A Hmun Mi Lungawinak Thuthup

     A HMUN MI LUNGAWINAK THUTHUP

Timothy Sui Lian Mang

Cang Hril: “—ka lungawinak nanmah ih a um ringring theinak dingah le nan lungawinak a famkim theinak dingah…” (Joh. 15:11).

Hih ṭawngkampawl hi kan Bawipa Jesu Khrih-ih ṭawngsuak mipawl an si ih, an hnenih a sim lai can theihfeng hi kan hrangah a thupi zet. Can reiloteah Jesu cu Gethsemane thim lakah a um ding ih, cu ṭheh hnu reiloteah amah hektupawl tawng in le amah huatupawl ih hmuhsuamnak le nautatnak ṭawngkampawl a thei thlang ding; curuangah hih cante ih lungawinak le aipuannak thu a sim hi cu thilmak a si hrimhrim. A si, himi, “Ka lungawinak…” tiih a ṭawngsuak mi hi Kalvary tlang ih thinlung le taksa tuarnak rapthlak a tawn hlan deuhte can ih a ṭawng mi a si. Cathianghlim sungih ngankhum mipawl lakah hihi amai lungawinak a simsuahnak can umsun a si. Curuangah himi hi a thupi zet. Khativek harsatnak le hniksaknak nasazet can ih a hnenih um ringring mi Bawipai lungawinak cu ziang tluk danglam hleice lungawinak a si pei! Cun kan hrang ih in duhsak mi le a pek mi (cucu zumtu hmuahhmuah hrang), leitlun lungawinak thawi bangaw lo cu kan lungawinak a si ding mi a si – “Ka lungawinak nanmah ih a um ringring theinak dingah le nan lungawinak a famkim theinak dingah…”

1.  KHRISTIAN LUNGAWINAK CU KHRISTIAN TINKIM NUN IH   

    LANG MI ZIAZA DANGLAM A SI A TUL

 Atu le atu thanau, riahsia le mithmai sia in kan um; asinan Khristian kan si vekin ziangkim ah lungawi ding kan si – Fil. 4:4 le 1The. 5:16 zoh aw. Kan Khristian nunih tawnteh mi  ihsin Z tiang lungawinak in hminsinnak langter ding a si: pianthar tikih lungawinak in (Apo.8:39); Pathian ṭawngkam thianghlim siar tikih lungawinak in(Jer.15:16); thlacam tikih lungawinak in (Joh.16:24); harsatnak karlak ih lungawinak in(James1:2); harnak tuar can khal ih lungawinak in (Apo. 5:41); rawngbawl canih lungawinak in(2Kor.1:24); cun khualtlawn cemnetnakih lungawinak in(Heb.12:22).  Bawipai ta kan si ah cun lungawi ringring ding kan si.

 2.   CUN KHRISTIAN IH TAWNTEH DING MI LUNGAWINAK CU,  

        ZIANG LUNGAWINAK A SI?

           (1) Cumi cu Khrih-ih lungawinak a si:  “…Ka lungawinak nanmah ih a um ringring theinakdingah…”(Joh15:11).“Ka  lungawinak…nanmah ih…” Khristian nun ti mi cu mi pakhat nunnak  sungih Bawipa Jesu Khrih-ih nunnak kha a si—Gal. 2:20 le Kol.3:4  zoh aw.  Khristian  lungawinak cu Khristian mi pakhat sungih Khrih-ih lungawinak kha a si. Lungawinak phundangpawl cu hmun dangdang ah hmuh theih an si, asinan  Khrih-ih lungawinak cu amah hnen lawngah hmuh theih a si.

(2)  Cumi cu lungawinak ih khahnak a si: “…nan lungawinak a famkim theinak dingah…”(Joh.15:11).  Lungawinak tile lungawinak ih khah ti mi karlakah bangawklonak tumpi a um.  Bungbel cu a hrek tiang lawng a khat tla a si thei lole famkim zetin a khat tla a si thei. Kan hrangih kan Bawipai duhsaknak cu lungawinak ih khat mi nun a pehpehih tawnteh vivo a si – Sam16:11; Joh.17:13 le 1Pet.1:8 zoh aw.

(3)  Cumi cu a hmun ringring mi lungawinak a si:  “ka lungawinak cu nanmah ih a um ringring theinak dingah…”(Joh.15:11). Hih Bible cangpawl ah – Joh. 15:4,5,6,7,9,10 “um ringring” ti mi ṭawngfang hi hminsin aw.  Amah ih um ringring ti mi le kanmah ah amah a um ringring ti mi ih sullam cu amai lungawinak kha kanmah ah a um ringring tinak a si. Kan lungawinak hi a cawl dualdo mi tawntehnak men a si lo,  cuhnakin a hmun ringring mi a si sawn. Kiangkapih hnaihnawk theih lo mi lungawinak a si –  Joh. 16:22 ah Bawipa in a dungthluntupawl hnenah  ziang a sim hai ti zoh aw.  Hih kan Bawipai dungthluntu hmaisabikpawl cun harsatnak le hniksaknak tampi tawng vingvo ding an si,  asinan zianghman in an lungawinak—anmah ih um Khrih lungawinak cu an lawng thei hrimhrim lo ding ti a sim hai. Khristianpawlih a hmun ringring mi lungawinak le kanmah ih Khrih lungawinak cu a lenglam thil umdanpawl in a hnaihnawk thei lo thu simfiangnak hi ṭhazet in ruat hnik aw:

(i)         Joh.15:11—kan hmu zo vekin, kan Bawipa in hih lungawinak cu khraws phenthlem ah a rak tep zo—Joh.17:13 thawn khaikhin aw.

(ii)        Luk.10:20 – Kan Bawipai sim duhsan cu: “Nan lungawinak cu leitlun thil lole a hmunlo mi thil parah ṭhum aw hlah seh, cuhnakin a hmun ringring mi…vancung ah ṭhum sawn uh,”ti a si tengteng ding.

(iii)       Apo.16:15 – Paul le Silas harsaknak nasazet sungah um hai hman sehla, zanṭim ah thangṭhatnak hla a sakter theitu Khrih-ih lungawinak thawn an khat a si. Isai.61:3; 2Kor. 8:2 le Heb.10:34 thawn khaikhin aw.

Khristian lungawinak diktak hi boruak siava in a  khawihsiat thei lo hi hminsin tlak khawruahharza thil a si; cuhnakin cuvek harsatnak le hniksaknak pawl tla cun Khrisitan lungawinak cu a khaisang sawn riangri -James1:2 zoh aw.

3.   ZIANGTIN HIH LUNGAWINAK KAN NEI THEI DING?

           (1) Amah neihnak in.  Hih a thukzet mi le a hmun ringring mi  lungawinak  hi Khrih-ih lungawinak asile,amah neihnak lawngin cumi cu kan nei  thei.  Apo.8:8 ah, “Cule cui khaw sungah  lungawinak nasazet a um,”  ti kan siar.  Ziangruangah cutin thil a rak um? Cang 5- nak in in sim!  Cang 35-nak in in sim!  Amai lungawinak kan neih theinak dingah amah kan neih a ṭul—Joh.17:13 zoh aw.

(2)  Amai kamsuak thu siarnak in.  Bible kan siar ih thutak kan  cohlan tikah lungawinak nasazet cu kan nun in kan tep – 1Joh.1:4 zoh aw.

(3)  Amah hnehih hlanawknak in.   Luk.10:21 ih thil  pahnih in sim mi kha hminsin aw:  pakhatnak ah  “Jesu cu lungawinak in a khat; cun pahnihnak ah  apai duhnak ah a pumhlum in a hlan aw.  Amai lungawinak cu a famkim mi lungawinak a si ih, vancung a Pai duhnak ah a nun a hlan vivo.”  Aw, riahsiatnak kan cohlan mi ih malsawmnak,” tiah Madame Guyon in a rak ti dah.  A kut ihsin tuarnak kan cohlan tikah, cutin kan lungawinak cu a famkim taktak ding.

(4) Thlarau Thianghlim in. Luk.10:21 ih a sim mi diktak cu: “Jesu cu Thlarau  Thianghlim ah a lung a awi,”ti a si. Mirang Bible lehlin pakhat ah cun: “cui can ah Jesu cu lungawinak nasazet thawn Thlarau Thianghlim in a khat,”tiin a um -Rom15:13 thawn khaikhin aw.

Cui tikcucan rori ah milai famkim Jesu cu milai taksa famkim in van ah khaisan a si. Amai duh mi cu a lungawinak kha kan mah ih a famkim ding hi  a si. Ziangtin cumi cu a cang thei ding? Anih le khinah a um ih, kannih le hinah kan um si!  Anih cu vancung ah a um ih kannih cu leilung ah kan um fawn si!  Aphi cu—Thlarau Thianhlim in ti hi a si.  “Thlarau rah cu-  lungawinak…” Gal.5:22 zoh awla Apo. 13:52 le Ef.5:18 thawn khaikhin aw.

*****

Comments

comments

Comments

%d bloggers like this: