A Hmaisabik Dinosaur Hmusuak

Leilung sungih lungto vek a cang zomi thilnung pawlih ruh pawl zingzoitu Paleontologist team pakhat cun dinosaur hmaisabik, phun-ubik, ih zummi dinosaur phunkhat ih ruhro pawl cu a tong. Himi dinosaur hi kum 243 million hrawngih a ummi Labrador, dinosaur phunkhat thotho, hnakin a fate sawn. Labrador donosaur hi a hmaisabik ih zum asinan atu ih hmuhsuah tharmi hi cu hnakin kum million 10 hrawng tuan in a um zo a si.

Ahlan hmuhsuahmi dinosaur pawl thawn khaikhin hi thil ol a si lo ruangah, zingzoitu hrekkhat in cun dinosaur hmaisabik dingah an zum lo. Asinan paleontologist pawl cun an hmuhsuah vekin an pom. A hmaisa Argentina ram ih an hmuhsuahmi,  Eoraptor le Eodromaeus tiih hmin a neimi dinosaur pawl hi kum million 230 lai-ah an um dah.

Sterling Nesbitt ih hruainak in Seattle ih um University of Washington ih  paleontologist team pakhat cun, 2010 ah, Tanzania’s Manda Beds in kan dung kum million 242 le 245 lai-ih rak um dah, dinosaur thawn a bang-aw zetmi rannung phunkhat cu an hmuhsuah thu an puang. Cumi dinosaur asilonan dinosaur tiih kawh sehla a awm zetmi khi a si. A hmin cu Asilisaurus tiah kawh a si.

Cumi an hmuhsuahnak ihsin an tha a tho ih, Nesbitt tei cun Manda Beds ah zingzoinak an neibet ih cumi ahcun Asilisaurus hnakin dinosaur thawn a naih deuhmi rannung phunkhat an tong lala. Cumi cu anmai ih hmuhsuahmi thilthar ciamco a si lo ih, 1930s laiih an tong zo taak, Alan Charig ih ho in an lihla rero zomi, a si. Cumi cu London’s Natural History Museum ah an ret ih mipi ih zoh ṭheumi a si. Alan Charig in a hmin ah Nyasasaurus tiah a pek ih, a thih tiang dinosaur phunkhat a si tiin hnemhngehnak a neita lo.

Atu ah thar thawhsal in lungto ih a cang zomi Nyasasaurus ruh pawl ṭhenkhat umnak Cape Town ih um South African Museum ah feh in an zingzoi ciammamsal. Nesbitt le a team pawl cun nasa zetin a hruai ih, a ruh pawl, le thildang dinosaur thawn a pehparnak zawn pawl cu systematic taktak in a lihla pi hai. Biology Letter pawl khalin an zingzoinak cu an tarlang ih theisuahmi tampi cu zoh in dinosaur ngaingai a si tiin an pom thlang.

Nyasasaurus in dinosaur dang pawlih pahnih lawng nei ṭheumi zangruh cu mangbangza in pathum a nei. A kutruh cu dinosaur dang pawl hnakin zamrangtuk in a ṭhang. Team hruaitu Nesbitt cun Nyasasaurus hnakih tuan deuh ih um dinosaur cu kan hmu hrih lo tiin, a hmaisabik le a phun-ubik dinosaur an hmuhsuah thei thu uar zetin a sim.

(Visited 134 times, 1 visits today)

Comments

comments

One Comment

  1. Lihla ti si lo in zingzawi ti a dik deuh lo maw

Comments

%d bloggers like this: