A Nungmi Zumnak

February 3
Tlawngkai Ninga

A Nungmi Zumnak

Thla nan cam ih thil pakhatkhat nan dil tikah ka ngah zo ti’n zum uhla nan dilmi hmuahhmuah nan ngah ding.
– Mark 11:24

Bible Siar Ding: Matthai 17:14-21

Leitlun caan tawite kan nunnak ah zumtu cu Pathian raalthuam famkim hruk dingah Bawipa in in duhsak (Efesa 6:11). Thlarau Thianghlim ih khat dingah le zaangfahnak le Amah theihnak sungah tthanglian ding in duhsak (2 Peter 3:18).

Aw, Pathian in kan hrangah ziangso in tuah sak ih zumtu kannih in teh Jesuh hmin in ziangso kan cohlan? Jesuh hmin a mankhung, Jesuh hmin huham a nei, ih Jesuh hmin in vanlam bomnak in coter ih Satan cu a ttemttawn. Paul in, “Amah in a ttawnttai ih a thi theimi kan pumas ruangpi hi a sunglawimi Amah ih ruangpi bangtuk ah a thlengh ding; cumi tuahsaknak dingah ziang hmuahhmuah Amah ih uknak hnuai ih ret theinak cahnak huham a neihmi kha a hmang ding a si,” a ti (Filipi 3:21). Kan Bawipa Jesuh Khrih hmin in nehnak in petu Pathian hnenah lungawithu sim uhsi!

Kanmah rundamnak dingah Jesuh in thinglamtah thihnak tiang a tuar (Hebru 12:2). Curuangh kan nun pumhlum in, “Pathian ih thu ka thlun ding” kan ti ding cu ziangtluk ih thil mawi so a si! Amah cu duh a nung! Amah cu a mawibik! A hnen ka pan hnu ah i hnonlai ka thei dah hrih lo; zianghman lo dinhmun ih i taansanlai khal ka thei hrih lo.
Amah cu mangbangza Rundamtu, hnangam takih ben theihmi Rualpi ttha rin-um a si. Kan thilrit ziangvek khal Amah in in hlitsak in in hlonsak thluh thei.

Amah cu ziangtik hmanih a cau thei dah lomi Runtu a si zia, ziangtiklai caan khal ih pan theih Rualpi ttha, Ziangtinkim a thei thluhtu, in bawm ih in ruunsuak theitu a si zia hi ruat hnik! Hiti vekih Rundamtu maksak kan neihmi Pa hnen ihsin kan duhmi le kan ttulsammi cu kan dil in kan ngah thei a si.

Pathian kan zumnak hi kan thinlung sungah rinhmainak nei hlah uhsi! Zumnak cu kan sunglam nun ah vanlam huham ih hnattuannak a si ih mit hmuh lo parih tthum awknak a si. Zumnak cu vanlam cangvaihnak a si ih Pathian sungih nun a si. Pathian cu A Fapa Jesuh ihsin kan sungah a cangvai ih mi menmen dinhmun ihsin mi thupizet ah in canter. “Ka mifel cu rinnak in a nung ding” (Ram 1:17). Pathian in kan zumnak huham in dawnkhamtu le in hnaihnoktu tlang pawl thawnter ding in duhsak.

Tlang vekih a langmi harsat buainak, thinnaunak kum reipi a lo kaihremtu pawl cu rinnak huham in tthawnter an si ding.

@ Smith Wigglesworth

(Visited 32 times, 1 visits today)

Comments

comments

Comments

%d bloggers like this: