A Ralai dingmi Meisa

August 27
Tlawngkai Nikhat

A Ralai dingmi Meisa

Bible Siar Ding: 1 Siang. 18:20-40

Ziangahtile kan Pathian cu mi kaangralter theitu meisa a si. – Hebru 12:29

Raaldonak ding ramri cu suai cia in a um zo: Baal pathian ih profet 450 pawl cu khatlam kau ah an um ih khatlam kap ahcun profet Elijah amah pakhat te lawng a ttang. Cuih mibur bur hnih karlak ahcun Israel mipi pawl cu an ding hliarhliar. Israel ram ah Yahweh Pathian biaktu pawl kha Pathian nung zum lotu (pagan) pawl ih biak daan le thilti daan pawl in a ciahneh, a vaivuanter ih a siatsuah thluh. Curuangh Pathian nung bia maw bia lo timi atak ih fiangternak le langternak caan cu a rung thleng.

Meikhu pawl an kiang ttheh hnu ah a nungmi, le atakmi Pathian cu a rung phuanglang aw. Baal profet pawl cu an sung ih hlei ah an zate’n thah thluh viar an si. Politics ti daan zawng cun hih lei tisa daan ih nunphung pakhat cemter thluh viar rori ding cu a dik thei lo ding. Ziangahso “that thluh loin an nunter hrih men lo,” dungsiipter men hngai sehla tawk ko lo maw ti ruah ding a um. Zianglam a va si khalle Yaweh Pathian Bawipa cu a nungmi le huham thawn a khatmi Pathian a sinak kha profet Elijah nunnak hmangin mipi ih mit hmuh rori le theih fiang ding rori in a phuanglang duh ruangah a si.

Pathian cu mi kaangralter theitu meisa a si. Amah in biakttheng parih raithawinak cu rinhlelhnak zianghman um lo rori dingin cem verver ko a alhter, a kaangter ih Yahweh Pathian tak a sinak a langhnganter. Israel mi pawl kha siatralnak thleng ko buumleem thei nawn lo dingin pathian ka si a titu pawl hmuahhmuah cangvaih theinak zianghman a pe nawn lo hlei ah a cemralter thluh a si.

Profet Joel cun a ralai dingmi thutthennak ni ahcuh Yahweh Pathian in a raal pawl parah nasatak in thu a tthen lai ding thuhi ti’n a sim: “Hmaituang meisa ziang hmuahhmuah a kaang; Dung ttang meisa hlio a alh ringring (Joel 2:3)” ti’n. Cuih ni le caan ahcun satan parah netabik thu a tthen ding. Zianghman in Yahweh Pathian ih a alhmi le a hlio hluahhlomi meisa kaang cu an kham thei lo ding.

Bawipa, hih leitlun ih thil ttha lo pawl do ngam loih ka raalhrutnak ka phuang aw. Satan cun a netabik Na thutthennak mei-alh hlio a do thei lo ding, timi thu in theihtermi parah lungawithu ka lo sim.

Tuni ka tlanlennak khuatlang nun ah satan ih tisiatnak pawl do dingin Yahweh Pathian hrangah ziangtinso ttan ka laak thei ve ding?

@ Ava Pennington

(Visited 28 times, 1 visits today)

Comments

comments

Comments

%d bloggers like this: