A Hlomi Phone Numbers

12143189_999887736698451_5164303050186826802_nTuikum 2015 Tilian harsa hi cu celh ding ci a si lo ee. Tahan, Taungphila kan inn kiang, No.2 BHS tlawnginn ah, tilian harsa tuar minung 200 lai an ra beu. A rure pam! Nauhak upa, tleirawl, fala tlangval, nulepa, pitar putar an kim ttheh.

Kei le exam ding ka si fawn. Thawmvang um lo teih cazoh ka duh em nan. An duhhril a si lo ti ka thei ih ka lainat hai zet fawn. Khat tawk ah hmundang dang ihsin bawmnak a ra thlen phei cun, an rure cuang. Kawl ttong, lai ttong le ttong dangdang an cawkrawi aw ruri bet.

Zingkhat cu nauhak ttap rero ka thei. Cazoh ka cawl ih sangkate in ka va zoh. “Nunu, inn kan tlung thlang pei! Hinah ka um paih nawn lo.” nauhakte in ttap phahin a ti. A Nu cun “reipi kan um lo ding pi. Ruahsur nawn lo dingin thlacam awla. Cule inn kan tlung thei ding.” a ti. Naute cu ka vun cawi ih a ttang ah a pom. Cule, a mit a sing ih mithli forkhatte cu a biang ah a rung lung kiarko. A ttap a si ding cu ka zum lo.

Cumi ka hmuh cu sangkate kiangah dingin ka mithli a rak hal ve.

Zingkhat leh lala, kan inn kiang lakphak dawr ah thawhhlam ei phah in phone ka zoh rero. Facebook ka zoh male. Rinlopin pitar pakhat hnipuan hruk ttawp deuh, sam hriat dah tuk lemlo a si ding ka zum, cumi nih “Nute Malaysia kawh ka duh ka thiam lo. In kawhsak thei pei maw?”in ti. A phone cu hlanlai suak Nokia phone te si. Touch Screen si lo, hmet ciamco ttul pawl kha!

“Aw kawhsak thei ee. An ph no. na thei maw?” ka ti ih, cabu fate ih nganmi ph no. in pe.

Ph no. ka zoh cu a dik lo mi pi a si.

“Ka Pi, ph no. cu a dik lo pi. Malaysia a si cun +601 in a thawk ding. Tucu +95 ih a thawk ruangah himi cu kawlram sung ih phone a si.” ka ti. A mang a bang hmel nasa. A riah tla a sia em a bang.

“A si lole Singapore teh” tin ph no. dang in hmuh lala. Asinan +95 in a thawk thotho.

Riahsia zet mithmai thawn “Hivek tilian harsa kan buai hi ka fa le pawl nih an thei ve lo si pei maw? US ummi ka fanu, Malaysia ummi ka fapa le Singapore ummi ka fanu, zohman in `Ka Nu na dam maw?´ ti tal tla ph in be lo. Kei cu nun man tla ka Nei nawn lo. Ka pasal le a thi zo. Ka fale pawl in le in thei nawn lo. Khatlam ah keimai mawh liolio a si. Ramdang an feh zik laiah, tluangte ih an thlen theinak dingah thla ka rak cam rero kha ka sir aw tuk. Mi pawl an fale unau za ih ramdang an thlen thluh kha, thlawsuah ropi tuk ah ka rak ruat. Asinan a khabikmi camsiatnak sawn a si ti hi!” a ti.

A thinuam dingih hnem ka duh zet nan, a thin hnem theitu ding ttongfang ka hawl hmu thei fawn lo.

“Ka Pi, kawlram cu ruah a sur phei ph line a se tuk. Na fa le pawl in an lo ko nan, an lo ko tlang thei lo a si ding ka zum. Tahan khawsung ih um veve hman kan biak tthat awk thei lo hi! Na ph kha, battery cem lo dingin rak zoh ringring aw maw. Nikhua a tthat deuh cun ph line tla a ttha dingih, na fa le pawl in an lo be tengteng ding ka zum.” ka ti ta.

Tuikum tilian harsa ruangah ih innsangtin ka sungralmi pawl, ngahsal thluh bang sehla hman, bulpak ciarin ka ngahmi hliamhma pawl cu kumziat le si a dam ding? Tilian in in hliam ngahmi kan thinlung pawl kha!

Mai Zilthli Lal Nei Thluai

Comments

comments

Comments

%d bloggers like this: