A Maih Pa A That

September 2, 2012 ni hi Austrlia Fathers’ day asi. Fathers’ day laksawng ah thuanthu siar ding ka rawn thlah asi. A taktak ih a rak cang dah mi thuanthu asi.

A MAIH PA A THATTU “ MYANBARAMAR KING “ IH THUANTHU

Khuahlan laiah MYANBARAMAR timi ram pakhat a um. Cuih ram ah A maihpa a thattu siangpahrang pakhat a rak um, asinan a hmin rel cu an siang lo. Cuih KING a suah hlanah, MYANBARAMAR ram cu Siangpahrang dang pakhat in a rak uk. Cui KING cun  fanu mak danglamtak a rak nei. A fanu cu a suahthlak in sunzan peh in thla (6) sung a tap. An lem ngam thei dah lo.  An mang a bang tuk ih an polpu sangbik hnen ah an feh pi. Cule an polpu in an khua vang pathian hnenah, hi naute hi a tah rehter dingin ziangtin so kan tuah ding in sim hram aw ti’n thlacam in a dilsak. Cule An pathian (khuavang) in an polpu hnen ah hitin a sim: –

“Arcang bawi a dum tal uhla, a thla in naute zahmawh kawsung nan verh sak (hnakua verh vek in) asile a hna a ngam pei ih a tap nawn lo ding” a rak ti.

An Khuavang pathian ih a sim vek cekci in An polpu in a sim hai. Cule naute zahmawhkua cu kum khat sung, Arcang thlahmul in an verhsak. A ihthat leh rawl a ei sung lawngah a tap lo. Kum thum a kim tiang an hnen um pawlin Arhmul in an siangpahrang fanute ih zahmawhkua cu a sawng aw in a verhsak ring ring ti asi. An verhsak lole, naute cu a tap a rak ringring.

Cuih naute kum 3 a kim tikah Arhmul ih verhsak men cu a di a riam thei nawn lo ih a tap sinsin. Polpu hnenah an feh sal, cule polpu in  Zanglem fate tuahsak a duh asi hi a ti ih, an tuahsak. Cumi hmangin a tawlam buainak cu nan cinfelsak le a tap nawn lo ding a rak ti. (Aih, cu kel ih thu). An fanute Kum 5 a kim tikah  mipa thillem kha a khawp nawn lo lala. Pa cakcak ih ihpi (pawl) taktak a duh ih a ngen ngen leh lala. Catbang loih ihpi a duh ruangah Ralkap hrek khat cu an lungawituk lamah an hni zukzo rero, a thleithlak in ral kap pawl an duty ter ih a sawng aw in an ihpi zawk rero. Cu nute Kum 10 a kim tikah ralkap pawlih ihpi /pawl khal a di a riam thei nawn lo lala. Cu kel ih thu! Maktaktak a tampi lai, siar bet aw.

Cuih siangpahrang ih fanute cu ralkap pawlih ihpi a diriam thei nawn lo lala, ruangah zo hman an thlen thei dah lonak, ramngaw Tuupi sung ah a tlanhlo ih Kiosa puk ah a va thleng. Cule ramsa hmuahhmuah uk thluhtu Kiosa Lalin a nupi ah a rak hmang. A pasal Kiosa hnenah cun hna ngam le diriam ten a um. A pasal Kiosa Lal cu sunah rawl a hawl ih zanlam khaw thimzik zawngah a ramsa dehmi thawn, thawm le vang neizet in an puk ah a ra tlung theu. Cuih Kiosa thawn fapa (minung) an hring. Zanlam ah, An pa a ra tlung thawm a theih tikah an umnak puk a thuknakbik khan sungah a fapate cu, a nu in a ret theu. Puan lu khuh in a it thatter theu. A pa a hmuter duh lo, a hmuh asile a thinlung a buai ding ti a phang. Voikhat zan cu an fapa in a pa a ra tlung thawm kha a thei ih a thupten a bih, fiangten a hmu tikah a thaizingah  mizan ih ram sa tumpi hmel siazet kan inn sungah a ra mi kha ziang si a ra tuah? tiah a nu kha a sut. Cule a nu in kha mi kha panteh na pa ka lo ti theu mi cu, tiah ati. Na theih zo ruangah ka lo sim law law ding, na pa kha tih hlah, hua hlah a lo duhdawttu, a lo hring tu le a lo cawmtu asi ruangah na duhdawt ve pei, tiah a nu in, thu a sim.

A fapa te cu a mang a bangtuk thlang, ziangah ka nu nang le kei cu, milai kan si ual, na pa I ti mi kha cu, ramsa a si ual, ziangtin so khai Kiosa ramsa pi cu ka pa asi thei ding? tiah ati. Cule, A nu in, na nu ka si hi, keimah in na pa cu zo asi ti cu ka thei fiang asi, Na pa taktak asi ko, tiah ati. Cutikah an fapate cu mangbang le khawruah har in a um. Ramsa ih fapa maw ka si, tiah a thinlung a buai rero ko.

An fapate cu kum 8 a kim ihsin, a nu in a hruai ih khawsung ah a lenpi theu. Khawsung Lamzin kap ih an hlon mi ca hnah tla tete an sarih, a nu in a fapate cu ca a zirh theu ih ca siar tla a thiam thlang. Voikhat cu khawpi sungah an nufa in an leng. Cule lamzinkap ih an hlon mi News paper an sar ngah, an siar tikah cuih ram uktu an siangpahrang ih thuthannak ca a rak si ngelcel. Ka ram sungah hin  Kiosa huaisual mi deh hmang a um, minung ti lo, rannung ti lovin a deh ring ring in siatsuah tamtuk zo, tuini tiang kan that thei lo, a that theitu nan um asile ka siangpahrang tohkham ka lo kian ding a si, ti mi thuthannak ca a rak si. Cuih thu than cu an theih tikah:-

A fapate in, Cuih ramsa huaisual cun mitampi a deh zo ih a siatsuah sin sin asile hivek cu a tha lo asi. Keimah in cuih sahrang Kiosa cu ka conkiang thawn ka do pei ih ka sai that ding. Ka that ngah thei asile Siangpahrang tla ka siphah thei dingih, kan nufa hrangah a tha ding asi, a nuam tla kan nuam deuh ding, ka nu, tiah a ti. Cu le a nu in, ka fapa thu ka lo sim ding thaten ngai aw. Hi ram sa huai sual an ti mi hi, na pa sokhaw asi. Na pa cu na that thei lo ding, mah hring tu pa rori thah cu na hrangah a a tha lo sokhaw. Cubak ah na pa ih vun cu kahpa thir voithum erlet ih tuah mi a hriam ngaingai mi thalfang lawngin a sun tlang thei.  Thal menmen ih sai tlang theih asi lo, a vun a haktuk  tiah ati.  An fapate cu kum 14 a kim ve thlang, cule a pa thah nak dingah kahpa thir cu voi thum tiang a erlet hnuah Conkiang /thal hriam ngai ngai cu a tuah.

Conkiang a tuah ngah hnuah, khawpi sung ah a feh ih Siangpa hrang bawipai hnenah, “na milesa leh na ran nung pawl a lo deh sak ih a lo siat suah rerotu sahrang Kiosa cu kei mah in ka that thei ding, ka that ngah thei asile thuthannak na tuah cia mi vekin,  Na siangpahrang  tohkham cu ka lo kian tengteng ding tiah thu i tiamkam  thei pei maw? Tiah a va sut.

Cutikah Siangpahrang bawipa in ka ralkap tampi hmanin an ti ngam lo, nang vek nauhak men in ziangtin so Kiosa cu na thah thei ding, I ra hnaihnok duh hlah aw, a rak ti. Curuangah tlangval pate in I zum lo maw si? Ka thalsai thiamzia hi rak zoh hnik a ti ih, van ih a zuang lai mi vate kha siangpahrang ih mithmuh ah a sai thlak. Hi tivekin Kiosa huaisual cu a zakvar ah conkiangin ka sai dingih ka that theituk ding asi ati. Siangpa hrang in a thalsai thiamzia a hmuh tikah a rinsan thlang ih sahuai Kiosa cu na that thei ngai asi ahcun na duh vekin thu ka lo tiam kam asi. A rang theibik in va that aw, tiah ati.

Siangpahrang in tlangval pate cu a  ralkap 300 thawn sahrang Kiosa hawl dingin thu a pek ih a fehter hai. Cule tuupi sungih Kiosa umnak  an thlen tikah tlangval pate cun, Kiosa huaisual pa (a pa), ramsa ei ding tampi na nei ko,  ziangah si mi nung le rannung  na deh? Ziangah mi tampi na siatsuah, mi nun thaw lo pa ra suak aw, na ngam le ra suak aw, na thih a cu asi, Tuisun ah keimah in ka lo that  dingih na sa kan lo ei ve ding, a ti ih, a au hnawh ciamco.

A fapa ih ngiarnak aw a theih tikah Kiosa cu, a thinheng tuk ih  a ra suak ngai ngai. Amah thah a tumtu,  tlangval pate kiang a thlengih a zoh tikah amaih fapa a rak si ti kha a thei tikah a riah a sia ngai ngai. Ka fapa cu ka ral ah a cang zo asi hi a ti ih, a hoha le a tinsau hriam pipi tla a suah ih a huk a hrum , hro a suangih a fapa cu deh tumtaktak vekin a ngiar ve.  Asinan a duhdawt mi a fapa a thih ding cu a siang taktak lo ruangah a deh duh lo. A fapa khalin a nu ih thusim mi a vun mang salih a pa thal ih vun saithat ngai ngai ding cu har a ti. An ngiar aw rero men, an that aw taktak duh lo. Tawkfang a rei in Kiosa kha a tlan hlo.

Ralkap 300 rual cun tlangval pate cu Siangpahrang inn ah an tlunpi ih, hipa hin Kiosa cu a that tum taktak lo asi, an ti. Siangpahrang in a sut tikah a vun a nem nak a zakvar saifuh ka tum ih a remcang thei lo ruangah asi tiin a let. Cuti asile thaisun ah va beisal aw ati. Ralkap fei le nam keng 300 thawn an va feh lala ih Kiosa cu an va ngiar sal. Kiosa le tlangval cu an ngiar aw lala. Kiosa khal a thin a hengtuk nan a fapa thah cu a siang taktak lo ih, a fapa khalin ka pa ka thah le ka nu a thin a naa tuk ding ti a ruat phah ruangah a thinlung a buai. Curuangah  thal in sai remcannak a hmuh khal le  a sai duh lo, tawkfang nawn an ngiar awk hnu ah Kiosa cu a tlanhlo leh sal. Hi hi a voi hnihnak asi.

Tlangval pate cu Siangpahrang hnenah ah hruai leh sal ih, ralkap pawlin hi tlang val pa hin sahrang Kiosa hi a that duh taktak lo asi in kan hmu tiah an report. Cuih thu a theih tikah an Siangpahrang  bawipa cu a thin a hengtuk ih tlangval pate hnenah, “ a that duh taktak lo asi an lo ti” ziang ruangah kei le ka ralkap hi zat hi, in ra hnaihnok? Thaisun ah nan va hawl sal pei ih na that duh lo ih Kiosa na tlan hloter leh sal asile ka ralkap pawlin na hngawng an lo tan ding, na sa khal an lo candarh thluh pei ih hramlak vate rawl ah lo tuah hai seh, tiah ati.

A fapa in a pa a that:

Siangpahrang ih thupek vekin tlangval pate le ralkap 300 cu a thaisun ah tuupi sungah an feh lala ih sasual Kiosa cu that dingin an va hawl sal. Kiosa sual umnak an thlen in tlangval pate cun mi deh hmang minung sa ei, mi nun thaw lo pa, mi nunnak siatsuah thluhtu sasual Kiosa, ra suak aw  tuisun cu  lo that taktak thlang dingin ka ra asi.  Na ngam ngai asile ra suak sal aw,  minung le ramsa na deh ih na ei vekin  na sa kan lo ei ve thlang ding, ra suak aw a tu ah,  a ti ih, a va hro  ciamco. Kiosa sual khal cun cu lawm man cu, ka fa khal siseh la, ka dim nawn lo pei, ka deh lo asile amah in thah i tum taktak asi hi, ka deh ve mai ding ti’n thu thencatnak a rak tuah fel ve ih a aw neih hmuahhmuah suah in a paw a kiau a huk a rak phah in a fapa cu deh ding in a va pan ve pan lo maw. An ton-awk  ve ten thungai thlak in an bei aw thlang. Kiosa in a fapa cu deh dingin a zon hnawh ciamco, tlunvan ih a khir laifang ah a fapa in a conkiang hriam ngaingai in Kiosa ih zakvar (a vun nonak) fangah a sai ngah. Sahrang Kiosa cu a fapa parah a ning a naa tuk nan a fapa a duhdawttuk ruangah kei cu ka tar zo, ka fapa cu a no lai, ka fapa a thih hnakin kei mah ka thih le a tha sawn ko ding timi zawnruahnak a nei sal ruangah tlansan men loin a zakih thalfang a lut hnu khalah a khir a dop, hro a suangih tual a cai ciamco. Curuangah a zakih thalfang a phun aw mi cu leiah a sawh ngah phah phah ih a pil thuk sinsin, thalin a lung a sun ngah tikah Kiosa cu a thi ta pan lo maw..

A pa thattu siangpahrang ah a cang:

Mid eh hmang Sahrang Kiosa huaisual cu, kum 14 asi mi tlangval pate in a that ngah zo asi ti thuthang sim than dingin ralkap pakhat cu ralbawi pa in siangpa hrang hnenah zamrang zetin a thlah. Cuih thuthang tha an theih tikah Siangpa hrang bawi pa cu a lung a awi tuk ih, mipi pawl a ko khawm ih cuih tlangval pate hmuak dingin leh sunlawih upatnak pek dingin puai ropitak a tuahter.

Cule Siangpahrang in  mipi hmaiah thu a sim tikah Thuthannak ka rak tuah zo vekin  tlangval pa hnen khalah thu tiamkamnak ka tuah zo asi. Kan ram mipi le kan rannung pawl deh ih siatsuahtu sahrang Kiosa rallian lak ihsin in runhim theitu hi tlangval pa hi, Ka siangpa hrang  tohkham kian dingah ka lung a kim asi ti thu a sim. Ka ram sungah hi vek mi raltha le mi rinsantlak mino kan nei hi kan himnak asi ruangah sunlawih upatnak pek tlak rori asi ti thu khal a sim. Asinan kan ram dan vekin kum 17 a kim hrih hlan sung cu Siangpahrang hnatuan dan training pek asi hrih ding. Kum 17 a kim veten amah hi kan siangpahrang thar a si ding asi, tiah ati.

Kum thum a rei hnuah, Tlangval pate cu kum 17 a kim tikah an siangpahrang bawi pa in a lal tohkham a kian ih a ropitnak a lal lukhum khal a khumter. Cuih ni ihsin Tuupi sung lungpuk sungih a rak um theu mi Kiosa cithlah amaih pa thattu tlangval pate cu MYANBARAMAR ram uktu siangpahrang thar ah a cang. Kioasa hman a neh theitu uktu siangpahrang thar kan nei an ti ih, MYANBARAMAR ram mipi pawl cun an siangpahrang thar cu an rinsan in an lawm ngai ngai.

Pa thattu Siangpahrang thar a ngawr:

Asinan an Siangpahrang thar tlangval pa cu, Siangpahrang  tohkham a luah ni ihsin a tha a zawng, a rawl ei kaa  a thaw thei nawn lo, zan ah ihhmu thawten a itthat thei lo, a thinlung a buai ih rawl thaw thaw sii thatha an pek khal le dam thatlam a pan thei dah lo. Cuticun siangpahrang asi hnu kum 15 sung khumbet in a na ngawr ringring. Cutiih a ngawr ringring ruangah siang pahrang asi nan Nun hnangamnak hrim hrim a nei lo, thinphang le cautak in tawlcar duah do in a um ring ring.  Zankhat cu a itthat laiah a mangah Lasi fala in thu a rak sim. Na dam thei lonak, na ngawr nak san hi, na tuah lo ding mi thil tha lo tak, rak tuah dah mi na neih ruangah asi. Awlte ih tidam theih na asi lo, dam le hnangamte ih um na duh asile nan puithiam sangbik  (pol pu)  hmangin I rak sut awla fiang ten ka lo sim ding,  ti’n Lasi fala in, a rak ti.

A thaizingah cun a tho ih, zan a mang ih a theih mi thu kha a vun ruat, cule a tlang suak upa pawl a sim. Siangpahrang thar cu dam a duhtuk ruangah an Pol pu cu a ko.  Ka dam theinak dingah ziang ha kan tuah ding, kan Khawzing (an pathian) hnen ah I sutsak aw ati. Cule an Pol pu cun an khawzing hnenah kan siangpahrang a dam theinak dingah ziang so kan tuah a tul? Zangfahten a natnak san le a thawidam dan ding in sim hram aw, ti’n Pol pu cun thla a camsak.

Siangpahrang a ngawrnak san an sim:

An khawzing in Pol pu hnenah, a sim mi cu – nan siangpahrang a ngawr a natnak san cu, a pa a thah ruangah asi. A pa cu minung asi lo, Kiosa Lalpa asi. A pa a riah a rak siatertuk ruangah ka fapa in I thei seh ti a duh ruangah a pai thlarau in a natter mi asi, ati. A pai thlarau a lung a awiter asile a dam ding, a pai thlarau a lung a awiter lo asile a dam thei nawn lo ding a rak ti. Cule an Pol pu cun siangpa hrang bawipa na natnak san le na dam theinak ding cu kan khawzing in I sim ko nan, ka lo sim asile ka parah na thinheng pang ding ka duh ve lo ruang ah  ka lo sim ngam lo pei tiah ati. Cule In sim ko aw, ziangvek thu asi khal len na parah ka thin a heng lo ding, ka damnak ding asi ahcun  tuah dingin kan khaw zing in na hnen ih a lo sim, a lo fial mi pohpoh cu ka tuah thluh ko ding, tiah thu ka lo kam asi tiah siangpahrang bawipa in ati.

Cule Pol pu in Cuti ih ka parah na thin a heng lo ding asile ka lo sim ding ati. Kan khawzing pathian ih in sim dan vek asile na pa hi minung a si lo ti aw? ati. Aw, a dik. Cuih na pa cu nangmah in na that asi maw? ati. Cule siangpahrang  khal cun a pheh ngam ve lo.  Aw asi ko, a hlan ih minung le rannung deh hmang ram sung tibuaitu sahrang Kiosa Lalpa ka thah mi kha ka pa a si ko tiah a sim. A sir-awk thu khal a phuang aw. An  Pol pu in a simsal mi cu, na pai thlarau hi na parah tuisun ni tiang a ning a hang, a riah na siattertuk ruangah na pai thlarau in a lo natter a si. Dam na duh asile na pai thlarau na ti lungawi hmaisa a tul a si, tiah a sim. Cu cu na damnak ding lamzin umsun asi, tiah ati.

Siangpahrang in a pai thlarau ngaihdam a dil:

Cutivekin Kum 15 sung A ngawr a na ringring mi MYANBARAMAR  ram Siangpa hrang  cu an Pol pu ih thusim mi a theih tikah a nu ih thu a rak sim dahmi kha a vun mang. Oi maw, Ka nu ih thu I rak sim mi kha awih loin, mi dang zo hmanin in thei dah cuang lo ding pam timi ruahnak siavatak nei in ka pa (Kiosa Lal) k a rak that kha, keimaih hrangah thil tha lo tak ka rak tuah asi hi maw, ti a vun theisuak aw ruangro. Cutikah a thin lung kekkuai in a sir awk thu, Puithiam hnenah asim. Cule an Puithiam in Siangpahrang bawipa na thinphang duh hlah, na pai thlarau ti lung awi dan ding khal kan khawzingin in sim zo sokhaw, ati. Ziangtin? Na pa, Kiosa ih zuklem (zuktuh) tumpi (2) in na tuah pei ih, kan biak inn (pagoda) hmai ah,  Ni  suahnak  lam hawi in pakhat na ret pei ih, a dang pakhat kha Ni tlaknak lam hawi in na ret ding, cuti ih na tuah asile na pa na rak thah laiih a diremtu mipi pawl khal in pagoda an feh tinten na pa ih zuklem cu tihzah upatnak an pek ding. Cutiih na tuah asile na pai thlarau cu na parah a lung a awi sal dingih na dam mai ding asi, tiah an polpu in a ti.

An polpu (Puithiam) in a sim vekin a pai zuklem tumpi (2) tuah ding cu  a lung a kim ih Siangpahrang cun a ram sungih kut themthiam pawl a ko, zamrang ten a pa (Kiosa Lalpa) ih zuklem cu atuahter. An tuah theh veten an pagoda (biak inn) hmai ah, Ni suah nak lam hawi in pakhat, Ni tlaknak lam hawiin pakhat an ret. A pa Kiosa an thah lai ih a diremtu a cam a riamtu mipi pawlin a tuah cun pagoda an feh tinten cuih Kiosa zuklempi cu tihzah upatnak an pek ciamco thlang. Cutiih an tuah hnuah cun a pa (Kiosa) ih thla rau cu a fapa parah a lung a awi sal ih ruangah a fapa ih ngawr natnak hmuah hmuah tla a dam tha lel lel sal.  Cuihhlei ah Kiosa cithlah MYANBARAMAR ram siangpahrang  ngawr cu a pa ih thlarau in mal a sawm sal ih Siangpahrang caktak le ropitak ah a cang pan lo maw.

Miphun hrekkhat leh Sakhua biaknak hrekhat pawlin Kiosa zuklem an ngaisang   em em ih Pagoda  hmaiah an ret theunak san hi, Hi mi siangpahrang pa ih san ihsin an rak thawk mi asi an ti. Hi MYANBARAMAR ram KING ih nun ram ah a rak thleng dah mi thil pawl hi, Buddhist pawl cun an Pathian ropit sunlawinak dingah leh an miphun cawisannak dingah an khawzingin huham a langternak  thilmak ropitak  asi tin an pom tlat asi.Cuihhleiah Nulepa riahsiatnak tuah hi, thil tha lo tak malsawm dawn lonak, farahnak, nat sia ih natnak ngawrnak, santawinak, sal ih tannak  asi ti’n   milem biaknak  sakhua betu pawl a tam sawn in an zum hnget asi.

An nu leh pa, tihzah upatnak an peknak san :

MYANBARAMAR pawl cun an nu le pa kha, mit hmuh theih kan pathian an si ti in an ruat thluh ih an pathian tlukin an tihzah ngai ngai asi. Buddhist sakhua a betu pawl cun  nu le pa tihzah upat ding leh , an riah  siatnak tuah lo ding hi an sakhua thurin tluk ih an ngai poimawh zet mi asi. Nu le pa an riah kan siatter asile kan santawi ding, kan naa ngawr ding, fate tha kan hring thei lo ding, kan farah ding bakah kan thih tikah uico,sihte le vok..tvk ah dinkhmun siatak ah kan suak sal ding, ti hi an zum dan asi.  Curuang ah Kawl, Kala le milem a bia mi miphun dang pawl khal hin an nulepa riahsia ter tu si an duh lo,  a lungawi tertu si ding le an malsawm dawng ngahtu si ding hi an zuam awk bik mi asi. Nu le pa riahsiater tu pawl cu pathian camsiatnak an tuar ih an hmui ngil thei lo, an nun lam a tluang thei lo an ti. Milem bia Kawl le Kala pawl hin an nu le pa an tihzah in an upat thiam ngaingai.  Lai mi Kristian pawlin kan tluk lo nasa a bang.Kan zir a tul ding mi a si hi.

Nu riahsiater khal an tih:

Kalay myone ah Kawl nuhmei mi lian tak pakhat a um ih fapa tlangval pakhat te a nei. A fapa cu kum 24 hrawng asi, hmel thatak fimzet ca thiam le mi feltak asi. A nu cu a tar zo, A fapa in Lo kaupi a tuah ih a nu cu a cawm, an lian ngai ngai. A nu in Chin fala hrim hrim na leng lo pei, an lo bum ding tin thu a sim theu.

Voikhat cu a fapa kha a rualpi pawlin an sawmtuk ruangah Chin fala an leng, cuih Chin fala khal  cu a hmel a tha a mawi tuk ve mi asi. An hmuh-awk veten an mit fang a tong aw, an uar aw ih a duh aw hngal. Cuih thu cu a nu in a theih tikah a fapa a mah cawm tu rori cu a ko ih a hmaiah a toter. Ziangruangah Chin fala na leng lo pei ti’n thu ka lo sim mi na thlun duh lo?  Ka riah I siatertuk asi. Curuang ah  Na suahnak ka taw ka lo hmuh ding maw, Caw sawr fung parh theh ko in ka lo thawi ding ha, na duh duh hril aw, ati. Kawl dan ahcun a nu in thinhengin a fate a zah mawh a hmuh hrim asile a camsia tinak asi.

A fapa kum 24 mi cun, ka nu na parah thil ka ti sual ti ka thei asi, zangfahten I ngaidam maw. Caw sawr fungin na duhtawkin I thawi sawn aw, ati ih zangfah a dil ciamco. A nu in a fapa ih zaang cu thidup lang theh ko a thawi, a fapa cun a nu kha kamkhatte hman a sawn ngam lo, a tuar cuahco men.

In zirh duh mi:

Hi thuanthu ih in zirh duh mi cu kan nu le pa in kan hrangih  thutha an thiamtawkte ih in sim mi hi zianghman ah siar loin, kan maih duh dan dan ih kan um asile kan nu le pa an riah kan siater thei asi. Nu le pa riahsiatter cu hi thuanthu ih kan hmuh zo vekin hmuingil lonak, nun khaw ong ton lonak, hlawh tlin thei lonak, natsia in ngawrnak, santawinak asi tiah, miphun u hnampi pawlin an zum ih an nu le pa tihzah upatzet in an um. Cutivekih nun cu malsawm dawn nak asi ti thu in zirh duh mi asi. Nulepa lungawitertu si tum cio uh si.

Writen by KT Sui Lian, Melbourne           29.08.12

Rihli Group

(Visited 258 times, 1 visits today)

Comments

comments

One Comment

  1. Lungawi um zet, cahram tha zet a si. Kan lai mi hin nu le pa’i duhdawtnak kan theithiam lo zet ih an siatnak lawng te kan hmu theu – kan duh mi tuah ngah lo ruangah a poi ngaingai. Cawn thlak nun rori a si. Kan Bible khal ih in zirh mi a si ko.

Comments

%d bloggers like this: