A Hnin Lo Part (1)

A Hnin Lo (Nunthuleng)

Salai Mazawn

Kum 17 ka ti ve thlangih Phun 10 Exam tuah thluh in Jun thla ah Bible tlawng kai ding in Yangon lam pan in Chin Tawngtan cetleng (bus) to in ka suk. Kum 1nk tluangten ka ṭheh suak thei. Kum 2nk ka tlawngkainak Insein ah ka ṭhawn sal. Vei khat cu ka rualpa tei tlawng BK vengah va leng ding in ka feh. K rualpa tei tlawngah cun Phun 4 le 9-10 tlawng ka rak kaipi dah neltuk lo mi Kilte ka va hmu dukdi. Hni siamsiten anka nem zetin “na dam maw?” Ti phah in i cibai. Rualpipawl hlunpawl khal an rak um celcel. Kilte cu ka kiangah a to ih tlawngkai lai thupawl titi phah in kan capoh aw celcel hai ih kan rualpipawl thawn kan nuam tlang zet. Zanlam dar 5:30 kim zik cuarco thlang ruangah kan tlawng lam pan cu cetleng (Bus) ka bawh. Kilte cun cetleng bawlhnak tiang i rung thlah. 202 cetleng (Bus) cu a a ra luailo ih Bye Bye ti aw veve phah in ka lo leng sal ding ka vun ti ih cetleng (Bus) sungah cun ka lut. Kilte cun a lusu phah in a kut i run zap ih i run zoh liam cuahco. A zan cu sunih ka thiltawn mi Kilte ih i biakdanpawl in khua i ruatter na sa ih ihkhun parah caldawm nguaingo cun ka zau. Ka mitthlam ah Kilte lawnglawng a lang rero.

Nithum rei hnuah tikcu um lo zet cingin Kilte leng sal ding in an tlawng ah ka va feh lala. Kilte cun hla ral in i rak hmuih, in hmuh veten a ra tlang ciamco ih i rak hmuak. Awka nemten na bang maw ti phah in a Titsu a phorh ih ka hmaiih thlan fawr cu i hnual sak. Tlawng kan thlenin tidai dai kiahkote i va lak ih i inter. Rualpi dangpawl in in ra pan celcel. Minute 30 lawng can ka neih ruangah ka bang a reh in tlung sal ka tum. Tidai in sal ding vekin ka feh ih ningzak phah in Kilte hnenah tu zarhte cu khawsung kan vak pei cu na duhduhnak ah ka lo fehhpi ding tin dim thetho ten ka hmurphun hup phah in ka vun sim. Ka hmai sen tulto vek in ka thei aw. Kilte khal cun a lusut phah in 11 ti lawng in i sawn. Zianglam dar 11 ah ka tlawng kiang cetleng (Bus) cawlhnak ah ka lo hngak ding tin a kut in i sim. Ka lungawi dan cu um ngaihnak khal ka thei lo. Khaw dang ka tang khukhro. Phuahhlam ah ka rualpa ke cu ka va sit. Ka rualpa Luaite cun ziang thei cuang lo in i ra thlun ih cetleng bawhnak tiang i ra thlah. Van ṭhat ah cetleng 202 a ra thleng ih kan tlawng lam pan in ka to. Ka lungtur a rang ciamco. Nunau in biatu hmuahhmuah le ka tawnmi ah hi vekih nunau ka hmu dah lo. A awka nem dan le a mi cukha thiam dah hi aw tin lamzin tluan in Kilte ih i cukha dan cu ka ruat phah vivo. Kilte cu ka thinlung ah a cam deuhdeuh. Ka thu ruahnak ah cetleng (Bus) ka ṭumnak ding ka rak thihhngil. Cetleng (Bus) cawlhnak pahnih lai ka rak lan verver hi a rak si.

Tlawng ka thleng sal cun rualpipawl in rawl in rak ei san thluh zo. Tlawng ti fam cu zanlam khawmawk cu lala. A zan keimai Chairman a si lailai. Hmai lam ah cun ka to ṭheuṭheu nan thinlung cu Kilte hnen lawnglawng ah um. Ka sung muril i fan cu a si bik. Ka sa hiamhiam, ka thinlung sung muril rori ih duhnak ra suak mi hi a vei khatnak a si. Fala nei dah lo ti fam cu ziangtin cukha ding, ziangtin ka ngiar ding ti khal ka thei lo ih amah sawn in in cukha deuh le ka ningvek a zak si, ka hmul tho surso vek in ka thei aw, duh le ka duh fawn. Um ngaihnak hi ka thei lo a si bik. Rualpipawl theih le ka duh lo. Kilte in i duh lo pang sehla rualpi theih ah ka mualpho tuk ding ka ti ih ka rualpi ṭha khal ka sim duh lo. Keimah ten ka duhnak cu ka tuar cuahco men cu si. Kilte in duh thu khal i sim lo. I duh vek khal in um lo nan, a um dan le a hawiher a awkam te in ka thinlung, ka ruahnak hmuahhmuah hi a la thluh a si bik mei. Ni khat hnu ni khat ka duhnak a thuk sinsin.

Peh vivo lai ding.

(Visited 51 times, 1 visits today)

Comments

comments

Comments

%d bloggers like this: