A Hmin ih Huham

February 18

Zarhte Ni

A Hmin ih Huham

Curuangah a saangbik hmun ah Pathian in a cawisang ih Hmin hmuahhmuah lakih cungnungbik hmin a pek. Cuti a si ruangah Jesuh hmin upatnak pekin vancung ih ummi le leitlun ih ummi hmuahhmuah in an khuk an bil dingih Jesuh Khrih cu Bawi a si tiah Pathian sunlawinak ah an zate’n an phuang ding.

– Filipi 2:9-10

Bible Siar Ding: Filipi 2:1-13

Jesuh hmin sungah hih leitlun ih ziang hmuahhmuah neh theinak huham a um. “Rundamnak cu Amai’ sung lawngah a um; ziangahtile Pathian ih rundam mi kan sinak dingah lei khawvel pumpuluk ahhin minung hnenih pekmi hmin dang zohman an um lo” (Tirh. 4:12).

Mi paruk cu minaa innkhaan sungah thlacam sak dingin an vung lut. Amah cu Episcopal Church ih an hotu pa a si ih ihkhun tlunah ruahsan ding zianghman nei nawn lo le bawmtu nei loin a zau. Cazual fate tidamnak (healing) thu nganmi a siar ih minaa hrangah thlacam saknak aw a hnathlam ah a thei. Curuangah “rinnak thawn thlacam theitu ding” (James 5:15) ih a ruahmi a rualpi pawl ko dingin a thlah. James 5:14 sungih nganmi vekin siiti an hnih sak ih thlacam an sak asinan hmakhat teih a hung dam lohli cuang lo tikah nasatak in a ttap ciamco. Mi paruk cu khaan sung ihsin an suak.

Innleng an thlen tikah an lakih mi pakhat in, “Thil pakhat tuah thei dingmi kan nei. Ra uh, kan vung lut saal dingih kan zuam hnik pei” a ti. An zate in an vung lutkir saal ih a bur in lungrual te’n an um. Cumi pa cun, “Jesuh hmin saal in thla kan cam hnik pei” a ti. A hmaisa ah “JESUH (Jesus)” hmin saal in an au, asinan zianghman a cangsuak lo. Asinan an paruk pehzom in “Jesuh, Jesuh, Jesuh!” ti’n an ko rero tikah huham cahnak a ra thleng. Pathian ih hnattuannak an hmu ih an zumnak le an lungawinak a karh sinsin ih JESUH hmin cu ring deuhdeuh in an au. Cuti ih an au tikah cu mipa cu ihkhun ihsin a hung tho ih amah te’n hnipuan a thlengh aw.

Thuthup cu himi a si: hih thlacamtu mi paruk pawl in an thinlung mit in minaa an zoh nawn lo ih vanlam thlirin Jesuh sawn an zoh. An zumnak cu Jesuh sungah a tuam aw. Mipi in Jesuh an zum ih A hmin sungih a ummi huham cahnak an rin le an upat thiam ahcun ziang a cang ding timi cu sim le rel hman a ttul nawn lo.

Jesuh hmin le A hmin sungih huham thawn Pathian kan naih thei.

@ Smith Wigglesworth

(Visited 14 times, 1 visits today)

Comments

comments

Comments

%d bloggers like this: