A Hliomi Naam ih Tthatnak

March 10
Zarhte Ni

A Hliomi Naam ih Tthatnak

Pathian in minung cu a dawisuak ih nunnak thingkung kiangih zohman rat ngam lonak dingah hmuan ih nisuahnaklam ah Cherubim le a tle zukzo ih a her aw luailomi raalnaam a ret.
– Seemtirnak 3:24

Bible Siar Ding: Rom 5:1-6:2

Thlarau Thianghlim baptism ka colai ah Pathian in mangbangza thutak i hmuhter. Adam le Eve in Pathian ih Daan an pahbal ruangih Eden hmuanduum ihsin a dawisuak hnu ah, Nunnak Thingkung cu meisa alhlio naam thawn a kil – thihnak naam a si ruangah a sung an luh asile an thi ding. Sikhalsehla Thlarau Thianghlim thawn baptism ka co hnu ahcun Nunnak Thingkung kha ka sungah a ret ih meisa alhhlio naam cu Satan ih i siatsuah thei lonak dingah keimah kilhimtu ah a ret. Curuangah kumkhua nunnak sang cu ka nun sung a tlaitluan in ka ei thei. Hih kumkhua nunnak thawn zianghman in i tthen thei nawn lo. Cumi cu nasazet le a tlaitluan in a karhzai ringring a si.

“Ziangmi in so in tthen thei ding?” (Rom 8:35). Harsatnak caan a thleng, asinan cumi cun tiduhdahnak sung tiang lawng a thlengter – cumi ruangah thlarau nun ih thil tthabik rah a ratter. Hih thilcangmi hmuahhmuah hi kan tthatnak hrangih cangmi an si (Rom 8:28). Kan thlarau nun tthanlen pitlinnak hrangih bawmtu siar lo kanmah siatsuah theitu thil zianghman kan parah a cang lo. Hneksaknak in na thlarau nun a lo khaisang ding. Thinharnak in a lo baangter ding na’n Pathian in nehnak a lo pe ding. Khawthim sungih huham hnakin na sungih a ummi huham a nasa sawn (1 John 4:4).

Amah sungih na um ruangah ziangbangtuk na parih thil thlengmi cu Pathian kutcak in a neh dingih na nunnak cu na hloh dah lo ding. Hniksaknak le thilrit ziangkim hi na thlarau thazaang cahnak ah Pathian in a lo thlengh sak ding. Pathian a cangvai ding. Pathian ih hrilmi a minung pawl cu zo in so sual a puh thei ding? (Rom 8:33). Minung cun an lo puhmawh ko ding, asinan zianghman a danglam cuang lo ding; “Pathian kan lam ih a ttan ahcun zoso in dodal thei ding?” (“Rom 8:31). “Milai zohman in an hmuh dah lomi, zohman in an theih dah lomi, a cang thei ding tiah zohman in an ruah dah lomi, cumi cekci cu Pathian in Amah a duhdawtu hrangah a tumtahmi a si. Cuih thuthup cu Pathian in kan hnenah a Thlarau in a phuang” (1Korin2:9-10).

Bawipa in, “Ziangbangtuk hriamnaam khal in a lo ngah thei lo ding; sual a lo puhtu ttongkam hmuahhmuah cu na let thei thluh ding. Keimah riantu pawl cu ka ttan dingih nehnak ka pe ding” a ti (Isaiah 54:17).

Hremnak le tiduhdahnak a tuartu pawl sungin a thianghlimbik le a cakbikmi vanlam huham thawih khat hmuh ding a um.

@ Smith Wigglesworth

(Visited 36 times, 1 visits today)

Comments

comments

Comments

%d bloggers like this: