A Hmaisabik Chin Casiar Zuamawknak Hlawhtling Zet In Țheh

CCSZ
Šianglianuk Ķianghrol
Chinmi khawvel ih Casiar Zuamawknak hmaisabik cu 2014 December 12-13 ah, IPCM General Assembly Office ih, meeting room ah hlawhtling zet in tuahsuak a si ih, Mai Lal Nun Sir (Hmunțha) in a pakhatnak a ngah thu theih a si. Laksawng ngahtu dang pawl cu a pahnihnak – Mai Abishag Sui Rem Nei (Chinsuh), pathumnak – Pa Za Hlei Kheng (Sanmyo – Kalaymyo), palinak – Salai Lal Soi Lian (Hmunttha), le panganak – Mai Lal Cer Cin (Taungzalat – Kalaymyo) pawl an si.

Tui țum Casiar Zuamawknak ahhin minung 19 an ra tel ih, 2014 December 12 ah Bible bung khat cio siar ih thletfimnak tuah in a thiambik panga hril an si. 2014 December 13 ah hrilsuah mi panga pawl zuamawkter sal an si. Thiambik panga pawl cu biazai, pipu țongfim, thutluang, thuanthucawn pawl siarter in zohfelnak neih an si.

Tui țum Casiar Zuamawknak hi USA ih Chin calai sunsaktu rualpi unauza ih sumpailam bomnak thawn Klirlungz in a tawlrel mi a si. Judge țuantupawl cu Salai Jesse Penn-lewis, Salai Kei Lian Uk, Salai Siang Lian Uk Kianghrol, Mai Sokhlei Par, Salai Lal Pek Tluang, Salai Van Buai Luai, le Salai Mang No Zik pawl an si. Zuamawknak ni neta ahhin Presbyterian (Chin Synod) ES Rev. Ram Lian Sawn in casiar a thupitzia thucah tawi simnak a nei.

Tui țum Casiar Zuamawknak ih hohatu Papu Luai cun, “Miphun hrangih thil thupi zet kan tuahsuak thei ih a lungawi um zet. Hivek tuahsuak thei ding ih sumpailam in bawmtu USA ih calai sunsaktupawl par khal ah kan lung a awi zet. Sum le pai tampi cem huam ih Chin calai an ngaihsaknak hi sunsak tlak rori a si. Cuihleiah calai sunsak ih a ra teltu zuamawtupawl parah kan lung a awi ngaingai,” tiah a sim.

Comments

comments

One Comment

  1. Klirlungz le unau pawl nan ti ttha tuk, zuam sinsin uh, atu hi caan ttha a si. Thanau lo ten hmailam ah kekar vivo uh, kan lo suang zet. Mipi khal kan ca siar vivo, mawiter vivoa si theinak dingah zuam sinsin uh si.

Comments

%d bloggers like this: