A liamcia mi mitthli, hnulsal ka tum nawn lo theu nan….

A liamcia mi mitthli, hnulsal ka tum nawn lo theu nan….

By: Hniangsinpa

Ka hrangah thihnak darkhing a awn hrih lo ih, thlanlai ding khalin mino pawl an suah a cuu hrih lo, ka tuakpar in ka lu i bawhkhat ttheh nan, ka lungthin cun kum tam ka sinak a hngilh hrim ttheu. Ka kiangkap tlanlen dan ka zirih, ka theih ban ih tong a um ahcun, ka hrang pawimawh a um pangah tiin ka hna ka sawng theu. Hmansehla, ka zan ih a thaw thei lo ih, ka kuak fawh khalin thawtnak an neih lo can a tam thlang.

Kawlrawn khawpi tuk silo ah ka thlengih, mikhual tita fam cu rawlei sawmtu ka nei ve theu. Innsang pakhat, sungkaw hlunghlai zet cu an si lo. Hmansehla, in duhsaknak ka theithiam ih, rawlei in sawmnak khal eelsianglo cun a tik cu ah ka thleng. Inntek pa bik cun, rawl ei phahih, tihaang sa hluk durdo phah ih, “Hniangsinpa, ziangah tu ni tiang nupi lam na thinlungah na ret lo?” tiah, capoh thungai zet vek khin in sut. Sawn lohli dan ding ka thiam lo, ka sim lo asile, a ngaih a that loh ka phang lala fawn. Khuh suak lo ngaingai in, veihnih hrawng cu ka dang ka vun thian fai ih, cu mi hnu ah, “Duhmi colo cu kan si hi” tiah bul zet le tawi zet in ka sawn.

Rawl kan khawp ih, kuak ka fawp ti a theih ti ah, an kuak bawm kum hra lenglo lai an hman zo mi a si ding, cumi tisa cu in hun ih, cumi phah in, rawlei khawh thunuam relnak kan thok cu a si mai. Kuak cu ka cun zualih, ka duhthusam in ka zuuk ih, a khu ka duhnak hmun pohpoh ka suah hnu ah, ka thuthmun cu remtha in, “Nangteh na tlangval laiih, na duhbikmi thawn maw kut nan sih?” tiah ka inntek pa cu, tongkam kaunak ka vun nei. A kuhva ti hmuam phah, fiang tuk lemlo in, “Uah uhm aw aw” a tiih, ka theithiam ko nan, theithiam lo vek in, “Na kuhva ti va phui ta awla ti ih capoh phah cun, kei khal in ka kuat cu duher in ka zuk sal.

A rung lut sal ih, cumi hnu ah, “Si ko, tisehla, si ciah lo” a ti phah in, coka lam ih nubik tasa awm rero lam cu a hei zoh, ka theihthiam sak ruangah, “Inntek nu, hi rawl ei mi nan sawm ta belbel ih, a kim ciah lo a bang, nan pa lawngin kuhva a keuih, mikhual lehlam kan ka a lawng e” ti phah in, kuhva lei ding in ka hei fial hrim. Inntek nu a suak ngah fang maw tiah, “Si lo, ka duhmi cu ka co ngah ve ce lo e, ngah hi a rak har e, hngilh ngaingai an har fawn, tuar cuahco hi a si ko, nang khal, nei thlang men aw, na siiraw zik lo” tiah in ti. Ka bawp thak lemlo cu thak vekin ka kheuhaw ter hrim ih, ka thinlung ahcun ‘Lamlam, amah in a neih hlan sung cu ka lawng ding’ tiin a ruat thotho!

Thunuam tawkfang kan rel hnu ahcun, thlen inn lam pan in ka tin. Meisa mih caan a um ruangah, ihnak lam cu ka tuah ih, lukham le puan in pek mi pawl ka rem ih, kuak pakhat ka zual man hrawng ding tiah, meisa cu a mit ngaingai. Khua a hlum ih, ihthah a har fawn ih, inn lenglamah ka kuat bawm thawn ka suak ih, an hmuancar ih Vok inn kiang, Kuhkuh hnuaiah tohkham niam thawn ka va to. Rawl ei in sawmtu, inntek pa ih tongkam cu hiarnak nei lo le, ruah harsa ti cing khal in biak ding dang um fawn lo cu ka ruat lo thei fawn lo.

Kan tawnawk hmaisak bik caan khal, ka thinlung mitthlam ah a fiang tuk lai, a lamzin tiang khalin palh ding um lo in ka thei lai. Be ngam lo ih a kum ih kum ka um lai can khal in mual in liam san lamlam hrih lo. Kan biakawk hmaisabik ih a tongkam hman mi khal a ka ruahnakah a cambang ringring ko. A rualnu hnenih ka sim ih, a rualnu in a rak theih hawiih, midang i biaksak lai khal ka mang, ka hnih lamlam a suak. Ka duhtuk ruangih, a hmaiih thinsia le mi nunrawng bangih ka cangvaih lai can khal ka thei lai ko. A reh thei lo a si bik lo. Mipa in nunau kan duhtuk ruangah khin, be ngam ngai le anmah kan sim ngam ngai lo ruanga, thinsia le nunrawng si kan hlawh can a va tam so!

Duhnak mitin in hmuh lo lai ahcun kan zoh ngam nan, in vun zoh ve tikah, kan duhtuknak ruang sawn ah, thinheng zoh ih rak zoh khi kan bang can a va rak tam awm so! tiah Korea zuknung ka zoh ihsin ka thei suak… ha ha ha… ka tlangval no lai can sisehla cu maw… tiah ka ruatih, keimah ten ka hni rero. Zan a rel le rei lo ka thei lo ih, kuak ziangzat ka fawp zo ti khal ka theiaw lo. Ka thlen inntek nu in, “Hniangsinpa, na thuruah a va nuam aw so… maw a hlum tuk ih na itthat thei lo saw?” in run ti cu, ka nazi ka vun zoh ih, a rak siim zet thlang ngai!

Ih ka tum ih, ka ihnak hmunah ka taksa cu a um nan, ka ruahnak cu hmundang ah a um. Ka tlawngkai pi pawl kha hmu khawm thei sal sehla, a umnak sut hlam in, veikhat tal hmuh sal ka va hiar so! Hi ka putar mit mal cuahco thlang mit a siin ngaingai hlanah, kan cunghlum khuanu khal in zahngai in, in hmuh ter leh ceek kei cu tiah ka hnemaw nan, ka zum ngam ngaingai fawn lo. “Ka lo duh” i tini kha, ka Rundamtu aw ka theih ih ka lungawi ti lo ahcun, kha tluk ih lungawi cu hi ka lei hna hin a thei thei nawn pei maw? A mawinak ka theithiam lo ih, a aanka thlum khal ka thei thiam lo, a ziangmi bik in i zeel ti khal ka hrang theih har ngaingai a si fawn.

Tuini tiang lawmmam ih ka lungthin i neh tu hi, liam ko seh ti ka tum nan, a liam lo, a thar sinsin… nang lo cun maw, ka hi leidam man hin sullam a nei ding maw si? tiah karuat aw nan, ka zaangfah aw deuh sawn lamlam fawn. Hmansela, nikhat ni ni ahcun ka tawng ko ding, a tar thih hlanah, a kut nem niakni kai in ka um leh ko ding tiih ka ruah cun, zing khawvaang ding, vate aihram cun ka mit i meng ter ih, itthat lo ih ka thuruah mi khan rahtha a suah ko ding tiin ka tho ih, thawhhlam ei ding in, ka thlennak khawpi tuk lo kiangih, malte khawpi sawnah thawhhlam ei ding cun ka pok suak ih, ka ruahnak cu ni hung tlang suak cun a suahpi ih, ka tlawnnak san tuah ding cun ka dinhmun ka sawh hnget sawn.

(Visited 127 times, 1 visits today)

Comments

comments

4 Comments

  1. Ngan thiam thei nasa.
    Siar nuam zet si.

    Hniangsinpa ka pu.

  2. Siangte Senhri says:

    Dear Hniangsinpa,

    Na nunthuleng pawl hi siar an nuam thei nasa.

  3. Hmuan carpa na lungleng deuh a si hi.

    Hnemtu ka run thlah ding maw.
    Na cangan siar nuam ka ti ringring.
    Ka rak siar zet.

    Na tha ti aw.

  4. Na hniang sinsin ding so khaw.
    Siar nuam ee.

Comments

%d bloggers like this: