A Taangmi T.uanvo

Siar:  Saam 112

Thu sia theih ding kha a hreh hrimhrim lo. A zumnak a khoh ih Bawipa ah a rinsannak cu hngetzet in a bun. – Saam 112:7

Kumkhat sung Baibal: – Habakkuk 1-3 – Thufim 27:1-14

Ka nupi thawn kan nun daan hi menmen te a si. Kan tthit awk tikah lennak le hminthannak kan hawl lo. Pathian sunlawinak dingah Amai’ fialmi ttuan dingin kan tumtahmi cu kan nunnak kilkip ah a fiangzet. Kan faate pawl an upat tikah RBC hnattuan kan thok ih kan tumtah bikmi cu Pathian sunlawinak hrangah a si.

2002 ah kan hrangih thu siabik a ra. Kan fa a pathumnak kum 17 mi Melisa in in thihsan. Cumi in hmakhat te’n thu in ruatter saal. Riahsiazetmi nu le pa dinhmun in Pathian sunlawiter a theih pei maw? Tuar a harzetmi thil cangmi hin kan thil hmuh daan le kan tumtahmi a danglamter thei pei maw? timi a si.

Hih thusuhnak hi caan reipi kan ruat cuahco. Kilkhawi dingin Pathian hnenih apmi faate pakhat laak hlo dingin Pathian in a siang a si ahcun A parah rinsannak le a hnattuannak in midang a hnenih rak hruainak ihsin cawl men a olte ding. Asinain Saam cangantu in, “Pathian a ttihzahtu cu a hnin dah lo ding. A zumnak a hngetkhoh, Bawipa a rinsan a si,” (Saam 112:6-7) a ti. Curuangah ziangvek harnak kan ton khal ah a poi lo. Kan zumnak a hngetkhoh dingih Bawipa cu kan rinsan ding.

Kan nunram ah thuthang sia thleng hmanseh a poi lo; Pathian sunlawinak dingah A hnattuan sunglawi cu pehzom in kan ttuan thotho ding.

Raalthazet ih a ra suakmi riahsiatnak in Pathian cu a rian ding,

Tampi a sunloih ding;

Dai zirziarmi tidai sungah thlam a lang,

Van ih mawinak a si.

Lungkuai cingin rinsan aw, riahsiatnak na neh ding.

Comments

comments

Comments

%d bloggers like this: