A Nungmi Cakuat

January 31
Tlawngkai Nihnih

A Nungmi Cakuat

Caken dang kan ttul lo, nanmah hi kan ca nan si; mi hmuahhmuah theih ding le siar dingin kan thinlung ih nganmi ca nan si. Hih ca a ngantu cu Khrih Amah a si ih kannih hi a phurtu kan si. Cuih ca cu cati ih nganmi a si lo, a nungmi Pathian ih Thlarau in nganmi a si; lungpheng parih nganmi a si lo, milai thinlung sungih nganmi a si.
– 2 Korin 3:2-3

Bible Siar Ding: Matthai 8:14-27

Zumtu hmuahhmuah cu a nungmi cakuat kan si thluh ih mizapi ih siar thei ding le theih theimi kan si ding a thupituk. Na umnak hmuntin ah Thlarau Thianghlim tetti na phurh a ttul ih nangmah thawn a pehtlai awtu zate in nangmah cu Khrih ih palai thlah mi, leilung ih tleunak, le Khrih phuanglangtu Bible ih simmi Khristian na si ding a thupi.

Jesuh ih dungthlun pawl in an Bawipa ih simmi hmuahhmuah cu atak in an cangsuak ti an zir ngah. Jesuh in nuamnai te’n le ruat ciamciam in a tanglam thu hi a sim ti ka zum:

“Khawpi sungih nan va luh tikah tibeel in tidai a khaitu pa nan tong ding. Cu pa cu a luhnak inn tiang va thlun uh. Cule cuih inn neitu hnen ahcun “Keimah le ka dungthlun pawl Lantak Zaanriah kan einak dingah khaan khui ah so a um?” ti’n kan Sayapa in a lo ti, tiah va ti uh. Tlunta khaan ah tokham le cabuai pawl kim teih an retmi khaan tumpi a lo hmuh dingih cutawk ahcun ziang hmuahhmuah va tawlrel uh,” tiah a ti (Luke 22:10-12).

Duhdawtmi zumtu, Palestine ram ah zohman tibeel in tikhaitu an um lo, zohman ih theih dah lomi thil a si. Curuangah Jesuh in profet thusim hram a thok ih an sunglam nun lawngih theih dingmi le atak ih a ra cangsuakmi an hmuh thei ding a tummi a si. Himi cu kan Bawipa ih nun thuthup: a profet thusimmi cu cangsuak loin a um dah lo. Pathian ih Ttongkam thlengh danglamter theitu leitlun ah zohman an um lo. Jesuh in hih thuruahnak maksak cu a dungthluntu pawl hnenah a sim ih dungthluntu pawl in an Bawipa ih simmi cu atak in a cangsuak ti an hmuh theinak dingah a si. Jesuh in Peter le Johan hnenih mangbangza thupek a neih hnu le a hmuh ngah hnu ah an pahnih ih an thinlung sung thukbik in, “Zoh hnik! Kan Bawipa hi! A simmi vek cekci in thil a rak cang thluh,’ ti’n an ti awk ding cu ka rinhlelh lo a si.

Milai cun thil ziangkim kan canter thei lo, asinan Pathian hrang ahcun zianghman cang thei lo ti a um lo. Pathian cu nunnak thuthup pholang theitu a si ih leilungpi le tlolakpi khal hi A kut sungah an um thluh. Kan theih dingmi thil thupi cu: “Bawipa na Pathian cu na hnenah a um, A cahnak huham in nehnak a lo pek” (Zefa 3: 17) timi hi a si.

Jesuh cu kan hrangah a thianghlim, a cak ih leilung ih ttulmi vanlam rinhmui kan theih theinak dingah in dilsaktu a si!

@ Smith Wigglesworth

(Visited 32 times, 1 visits today)

Comments

comments

Comments

%d bloggers like this: