A Minmi Biazai – Conkiang

11935564_1009889202379185_1931301843_n

A Minmi Biazai

Kan sunsakzetmi Lairam,

Kan Seherhzetmi Laitlang,

Kan hram thluahthlomi Semnak ram,

Kan duhdawtmi kan tuallennak.

Hring dildel te’n a mawi tiah kan lo sunloih,

Thlithiang a hrang tiah kan lo cawimawi,

Par tin an mawi tiah ka lo suang.

Tu ahcun….

Na leiram le na tii-kuang pawl an cim tikah,

Na lo ram le na hmunhma pawl an min tikah,

Kan thinlung pawl khal an cim cih thluh,

Kan mitthli khal tilian in a fen cihthluh,

Lungkuai le riahsia in kan lo dom,

Thinna le ningna in kan lo pom,

Na sung in kan tlan lo ding,

Na hrangah kan um hrih ding.

Lairam……..

Na min veten kan bezai khal an min thehzo

Na cimnak hmun ah kan hla pawl khal an cim theh zo

Na ram sung ih a luangmi tiva nawi pawl thlir in

Thinsung ih a luangmi mithli tiva rualkhi

Lungkuainak langtertu an si

Riahsiatnak ai-awhtu an si

A kiakmi lilawn pawl hluan in

Kan saduhthah pawl khal an kiak theh zo.

A khingmi na neh le nang pawl hluan in

A kekmi kan hliamhma pawl na hmu ve maw

A rei tikah tuar dan a na sinsin…

A rei tikah tuarthiam a har sinsin….

Dam lai ni te kan ruahsan ko.

Hmanseh………

Nang cu kan zate’n in zawipomtu na si,

Nang cu kan zate’n in hlimtertu na si,

Nangcu kan mithmai in neihtertu na si,

Na hrangah ruahsannak kan nei hrihko

Na hrangah thazaang kan suah hrihko,

Na sung in kan tlan lo ding,

Na hrangah kan um hrih ding,

A minmi kan biazai pawl

Duhdawtnak thawn kan dawlsal ding

Ruahsannak thawn kan finkhawm sal ding.

Mithli hnul in kan taitawn in nang kan lo tungding sal ding

Bawipa hnen ih kan thukam

San deng tiang hnget sin koseh.

– Conkiang

11920420_1009889289045843_130001661_n

Comments

comments

Comments

%d bloggers like this: