A Lo Damtertu Bawipa Ka Si

March 15
Tlawngkai Nili

A Lo Damtertu Bawipa Ka Si

Nan lakah a naami nan um maw? Nan um asile kawhhran upa ko sehla Bawipa ih hmin in hriak an hnih dingih thla an cam sak ding. Zumnak thawn thlacamnak in minaa cu a damter ding. Bawipa in harhdamnak a pek saal ding.
– James 5:14-15

Bible Siar Ding: James 5:7-20

Hih a mankhungmi Pathian Ttongkam sungah minaa damternak thutak ih hramthlaknak thudik kan nei. A tlunlam ih tarlangmi Bible sungah Pathian in minaa damternak thu thawn pehpar aw in thuzirhnak felfai in sim. Na dam lo asile Pastor le kawhhran upa kawh ding cu nangmah ih ttuanvo a si ih annih ih ttuanvo cu hriak hnih in zumnak thawn thlacam ding a si. Cuti’n ziangtinkim cu Bawipa ih kut sungah tthum ttheh ding a si. Hriak hnih le thlacam sak na si tikah Bawipa in i damter rori ding a si ti’n thinlung zate’n hngatsan ding na si. Cumi cu Pathian Thu ih in simmi a si.

Zumtu kan zate’n tuni ah kawhhran in hih hnattuan sunglawi hi tlamtling te’n a ttuan suak thei lo ti cu kan hmu in kan thei thluh cio ko ding ka zum. Zumtu pawl in hih thuzirhnak ihsin hlatpi ah lam an pial asile ttihnungza hmun ah an um ding. Hih thuzirhnak an el asile sim theih lomi sunralnak an tong ding. Mitampi cu Siangpahrang Asa bangin Bawipa hnen ihsin an pial. “Asa cu Judah siangpahrang a ttuannak kum 39 kum ah a ke ah besiazet in hmasia a tuar. Asinain Pathian rinsan loin siibawi pawl a rinsan sawn. Siangpahrang a ttuannak kum 41 kum ah a thi” (2 San. 16:12-13).

James Cakuat ih simzirhmi vekin a thlun ih harhdamnak ding hrangah Bawipa ih mit-hmai a hawltu pawl hi Bawipa in an ttulnak a famkimter pei maw? A pantu zate zikzik cu an duhmi kimter an si. An hrangah a tthabik in a kaihruai ringring a si.

Minu pakhat cu kan pumkhawmnak hmun pakhat ah besiazet in a ra thleng. A kut le a baan hmuahhmuah cu tur (poision) in a khat thluh zo ih a thiisen zate khal tur in a hnaihnok thluh zo, ih thi ding dinhmun rori ah a thleng. Pathian hnenah thlacamnak ka neih sak ih a thaizing ahcun mizaan cu dai te’n ka itthat thei, thla hnih sung rori ka tuarmi a si ti’n tettikhannak a nei. Pathian cu thangtthat in umsin ko seh! Pathian in mangbangza minaa damternak cu pehzom in a tuah rero ti na hmu thei ding.

Pathian in damternak thuah hnih a tuah, ziangahtile sual cu natnak kan tuarnak ih thuhrampi a si bangin, Pathian Ttongkam in James 5:15 sungah, “Bawipa in damnak a pek saal dingih sualnak a tuahmi khal a ngaidam ding” a ti.

Pathian Thutak na tlansan asile Satan in caan ttha a la ding.

@ Smith Wigglesworth

(Visited 25 times, 1 visits today)

Comments

comments

Comments

%d bloggers like this: