A Sunlawinak le Kan Sunlawinak

April 6
Tlawngkai Ninga

A Sunlawinak le Kan Sunlawinak

Kannih tla cu kan zate in kan hmai puan ih tuammi kan sin awn lo ruangah Bawipa ih sunlawinak hi thlalang bangin a langtertu kan si. Cuih sunlawinak cu Thlarau a simi Bawipa hnen ihsin a rat ruangah kan nunnak hi sunglawi sinsin in le Amah bang sinsin in in thlengh vingvo a si.
– 2 Korin 3:18

Bible Siar Ding: 1 Korin 15:35-58

Bawipa ih ratnak cu thlarau nunnak hrangah a si ih kan taksa ruangpum hrangah a si lo. Kan taksapum cu vanram luahtu ding a si lo; cutawk hmun ah a thleng lo ding. Anih cu hih leitlun thil a si ih leilungtlun thilri a zate cu hih leilung parah an siatral taa ding.

Cuih hmun ahcun ziangmiso a thleng ding? Pathian Fapa ih nunnak, Pathian Fapa ih mizia, Pathian Fapa ih thianhlimnak thawn a thuam awmi, cumi sungih a ummi pawl thlarau ruangpum sinak thar lawng an thleng ding.

Vanram kan thlen tikah Amah cu sinak thar in kan hmu ding. Hih nunnak in taksa thar a keng ding a ngen; atu rori ih neih ding a ttul. Himi cu nunnak ih daanthu a si. Nunnak ih daan cu kan nei cio. Asinan atu ahcun thlarau nun ih mizia kan kengih hih leitlun tisa daan ihsin a luat zo (Rom 8:2). Himi cu nunnak ih daan thar, Khrih nunnak na sungah a ummi a si ih vanram ah ka thleng tengteng ding ti na thei fiang. Na sinak thar a simi Pathian Fapa ih sinak nunnak thar thawn lawng cuih hmun ah na lut ding.

Hrambunnak hladeuh ah kan tthawn. John 1:14 ah, “Cuih Thu cu minung ah a cangih kan lakah a um; zaangfahnak le thutak in a khat. A sunlawinak kan hmu in Pa in A Fapa hnenih a pekmi sunlawinak a si” ti’n kan hmu.

Atu ah zaangfahnak le thutak ih a khatmi Bawipa ih sunlawinak cu na cosaang ngah zo. Na theih ringring dingmi cu sunlawinak cu na thluak khuaruahnak sungah a si lo, na thinlung sungih thil mankhungzet a si. Sunlawinak in cahnak huham phun hnih a nei: zaangfahnak lawng si loin thutak khal a tel cih a si.

Cule hih sunlawinak cu zumtu Pathian fahniang pawl in kan neih dingmi hrimhrim a si. Vanram thlen ding cu ziangtluk in a sunglawi? Hrintharnak ih um zia diktak cu a si.

Bawipa ih sunlawinak, Bawipa ih umpinak, Bawipa ih huham, le Bawipa ih nunnak cu na nunnak ah a phuanglang aw ding, cumi cu na sungah seemsuahmi an si.

Sunlawinak cu a lenglam thil si loin sunglam thlarau nun ih sinak a si.

@ Smith Wigglesworth

Comments

comments

Comments

%d bloggers like this: