A Palhmi Ruahsannak

April 21

Tlawngkai Nithum

A Palhmi Ruahsannak

Siar:

Efesa 2:1-10

Ziangahtile nannih cu Pathian zaangfahnak zarah zumnak in rundam mi nan si. Hih rundamnak cu nan ttuannak ruangih nan ngahmi a si lo, Pathian ih laksawng a si. Curuangah zohman porh awk ding a si lo.     – Efesa 2:8-9

Kumkhat Sung Baibal:

–   2 Samuel 12-13

–   Luka 16

Germany ram ih ummi Bavarian khuapi cu hmun ttihnung Dachau an timi thawn an hmin a bang aw. Cumi Dachau cu Nazi Party (HitLar ih rak dinmi) pawl in Leitlun Raalpi Avei 2 nak (World War II) lai ih mi tampi an rak thahnak hmun hngilh lonak ih sakmi hminsin tlak thil hlun pawl retnak innpi a si.

A kiangkap na vun zoh le vete’n sangka tlun ih canganmi: “Na ttuannak in a lo luatter” timi cu ziangti hmanih hrial theih loin na hmu ding. A ngaingai ahcun cuih innpi sungih a luttu pohpoh cu thah dingmi pawl an si.

Tuih san minung tampi khal kan tthatnak le thil ttha kan tuahnak in kumkhua nunnak vancungram kan co ding ti’n kan ruat sual pang ttheu. Khrih cu sualnak zianghman a nei lo, sikhalsehla kanmai’ ruangah Pathian in sualnak zianghman a nei lomi Khrih kha sual ah a canter ih cuticun Amah ih zarah Pathian ih dingfelnak kan ttawm ve a si (2 Kor. 5:21). Kumkhua nunnak cu kan ttuannak ruangah si loin Pathian ih zaangfahnak laksawng a si (Efesa 2:8-9).

Satan in na ttuan tthatnak in rundammi na si, tiah lo bum pang hlah seh. Jesuh ih thinglamtahnak lawngin luatnak taktak na ngah thei. – Cindy Hess Kasper

Leitlun zirh awknak na thlun asile,

Ruahsannak nei lo mi na si ding;

A hmunmi Pathian ih tumtahnak rinsan aw,

Luatnak taktak co na duh ahcun. – Branon

Hnattuan ttha ttuannak in rundam mi kan si lo,

Pathian ih ttuanmi ruangih rundam mi kan si.

(Visited 19 times, 1 visits today)

Comments

comments

Comments

%d bloggers like this: