A Rak Lardah Mi Tongkam Hrekkhat Pawl

A rak lardah mi tongkam hrekkhat pawl

Tu tum ka ngan tumbikmi cu Tahan khawpi le a kiangkap hrawng ih tongkam rak hman lar zetzet mi pawl an si. Thei dah lo kan um bang in rak hmang uar zetzet tla kan si zul ding ka zum. Mirang pawl in SLANG an timi phun a si. Can tawkfang cu mipi in hman a si zet nan kum tluansuak ih hman cu an rak si lo. Tampi a um ding nan ka theih ban cin tawkte in tarlang kan tum hnik ke aw.

An Lo Mom

An lo mom timi hi 199….. hrawng ih lar zet mi tongkam a si. Ka theihdanah Letpanchuang tlawng ihsin ra suak mi tongkam a si tin ka thei. Tlawngta nunau pakhat cu tlangval pawl in an terhnakah lungte thawn an deng. Amah cu mizo tong thiam tuk lo si phah thawn Mizo tongin “An lo vom” tin pei nawn in a rak tong. An lo deng a tiduhnak bik a si. An lo vom tin a tongtum mi kha an lo mom tin a tong sual ihsin lar thok a si tin ka rak thei dah.

An hmannak pawl cu thil kan tuahsual ruangah si maw, mi pakhatkhat ih kawk kan tuar tikah si maw “an lo kawk maw” tinak aiah “an lo mom maw?” tin kan hmang. Nauhak upa tlangval ti um loin kan rak hmang uar zet. Hrekhkat cun “a lo mom” tin an hmang ih hrekkhat cun “an lo mom maw” tin an hmang. Ti duhsan cu pakhatkhat kan ti sual lole kan tuahsual ruang ih kawk tuar pawl khi ti duhsan bik a si.

Palin Kuai

Palin Kuai timi hmannak cu a dang lala. Palin kuai kan ti cun thu el nak deuh a si bik. Thimnakah thu pakhat kan rel khawm ih kan lungkim lonak a sicun “Palin Kuai” kan ti theu. Thil a si lomi le kan si lonak a si cun Palin Kuai tin kan rak hmang zet. Hi khal hi can tawkfang cu upa nauhak ti um loin rak hman luar zet mi tongkam a si.

Ci Nang!

Ci nang timi hi Tahan le a kiangkap um hmuahhmuah cun kan thei thluh ding ka zum. 2003 kum hrawng ih lar zet mi tongkam a si. Ci Nang timi tong hi a lar hleice a bang. Ziangah tile pitar putar tiang in an rak hmang ve thluh. Himi tongpawl cu hmannak bik khal a um lo. Thil kan lungkim lonak a si cun Ci Nang timi hi kan rak hman thluh in ka thei. Mil aw lo tuk khal a rak um lo. A rak remcang thluh ko. Himi lai ih na rak hman ngah ve lo cun Ci Nang !!

Ngaihnak um lo

Himi cu thil kan lungkim lonak langtertu tongkam a si. Kan duh zawng ih thil a cang lo canah le kan lung a si lemlo cun Ngainak um lo kan ti tlangpi. Lar tuk cu si lo nan hman ve zetmi tongkam a si.

Orh Mai

Himi tongkam cu a thei dah lotu kan tam sawn ding ka zum. A ti duhsan bikcu diriamnak tongkam a si. An lo mom timi thawn malte a nai aw deuh. Asinan Orh Mai timi ahcun kan tongmi lole kan theih mi a dik lo canah hman a si bik. Kan theih mi a sual si maw, ka rel mi a dik lo canah midang in a dik sawn ih an rel le an sim canah “Orh Mai” tiah midiriamnak ih hman a si.

Ka Cek in a ngaih lo

Ka cek in a ngaih lo timi kal hi kan lungkim lonak langtertu tongkam a si. Asinan ngaihnak um lo timi thawn malte a dang aw deuh. Kan hmannak khal a dang deuh in ka thei. A tlangpi thui in fala tlangval lamah kan hmang hleice a bang. Rawl hmeh thaw deuh a um cun “Ka cek in a ngaih nawn” kan ti ih rawl hmeh thaw lem lo a si cun “Ka cek in a ngaih lemlo” kan ti. Fala khal a sile a mawi lemlo kan ti cun ka cek in a ngaih lo tin hman a rak si theu.

Mak male, Mak ah

Mak male timi tongkam hi a nauhak bik dingah ka ruat. Online san a si hnu ih hmanlar zet mi tongkam a si ding tin ka zum. Ziangah tile online par ih kan biak awk (chatting ) canah hman a si bik. Tong ding kan theih nawn lo can siseh, thiltha kan rel can khal siseh, ngainak thu le duhnak thu kan rel canah khatlam ihsin hman uar zet mi tongkam a si. Upa hrekkhat hrang ahcun an cek in a ngaih lem lo a bang. Hi vek tongkam ka thei dah lo an ti theu. Asinan tulai santhar mino tete ih hman uar zetmi tongkam thar pakhat cu a si rori. Ahleice in Facebook sungah hman uar a si. Ka theih ban lomi le hrelh mi tampi a um ko ding nan hi zat in kan bang hrih ke. Na theih bet a sile in rak pehsak awla.

Salai Mitthli

Comments

comments

Comments

%d bloggers like this: