A Nungmi Ruahsannak

A Nungmi Ruahsannak

In zaangfahnak a tum ruangah Jesuh Khrih cu thihnak ihsin a thoter ih nunnak thar in pe zo.  Curuangah a nungmi ruahsannak in kan khat ih, Pathian in a minung pawl hrangih a retmi ro cu co dingah hngakhlap in kan um. (1 Peter 1:3-4)

Thuhmaihruai:

Tuih Nipi Ni hi “Leitlun Bawipa Zaanriah Nipi Ni (World Communion Sunday)” a si. Bawipa Zaanriah ih hmuitinmi cu zumtu pawl Khrih theihter ringring ih ruahsannak nung neihter ding hi a si. Bawipa Zaanriah cu Bawi Jesuh ih dinh tami a si. Jesuh in sang cu a laak ih thla a cam hnu ah a phel ih a dungthluntu pawl a pek. “Laak uhla ei uh, himi hi ka taksa a si,” a ti. Khuat-hai a laak ih Pathian hnenih lungawithu a sim hnu ah an hnenah a pek. “Nan zate’n in uh; himi hi ka thiisen a si. Pathian thukam hngettertu le mi tampi sual ngaithiamnak hrangih ka thletmi thiisen a si. Fiangte in ka lo sim; ka Pa ih uknak sungah nanmah thawn sabit thar ka in saal hlan lo hih sabit cu ka in nawn lo ding,” a ti (Matthai 26:26-29). Paul in Korin khua zumtu pawl hnenah Bawipa Zaanriah kan hmanmi ih sullam a simfiang: “A tican cu hih sang nan ei tinte le hih hai nan in tinte Bawipa a ra kirlai hlan lo a thihnak thu nan phuang tinask a si,” a ti (1 Kor.11:26).

Bawipa Zaanriah ih kan hmanmi sang le sabit cungcang ah zirh daan le pom daan a phunphun a um (transubstantiation, consubstantiation, symbol). Ziangvek thurin le ziangvek pianzia in kan hmang a si khal le a thupimi cu Bawipa Zaanriah ih hmuitin tlolh lo ding hi a si. Dr Bob Gordon in, “Bawipa Zaanriah in zumtu pawl kan thinlung cu Jesuh hnenah in thlenh ih kan hrangah Cross parih a ttuansuakmi pawl in theihter saal,” a ti. Bawipa Zaanriah in kan thinlung cu hmun nga ah in hruai: 1) Dunglam zoh (look back) in thinglamtah in vun ciingmangter saal, 2) Vanlam zoh (look up) in Pathian in thangtthatter; 3) Kiangkap zoh (look around) in zumtupi unau tampi pawl ruangah lungawithu in simter; 4) Sunglam nun zoh (look in) in sualsirnak in neihter; ih 5) Hmailam cuan (look ahead) in Jesuh Khrih ih rat saalnak ding in hngakhlapter ih rin-umzet in A duhmi tuah dingah pumpeknak nun le Amah rinsannak nun in neither.

  1. Ruahsannak Nung ih hramthlaknak

Paul in, “A hmun ringringmi thil pathum an um: zumnak, ruahsannak le duhdawtnak an si,” a ti (1Kor.13:13). Zumtu cun “a nungmi ruahsannak (living hope)” kan nei, ziangahtile kan zumnak le kan ruahsannak cu kumkhua a nungmi Pathian sungah hram a bun ruangah a si (1Pet.1:21). A nungmi ruahsannak kan ti theinak cu a nungmi le kumkhua a hmunmi Pathian Thu sungih hrambunmi a si ruangah khal a si fawn (1Pet.1:23). Cuih ruahsannak nung cu Jesuh Khrih sung ihsin nunnak thar – kumkhua nunnak in pekmi ah a si. Bible in, “Curuangah a nungmi ruahsannak in kan khat ih, Pathian in a minung pawl hrangih a retmi ro cu co dingah hngakhlap in kan um (1Pet.1:3-4) a ti. 1Peter Cabu ngantu ih hmuitin cu zumtu zate “Ruahsannak in khat uh (Be hopeful!)” timi hi a si.

Matthew Henry in, “Zumnak cu ruahsannak hringtu Nu a si” a ti. Jesuh in, a dungthluntu pawl hnenah, “Thinhar le beidong in um hlah uh. Patian zum uhla Keimah khal i zum uh. Ka Pa ih inn ah innkhan tampi a um ih nan hrangih umnak rem dingah ka feh ding. Ka feh ih nan umnak ka rem ngah hnu ah ka ra saal dingih ka hnenah ka lo hruai ding, cuticun ka umnak ah nan um ve ding” a ti (John 14:3). Peter in, “Leitlun ah harsat buainak tong ttheu hman uh singla, beidong loin, kan Bawipa Jesuh a rat saal tikah a sunlawinak kan ttawm ve ding timi a nungmi ruahsannak in kan khat ih kan thin a nuam ringring” a ti (1Pet.1:7). Curuangah tirhthlah Paul cun Jesuh Rat saalnak ruahsan hi “thluasuahmi ruahsannak (blessed hope)” a ti hngehnge (Titus 2:13).

  1. A Nungmi Ruahsannak ih Rahsuahmi pawl

“A nungmi ruahsannak” neih cu ziangso a tthathnemnak? Ruahsannak nung neitu ih nunram ah thluasuahnak tumbik cu “lungawinak” hi a si. Peter in, “Curuangah nan lungawi uh! Harsatnak a phunphun nan tonmi ruangah caan tawite sung riahsia in um hman uhla lungawi (rejoice) in um thotho uh,” a ti (1Pet.1:6). “Amah nan hmu dah lo nain na duhdawt, nan hmu dah lo nain nan zum. Curuangah kaa ih sim thei lomi, a maksakmi le a sunglawimi lungawinak nan nei,” (c. 8) a ti cingcing.

Paul in, “Zumnak ruangih kan comi Pathian ih zaangfahnak sungah Amah in in thlenpi ih cuih zaangfahnak sungah atu hi kan um. Curuangah Pathian ih sunlawinak kan ttawm aw ding tiah ruahsannak (hope) kan nei ih kan thin a nuam (rejoice)” a ti (Rom 5:2). Zumtu thutak theitu hrangah harsatnak tonmi cu siatralnak si loin kan zumnak a ngaingai maw ngaingai lo ti theihnak dingah a si. A siat theimi sui hman khi meisa in hniksak a si ttheu. A nungmi ruahsannak neitu ih hlawknakbik cu lungawinak le thinnomnak a si.

3.         A Nungmi Ruahsannak hrang Thukamnak

A nungmi ruahsannak neih cu lungawinak le thinnomnak neih lawng si loin a ralai dingmi caan ih kan co dingmi thluasuah sunglawi thukamnak (promise) tla a telcih. A ralai dingmi Khrih Ni ah ziang ka bang pei timi ruahsannak in mi thinlung sungah a cangvaiter. A nungmi ruahsannak cun atu le hmailam caan ih kan co dingmi thluasuah in hmuhter ih rin-umnak, nun thianghlimnak, thinsaunak le tuar theinak a suahpi. Bawipa in thu in tiamkammi cu: “Cule Jesuh Khrih a lang Ni (appearing of Jesus Christ) ah thangtthatnak, sunlawinak, le upatnak nan ngah ding” ti a si (1Pet.1:7).

Christopher Morley in, “Nunnak ttha timi sungah tlinnak pathum a tel: zirnak, ttuannak le ruahsannak pawl an si” a ti. Zumtu hi daite’n um menmen dingih sersiammi kan si lo. Pathian Thu zir ding, thuthlun ding le A hrangah hnattuantu dingih ruangzingmi kan si. Paul in, “Tlanzuam awknak ah ka tithei tawkin ka tlan zo ih ka zumnak khal thlauthla lo tein ka pom hnget zo. Atu cu ka Bawipa, a dingmi thutthentu in cuih ni ah i pek dingmi nehnak laksawng ka hrangih i retsakmi ka hngak. Cuih laksawng cu dingnak suilukhum (crown of righteusness) a si ih keimai’ hrang lawngah a si lo; duhdawtnak thawn Amah a lang ding a hngaktu (unto all them also that love his appearing) hmuahhmuah hrangah a si” a ti (2Tim.4:7, 8). A nungmi ruahsannak neitu cu a nungmi Khrih ih thukam ah a nung. Jesuh in, “Ka ra saal dingih ka hnenah ka lo hruai ding” a ti (John 14:3).

Thunetnak:

Zumtu cu rundam zo, rundam rerolai le rundam famkim ding kan si. Sual thutthennak sung ihsin in ruun zo, sual ih huham sung ihsin in ruun rero ih sual um nawn lonak ah in rundam famkim lai ding. Thiamcoter zomi, thianhlimter reromi le sunlawitermi kan si. Pastor Rick Warren in, “Zumtu hrangah ruahsannak lawng hi kan famkimnak a si. Ruahsannak um loin milai hi nun a theih lo. Mi hrekhat cun leitlun thil a phunphun ah an ruahsannak an ret. Asinan cumi pawl cu a laangte sunglawng an daih an hlo saal mai ding. Lungawinak taktak cu Pathian hnenih ruahsannak um loin a ngah thei lo,” a ti. Curuangah a nungmi ruahsannak neitu cun a ra saal dingmi Jesuh Khrih a ruahsan ruangah nitin a nunnak ah daithlang loin a ruahsanmi Bawipa hrangah rin-umzet, taimazet le in pumpe in nehnak laksawng – dingfelnak sui lukhum – ngah dingin hna a ttuan ding.

“Curuangah hnattuan thok dingah nan thinlung timtuah cia in um uh.Tiar cia in um uhla Jesuh Khrih a lang tikah nan ngah dingmizaangfahnak parah nan ruahsannak zate in bun uh.”                 – (1Peter 1:13)

rcmang@gmail.com.october03,2010.worldcommunionsunday

Comments

comments

Comments

%d bloggers like this: