in rak duh ve! Ka thinlung cu lungawinak in a zel khat thluh. Ka duhdawt mi ka pangpar, in rak duhdawt vetu ka pangpar ‘M’ cu diriam in ka vun pom hnget sinsin.

“M, in duhdawt ve ti! Ka lungawi tuk. Ka lo sim ding, nangmah in in duh hlan reipi ihsin keimah in ka rak lo duhdawt zo sokhaw. Kan dinhmun a tanawk tuk ruangah ka rak lo sim ngam dah lo. In duh ve thei ding ti ka zum ngam lo ruangah ka rak lo beisei ngam dah lo. Nang cu ka hrangah  na sang tuk. Ka hmuan sungih par dingah cun nang cu na mawi hleice tuk. Asinan cui pangpar cu ka hmuan sungah a rak par rero zo! M, in duhdawtzia ka rak lo theithiam lo hi keimai mawh a si. In ngaidam aw maw. In ngaidam hram aw.”

‘M’ ih hna phur teah dimten ka sim rero. ‘M’ khal mitthli thawn ka tong a rak ngai ti ka thei. ‘M’ cun,

“L, a tlai hrih lopi. Kei tla nangmah lo bak duh mi dang ka rak nei dah lo. Nangmah lawng hi ka duhdawt mi na si. Tu hi a tlai hrih lo. Kan tap lo pei. Nangmah thawi kutkaiaw ih leitlun hmaton ding hi ka hngakhlap tuk zo; cule ka sunmang khal a si,” tin i run ti.

Culeveten kei cu mang ihsin hung harhsuaktu men bangin ka harh vukvi. Thil pakhat, el theih nawn lo mi thudik, cumi ka vun theihsuak veten cui thudik cun ka thin cu  khui-he bangin a run hen dohdo. A si, el a theih nawn lo mi le hrial a theih nawn lo mi.. thudik!

“M, tuizan hi ka lung kuai zan a si. Na thei maw? Ka lo sim ding, mizan tihni zan kha ka pale in ka nupi dingah fala dang an rak be zo! Ziangkim rel fel in a um zo. Hrial theih a si nawn loih el theih khal a si fawn lo. M, kei cu ka lung a kuai!”

Cui tong a theih cun ‘M’ cu a khong thluh. I zoh. Ka zoh ve. Ka mitfang sungah capohnak zianghman a um lo ti a vun theihfiang cun a mitthli cu a rual a rualin a rung bung thla zurzo.[u1] Thla vang hnuaiih ka hmuh mi, ka duhbik mi ‘M’ ih lungkuainak hmel te cu ka zoh ngam nawn lo. Ka tangah ka vun pom bet thutthi.

Kan pahnih cu awn loin kan tap!

“L, a poi tuk ti lo cu kan pahnih karlakah rel ding dang a um nawn lo. Nang cu nupi dang na nei thlang ding. Asinan ka lo duh tuk! L, tuizan zan khat te hi cu ka hrangah in pe aw. Nangmah thawn diriam in zan khat tal hmantlang ka duh. L, tuizan hi na ta ka si ding. Zan khat te tal na ta si ka duh. Cule ka damsung hmuahhmuah thin diriam in ka um dingih ka thlarau hnuk khal a ciap thei ding. L, tuizan hi na ta i siter hram aw. Maw?”

‘M’ ih zangfah dilnak aw te cu ka hna sungah theih thei ceu ih dim nan tha cak zetin a ra  luang lut diahdo. Ziangtin ka tuah ding? Ka thinlung a buai. Thlapi cu a vang deldel. Zilthli daiten a hrang phahphah. Khua a sik tukih kut khal a vut thluh. Kiangkap cu a reh thepthep. Kei cun hnget zetih ‘M’ pom phahin thu tampi ka ruat. Camkhat te a si nan ka thinlung cu hmun hlapi a thleng man. Rei lote sung a si nan ka khawruahnak thlipi cu ‘M’ parah thumaw in ram kipah a tawivak. A netnak ah ‘M’ cu a biang khatlam khatlam in ka vun domsak. Cule thla eng hnuaiah keimai ruangih tla a mitthli cu ka kutzungpi thawn dimten ka vun hruksak.

“M, ka lo duh ti na thei. Ka rak lo sim vekin nang cu a mankhung mi pangpar na si. Curuangah ka hmuan sungih zan khat te lawng par dingah cun ka lo siang hrimhrim lo. Zan khat thil thu menih uai ding mi pangpar tla na si lo. Nang cu ka lungthin par-hmuan ih kumkhua a par ding mi, a uai dah lo le a til dah lo ding mi ka pangpar na si ding. M, kei hin maw, ka lo duhdawt tlukin ka lo sunsak sokhaw. Hitlukih ka sunsak mi ka pangpar sunglawi uaitertu cu i siter hram hlah. A par a mawi sinsin theinak hrangah a siatsuah theitu pa-ngang lak ihsin humhimtu i siter sawn aw. M, ka lo sim mi na theithiam ti? Ka lungthin sungah uai ni nei loih par ringring ding mi ka pangpar na si ka lo ti mi kha rak hngilh dah awhlah. Cucu ka lo duhdawt ruangah le in rak duhdawt ve ruangih ka lo peksal ve thei mi, ka laksawng neihsun cu a si. M, nang cu a tilh ka sian lo mi ka pangpar sokhaw na si.”[u2]

Cui zan cu ‘M’ le kei cu mitthli rualriat thawn kan um. Kan pomaw, kan hnamaw. Kan tlawng kai lai sulhnupawl tla rel in, kan rak duhawk thupzia pawl ruahaw in, thinlung hmuahhmuah ongaw theh in thu tintian kan simaw.

Thlapa cu vankau tlang lamah a liam muarmo. Khua tla a vang zik thlang. ‘M’ thawn kan thenawk can a cu.. kumkhaw hrangah!

(Visited 129 times, 1 visits today)

Comments

comments

2 Comments

  1. Joel Lalcungmang says:

    Zuam vivo aw!
    Laimi (Falam) Cangan kan mal tuk!

  2. Daniel Kapthuanthang says:

    Mai Sawkhleipar,

    Na zuamnak parah ka lo lawm nasa. Zuam sinsin aw.Pathianin hlawhtlinnak lo pe hram seh. Duhsaknak sangbik ka lo hlan.

    Daniel Kapthuanthang

Comments

%d bloggers like this: