A Kawimi Inn

March 21

Zarhte Ni

A Kawimi Inn

 Siar: Thuphuan 3:14-20

 Ka duhdawt mi pawl cu ka ko in ka hrem a si. Curuangah taimak suah in um awla na sualnak sir aw.    – Thuphuan 3:19

Kumkhat Sung Baibal:          Joshua 7-9          Luka 1:21-38

Robert Klose cu kum 100 a tarmi a inn ih a ra ceer tikah a awn thawmvang cu a menmen lo. Lettama pa in a inn cu a kawi tiah a sim. Klose in, “Zial, siling, a khuh canphio, sangka te le tukvirh thing pawl ah a kawi ti cu ka hmu thei ko. Zial parah bawlung thlak awla khuilam ah a ril ding” tiah a ti. Kum hleisarih hnu khal ah cuih inn cu a hnget lai ih a neitu pa cun a sung um a zongsang vingvo ih a duh sinsin.

           Thuphuan sungah Jesuh in thlaraulam ih kawinak a zongsangmi kawhhran cu  dai lawlaw asilole saa lawlaw loin a um ruangah a kawk. Laodecea cu khawpi lian pakhat a si. Asinan cumi lennak in zianghman kan ttul lo ti ruah awk sualnak a canter. Himi in an kawhhran nunphung ah Jesuh kan ttul lo ti phun in thlaraulam zinkawi ah an feh. Curuangah Jesuh in, “Dai le dai lo, sa le sa lo…mi zonzai le zaangfakza nan sizia nan thei aw lo,” (Thup.3:16-17) tiah a kawk hngai. A duhdawt ruangah a kawk hngai ih anmah thawn thuksin ih pawlkomk awknak neih ding a duh. Curuangah an sir awk theinak dingah tikcu a pek hngai (c.19).

           Mah le mah rin awktuk ruangah Jesuh thawn nan pawlkomnak a kawiter a si  ahcun  sir awknak le a thar in neel awzet ih pawlkom awk  saalnak in na dingter saal thei.

                                                                                      Leilung thawn a si lo Pathian thawn,

Nuamzet ih pawlkomnak cu;

Tangdornak thawn Amah ih Ttong,

Zumtu thawn pawlkomnak a si.

 Sir awknak cu Pathian in a kawimi a dingternak a si.

Comments

comments

Comments

%d bloggers like this: