A lianzetmi Kan Bawi A Ra

Siar: Joshua 7:16-22

Sikhalsehla Pathian hnenah kan sualnak kan phuan ahcun zumtlak le a dingmi a si ruangah kan sualnak in ngaidam dingih kan mawhnak hmuahhmuah a thiangfaiter ding. – 1 Johan 1:9

Kumkhat Sung Baibal:   –      Jonah 1-2,   –      Thufim 24:1-12

Computer sungih lehnak tampi cu Boss key timi thawn an ra. Hnattuan ding na si nain hnattuan loin na lek a si ahcun na lek laifangah boss a ra dingih boss key na hmet lohli le na tuah rerolaimi kha thup in computer parih a langmi cu a thlengh aw ding.

Thil sual kan tuahmi midang in thei lo dingin thup ding zuam rero hi minung daan a si. Ka sual a si ti’n ka thei aw ko. Asinain ka sual ti awk hnakin sual lo vekin ttuanvo hrial duhnak thinlung hi kan sualnak hnakin a cak sawn ttheu.

Akhan in sui le ngun a fir ih a thlaam sungah a thup (Joshua 7:20-21). Raal an sung tikah Pathian in Joshua hnenah raal nan sungnak hi raalbuk sungah sualnak nan tuah ruangah a si (c. 11-12) ti’n a sim. Akhan in a sual a phuang nain an innsang in thah an si thotho (c. 25).

Pathian in Akhan ih sual a phuan sannak cu a minung pawl thianhlimnak le a thungai an ttulzia a zirh hngaimi (Suah. 20.27) a si.

Thu na ngai lo a si ahcun tu hi na thup awknak sungin ra suak ding caan a si. Pathian in duhdawtnak thawn a lo ko ih a thianhlimnak, ngaidamnak le nun tundin saalnak a lo pek.

Bawipa na hnen ra dingin i bawm aw,

Ka sualnak ka thup tikah;

Sual phuang ngamnak thazaang i pek aw,

Cuticun ka lung ka thiangfaiter thei ding.

Sual phuannak cu ngaidamnak sangka onnak tawhfung a si.

(Visited 26 times, 1 visits today)

Comments

comments

Comments

%d bloggers like this: