A Hlawhtlingmi Japan Ram ih Lai Fala Daisy

11021168_10205921829423925_7810881738965359362_n

Scholarship ngahnak mipi hmai ih a thusim lai

– Uk Lian

Japan ram ah Lai fala zirnak-lam ah hlawhtlingzet mi a um timi le a hnatuannak lam ah Bank hnatuan tiang a thleng timi ka theih tikah theih duh sinsin in ka zingzawi. Japan ram ah phunsang tlawng a theh hnu ah bank ah hnatuan sangzet a kai timi tla cun i mangbang ter lo.

Asinan,  a thuhla, miphun dang pawl hnen ih Pathian a zumnak a langter daan le mi pakhat si dingih a zuamnak thuthuppawl cun keimah lawng siloin siartu dang pawlih thinlung a tham zet ding ah ka zum a si.

A hnuai ah a thuhla tampi ngan a si…..

16510_10205921828423900_3065608353308511094_n

A nauhak ih cathiambik laksawng a rak ngah lai pawl…

Ca Zir Hram A Thok Daan

Tlawngkai rak duh zetcia mi cu asilo nan a u le pawlih cartoon cabu siar a rak dawt ruangah casiar thiam ding duh ah tlawngkai duhnak thinlung a rak nei. Tlawng a kai vete’n cathiambik laksawng a rak ngah ringring. Cartoon cabu siar a dawt ruangah ca zir a rak duh thok nan, tlawng a kai hnu cun ca duh zet ah a rak cang. Phunhrek ihsin phunkua tiangah cathiambik sinak top 3 hnakih hnuai a rak tum dah lo.

A phunhra kum khalah, cathiam thei le zuam zetmi a si ruangah boarder a umnak fee lak tul loin le tuition fee pek tul lo ih kaiter a rak si. A phunhra exam ah “A” paziat thawn a ong ding timi lawng a ruat. Asinan, phunhra kum ah a dam cak thei lo, a naa ringring ih a duh vekin ca a zoh thei lo, a duh vekin exam tla a tuah suak thei lo. 2002 kumah phunhra cu Tahan, TZR tihmi boarder ihsin a rak ongih ‘A’cu pakhat hman a rak ngah thei lo.

Asinan, exam result a suah tikah mark thazet thawn a rak ong thotho. A nauhak lai ah a pa in, ramdang ihsin a rak tlun mi coat angki var cu a hmuh veten, ‘ka pa, hi cu zohman nan then lo pei, ka upat tikih sibawi ka tuan tikah ka hruk ding’ tin a rak ti dah. A nauhak lai ihsin cathiammi a rak si tikah sibawi si ding hi a duh bik mi a rak siih, sibawi ka si ding tiih tumtahnak a rak neihmi tla a thinlungah a hlo thei cuang lo. Asinan phunhra result mark cun sibawi lam a thlen thei nawn lo ruangah thinhar a caan a rak hmang.

unnamed (6)

Daisy Thang le a pa Rev. Ro Khar Thang….. A pa in Lai tong in thu a sim ih a fanu in Japanese tong in let sak lai…

A Phunsang Tlawng Kai le Japan Ram Ruahsannak

Daisy hmailam hrangah amahte ih a cawmawk theinak ding ruatin phunsang tlawng tha zetah kai thei dingin a cangtheitawkin a zuam. Thlacamnak le rualpi tha pawl bomnak pawl thawn a rak sunmang theu mi  Mandalay, University of Foreign Language (UFL) ah a lut. University of Foreign Language hi kan ram sungah pahnih lawng a um. Mandalay ah pakhat a um ih Rangoon thawn pahnih lawng a si.

UFL(lam tawinak) ahcun, English, Japanese, Chinese, Korea, France, Germany, Russia tin language 7 sungah phunhran mark ih banmi ihsin duhmi hril theih a rak si. English le Japanese zir ding cu mark tha zet a rak tul. Daisy cu, Mirang tong cu mikip ih thiam mi asi ko ih, Japan ca ka zir sawn ding timi thinlung a rak nei.

Cun, a phunsang tlawng kai ding kumah a pa cu training nak pakhat kai in Japan ram ah a um. A pa in Japan ram mawinak le cherry par zuk pawl a rak kuat theu. Daisy cun Kawlram ih cheery par pawl tla a rak hmu theu ko nan, a pai’h cherry par rak kuatmi zuk pawl ruangah cheery par thuhla hliakhlai duhnak thawn a thinlung a khat. Cherry par ruangah a thinlung sungah Japan ca thiam duh nak a khat sinsin. Cutin, Japan ca le an tong pawl a zir thok. A kum teel Japan thuhla le an nunphung pawl a zir vivo tikah Japan ram feh duhnak a nei sinsin. Cuticun, Japan ramih tlawng peh thei ding hi a sunmang a rak si. Kum 2005 ahcun a kai mi UFL ih sin B.A (Japanese) in degree a rak ngah.

unnamed (2)

Laam a zirhmi le a rualpi tlawngta pawl

Japan Ram A Feh Thei Daan

Nitin, Japan ram a feh theinak ding lamzin a ruat thlang. Hi lai caan ah Japan fehnak dingah a malbik sumpai ting hra-le-sawmnga lenglo cem tul mi a rak si. Japan ram feh ding ruahsannak thawn Rangoon ah afeh ih internet dawr tivek ah hna a rak tuan ih Japan tong a hngilhlonak dingah Rangoon ih Japan rawl dawr tivekah hna a tuan. Cuvek khal duh tawk loin, Japan tong rori zirnak hmun khalah a zir bet. Japan ihsin mikhualpawl an rat tik khalah a rak hmuak. Japan tong thiam le an nunphung thei sinsin ding hi a zuam zetmi thil pakhat ah a cang.

2009 ih Japan tong a rak zirnak Japan sayapa cun Japan pawl an ra dingih an ram ih tlawngkai duh pawl interview an tuah ding thu Daisy hnenah a sim. Daisy khal cun, Japan ram feh ding ih kum 5 lenglo a rak sunmang mi a si ruangah interview ah a feh ih interview khal tluangte’n a ong ngaingai. A interview tuah pi mi mi 15 lakih 6 pawl thawn 2010, March 28 ah Rangoon ihsin Japan ram pan in an zam suak. Cutin, Japan ram, MIE prefecture, Suzuka City ih a um mi, Suzuka International University ah phunsang tlawng kai a thok. A lak mi major pawl cu Japanese culture, western culture le relationship between difference culture ti pawl an si.

Japan ram a thlen tikah harsatnak tampi a tong. Tlawngkai theinak le Japan ram um theinak lawng tawk lo. Nun khawsak theinak dingah sumapi tamzet a rak tul betih sumpai hai-daih lo ruangah a buai zet. Harsatnak tampi lakah phungsangtlawng a kum khatnak zir ding in tlawng a lut thotho. A phunsang tlawng kai a kum khat nak cu park time in hna a tuan ih a unu in a sumpai tulsamnak pawl hmuahhmuah a bawm. Sumpai a daihawklo tikah tlawng cawl ih hnatuan ding tiang a rak ruat phahphah.

11021276_10205921831983989_5644836944598626333_n

Kawlram thu sim lai le a thuhla tawi simlai

A Tlawngkainak Lamih Caan Hman Daan

Daisy Japan ram a thleng ih a hawl hmaisabik mi cu khawmnak ding biakinn a si. Japan ram ih a khawmnak biakinn Kawage Lutheran Church ah veikhat cu lakphak in khawmnak an nei. Cumi ni cu, Daisy Japan a thleng zarh, Sunday a khawm hmaisabik nak ni a si. Cutawkah ruahbanlopin, mi pakhat in Daisy ih ke ah tisa thawn a burh ngah pang. Cutikah, kuwabarasan 42 sibawinu cun Daisy tuamhlawm dingah a inn ah a hruai. Si a thuh sakih, zarh khat sung a zoh. Cutin rualpitha zetah an cang suak.

Caan saupi a lian hnu ah, Daisy cun a pi nu hnenah Japan ram ih um harsa a ti thu le, a tlawngkainak ah sumpai a harsa ih hnatuan dingih Tokyo ih a u hnen ah a feh duh sawn thu le, a beidon vansang thu a sim tikah, a pinu mawtaw mawng lai cu a cawl dukdi ih Daisy ih harsatnakpawl a sut fiang thluh.

12812_10205921856384599_8741525852216096741_n

Tlawng dangdang ah feh in lehnak le cangvaihnak phunphun ah tel

Cui, a pi cun Daisy ih harsatnak pawl a bawm duh thu le a fa vek rori ih a zoh duh thu pawl Daisy hnenah a sim. Asinan, Daisy cun a zum thei lo. Cutikah a pinu cun, in zum theinak dingah nan ram ah kan pahnih in kan tlung dingih na nulepa kan va tong ding tiah a tiam.

Praise and worship hruai lai….

A Second year ihsin thokin a pi hnenah a um thok. A pi tei nupa cu fa an nei lo ih, Daisy cu an fa ngai vek rorin an duhdawt. Daisy khal cu thaten ca a zirih, part time tla a tuan phah thotho. Cun, Scholarship ngahmi thawn a pinu cem tam tul lo dingah a tum aw. Third year a si kumah, mark tha pawl tlawng fee 50% thum mi tlawngta lakah a rak tel ngah. Culawng hman siloin, Forth year (a final year kum) ahcun, a liam zo mi first year , second year, third year kum thum sungih mark tha pawl lawng apply theih mi Yoneyama Memorial Foundation ih pek mi Scholarship a ngah ih a final year cu a unu le a pinu ih bawm tulin nawn loin amahte a todelh aw thei.

A tlawngkainak ah We are international (WAI) timi club ah a lut ih ramdang mi a rualpipawl thawn tlawng dangdang ah feh in, Kawlram thuhla le Lai nunphung thuhla pawl simnak a nei theu. Tlawngta dang pawl laam a zirh caan le thusimnak a neih tinten Laimi asinak, langternak ah Lai thuam thawn a thuam aw theu.

11000127_10205921837384124_728934727352369159_n

A khawm theunak biakinn le a hla hruainak hmun

Biaknak Lam Ih A Caan Hman Daan

Daisy cu, an tlawng ih international student Pathian zuamlopawl biakinn ah a hruai ih a zumnakpawl tla a sim theu. Japan khawmnak ih hlahruai teimazet a si. Tong duhzetmi le hni duhzetmi a siih, zumlotu a rualpipawl tla biakin feh le, youth cangvaihnak tel dingih a sawm hai tikah phur zetin an tel theu. A rualnu pakhat Inner Mongolia mi Kakasan tihmi nu tla a kaihhruainak ruangah piangthar ih tipil pakhat a um. Daisy cun Japan ram ih a um ihsin a thuken cu (Mathai 6:33) nak hi a si. “A ram le a felnak hawl hmaisak ding cule Pathian in ziangkim a lo pe ding” timi hi a duhbikmi le a fehpi mi asi. Japan ih thluasuah siarcawklo a hmuhmi pawl hi, a nulepa, sungkhat unau pawlih thlacam saknak ruangah tiah a sim theu.

11720_10205921852704507_2773432733618534525_n

Bank ih a hnatuanpi pawl thawn

Bank ih A Hnatuan Thei Daan

Japan ram ahcun kum tin phunsang tlawng a theh ding mi pawl hrang hnatuan hawl thla tivekin acozah rampi in a phuang theu. Thimnak ah, January thla ihsin tlawngtapawl hnatuan hawl caan tivekin an phuang theu. Daisy khal 2013, December ihsi thokin hnatuannak a phunphun hawlin a rualpipawl thawn Japan ram state dangdang ah feh in hnatuan a rak hawl thok ve.

Japan ih hnatuan ding cun asilobik IT lam thiam tengteng a tul. Cun, Japan tong thiam le ngan thiam tenhteng a tul. IT lam thiam le Japan ca thiammi cu foreigner sihman ah hnatuan tha ngah theinak chance a tam zet. Japan ram tla tui hlan vek tlukin ram Economic a tha tuk lo tikah Japan mi rori khal tlawng theh veten hnatuan tha lut thei lo tampi an um. Bank ih hnatuan tla cu Japan ram khalah hnatuan tha an timi le an ngaisang zetmi hnatuan pakhat a rak si.

A hnuai ih youtube hi

A first year lai ih Youth Spring Camp ih Pathian duhdawtnak timi sim lai…

Japan ram ahcun company pakhat ih hnatuan dingah a tlangpithu in, exam tuah tul, a mal bikah interview 3 lenglo tuah atul. Company tha le tum deuh tla cun interview 5 tih vek tuah tul nak tla a um. Cui, Exam le interview pawl ong hnu lawngah hnatuan ngah a theih. Daisy khal interview tampi ah a rak feh. A tlangpi thu in interview level 4 tiang hi a rak thleng theu.

A rak ngah mi Yoneyama Memorial Scholarship Foundation cu, zarhtin Monday ni ah Tlawngta scholarship ngah pawl le scholarship petupawl tonkhawmnak le thurelkhawmnak tivek a um theu. Cutawkah, Japan a um nak prefecture ih Mie Bank hotu lubik thawn an rak tongaw. Pathian remruat nakin cu mi ni tla Daisy cu mipi hmaiah ding in speech tawite a rak nei. Bank hotubik thawn tla rawl-einak cabuai pakhatah an to tlang ngah.

11001918_10205921857064616_5579373624241051633_n

Japan Ramsung Thuthangca ah a lang

Cumi laiah Daisy cun khami pa kha Bank hotu a si tla a rak thei hrih lo. Daisy cu mi upapawl thawn um tlang can khalah hni siamsi ten mithmai panten umthiam mi a rak si. Cutin, Pathian nih Bank hotu lubik thinlung sungah hna a tuanih, an tlun zik zawngah Daisy cu a name card a pekih introduce nak a neih hnu ah ‘hnatuan na ngah zo maw ?’ ti pawl a sut. Daisy cun hnatuan a hawl rero thu a sim tikah cui bank hotupa cun ‘Bank hnatuan tih vek teh na interest zawng asi maw? tin a sutih, an bank ih exam le interview pawl ra tuah dingah a sawm cih. Cutin, interview 5 lenglo an tuah hnu hnatuan cu a ngah.

Bank hnatuan hi hnatuan thazet asi nan, ka tuan duhzetmi hnatuan cu a si ngelcel lo. NGO, NPO tih pawl, Education Foundation tih vekpawl ih mibawmnak pawl ih hnatuan khi ka duhmi bik asi.

2014, March 20 ah degree a ngah. 2014, April nikhat ihsin MIE BANK ah hnatuan a thok. Mie Bank cu a um nak Mie prefecture (state) sungah bank 75 (saing khuai) a um, tui kum hi an bank nih kum 120 a kimnak cu sunglawizet ih lawm ding an si.

Zuam zetih hna a tuannak ah bank hotupawl an lungkim zet ih hlei ah a hnatuan daan pawl a fel zet ruangah Head office ih Business Management department ih international solution office ah an transfer ih a hnatuan khaisan a si. An department ih an tuanbikmi cu paisa thleng tivek tawlrelnak lam le, Japan company ramdangih company din duh pawl hrangah, information hrang seminarpawl an tuah sak, a tul asile cu departmentih hotupawl cu, thimnakah Vietnam ih company din duh boss pawl kha Vietnam ah an feh piih ram dan tih vek an va ziangzawi theu.

Daisy cu tu a kum khatnak lawng siih, an department hnatuanpawl a tih thei tawkih a zir laifang te asi. Kawlram ih company din duh tivek umih, an bank nih an tawirel tul asi tik ahcun Daisy cu kawlram thu kaitu le, tonglettu vekih hmang ding khalin an bank nih ruahsannak tampi thawn hnatuan an peknak tla asi.

10689494_10205921833744033_2766751212402760968_n

A rualpi le hotu upa pawl thawn

Japan ram hin Kawlram thuhla hi ram thuhla an theih hiar zetmi lakah a tel ve. Kawlram thuhla thawn pehparin Daisy hin thusimnak a nei theu. TV Live khalin interview nak an tuah theu ih hlei ah a bank hnatuannak thuhla thawn khal Japan ramsung thuthangca pawl ah a lang theu.

Mie Television hotu pawl khalin Daisy komnak an nei. Cun tu bai te khalah, an rak kai nak tlawng nih hmaikum hrang an tlawng home pange ih a thu ngan dingin le, International university asi vekin, ramdang mi tlawngtapawl tha peknak dingah le an tlawngin advitise-nak capawl ih thlah dingah interview-nak an ra nei. A rak ngah mi Scholarship foundation khal in an home pange ah Daisyih thu ret an duh ih, a hnatuannak bank ah interview pawl an va tuahih cu mi cu youtube ah zoh theih in an tuah tum. An tawlrel rero lai fang a si.

11006413_10205921836904112_3788585966287040112_n

Daisy le a unu thawn

Daisy cu tuikum thawn Japan ramih a zirnak le a hnatuannak kum 5 a kim thlang ding. Zarh khat sungah cawlhnak caan khal nei lo ih hnatuan ih nunnak hmang asi ruangah a hnatuannak le zirnak ah hlawhtlinakin a thlun ringring. Daisy cun Japan mipi hnen ihsi zirtlak zet ka timi cu an mipipawl an lungrual ih caan hmante ih a hmang pawl an si.

Cun, hnatuan zuam zet miphun khal an si. An tuan mi poh ah thiamzet le professional si duhnak lungput an neiih si ding tla in an zuam. Zawnruahnak le lainatnak lungput tla an nei zet. Asinan, an sambaunak deuh ih ka hmuhmi pakhat cu an thinlung te tuk deuh phah ti khalin a sim. An mai ruahdan le an nunphung hi a thabik tin an ruah.

Cumi cu thil tha cu a siko nan, Japan mi hrekkhat cu ramdang daan le nunphung hi an theih le an hmuh tinten ‘Eeee cu ti vek’ tin thilmak vek le thilcang thei lo tuk vekih ruahnak nei tampi an um ve.

Ka nu nih in zirh theu mi cu ‘Khui tawk nan um khalah siseh, ka lo thihsan hnu khalah siseh, nan ngahmi sumpai ihsin Pathian ram hrang thenhra then khat cu dikzet in nan pe pei’ tih mi asi.

 

History lam kan zoh asi tla ram rei pi ramdang thawn pehtlaihnak an rak neih duh lo tikah an thu ruahdan pawl open minded tuk lonak le culture difference an theih mal tuk hrih nak pawl tamzet a um.

Cun a harbik mi cu, midang zawn an ruah tuk ih, thim nakah mai feh duhnak hnakin rualpi duhnak an thlun sawn theu ih, a leh hnu in an lungawi lo lala theu fawn, a lenglam ahcun an polite zet nan an thinlung ngaingai khi theih thiam ahar caan tla tam pi a um.

An frank tuk lo. Japan pawl kom le biak cu tongkam hmang thiam atul zet. Cu mi pawl cu ka duh tuk lo nak pawl an si tiah a sim.

11006468_10205921828863911_8770068288730931315_n
A thusim lai

Japan Feh Duh Hrang Ah

A hnuai ih ca hi amah ih nganmi a si….

Japan cu acozah daan tla a tha ih, nun tlanglengnak ah safe zetmi ram pkhat asi.

unnamed (3)

A zohkhentu a pinu le a pu

Insurance system pawl a tha zet. Ahleice in, Health insurance system an nei tha zet. US president OBAMA nih tla Japan health insurance system tha a ti tukih USA ah tuah a tum rero nan a tuahsuak thei hrih lo. Rel duhmi cu Japan hi western ram dang pawl hnak in umnak ding tha ram asinak pawl tarlang duh nak asi.

Ka nauhak lai ihsin, tusun ni tiang fimthiamnak ka zir thei nak hi mi tampi ih bawmnak ruangah asi.

Japan hnatuan duh cun Japan tong thiam tengteng a tul. Cun, kutthiam neih le a tha sinsin. Atha bikmi cu IT lam thiamnak neih asi. Tulai cu Yangon ah Japan feh hnatuan theinak dingih bawmnak hrang an din. Japan company pawl ah tong zir tla a theih, cun work interview pawl tla tampi a um. Cozah a ong awk hnu cu tui hlan vek si lo in, chance a tam thlang ngaingai. Amah lawngte, Japan cu Christian ram asilo vekin Christmas holidays vek tla an nei lo.

Hnatuan luhnak company ih zirin Sunday hnatuan na cawl thei lo tla si men ding. Biaknak lam zawngih thlir ahcun Japan um cu a nuam lo zetnak tla a um (thlarau ti rawl lam ah). Hnatuan off lak maimai tla an duh lo. Hnatuan thleng hnuaihni tla an duh lo. Hnatuan thleng tam tuk cu thinlung hmun lo vekin an ruat. Tulai cu an ruahnak tla a kau vivo ih, hnatuan thleng ih hnatuan thar tuan tla an um vivo ko nan, a tamsawn cu pension an lak tiang an tuannak kelih tuan an si sawn theu.

Mi tampi nih Japan cu hlawh a tha tin hnatuan an duh zet theu nan, hlawh pakhat vial zohin na ra asile na siaraw leh tla si thei men. Curuangah ka advice duh mi cu Japan ram na rat duh asi le cu an tong ziraw, an ram thu hla zir aw. Ziangahtile hna an tuan tuk. Japan pawl cu hna an tuan tuk ti’n rel ringring le theih ringring mi an si ko nan, a tak rori ih ton cun kan rel theu hnakin hnatuan ngaingai mi an si zia a lang sinsin.

10923444_10205921852344498_3831603728898460329_n
A scholarship ngahmi capi thawn

A Hlawhtlinknak Tiih A Ruah Mi

A hnuai ih ca hi amah ih nganmi a si….

Ka nauhak lai ihsin casiar ka thoh zik tinten thinlung thlacamnak ka nei theu.

Ka tlawng kai lai ih ka Bible cang keng mi cu, Thufim 1:7 ‘Pathian tihzah cu fimnak ih hramthoknak asi ’ tih mi arak si. Ka thiam thei lo mi subject a um tik khalah hi mi bungcang ka thinlung in siarnak le thlacamnak ka nei ih bawm nak ka dil theu. Japan ka thlen hnu ih ka Bible cang keng mi cu, a parih in tarlang sak zo vekin, Matt 6:33 le Saam 37:3-5 ‘Bawipa cu rinsan awla thil tha tuah aw. Cuticun hi ram sungah himdamte in na um ding. Bawipa ah na lungawinak hawl awla, Na lungthlitum a lo pe ding. Bawipa hnenah na nunnak pe aw; Amah rinsan awla a lo bawm ding’ tih mi an si. Cun, ka tlawngkai pi kawl pawl nih keimah nun dan zohin laimi an ngaisang ding in ka zuam.

Japan mi pawl nih kawlram mi an nautat lo dingin ka zuam. Japan pawl nih kawlram cu Buddish ram a si lo maw na tih tinten, aw asi ko nan, kei cu zumtu ka si. Kawl ka si lo. Chinmi, Laimi ka si tin ka sim tam tuk nakah Ka kawlmi tlawngkai pipawl nih in ngaihlo zik te sawm. Sinan, Laimi ka sinak le, Pathian nung zumtu ka sinak hi self introduce nak ka neih tin ten ka rel tel tengteng mi an si.

11002590_10205921856064591_4620386385041967077_n
Ramsung TV hmang in Live ih interview laifang

A Harsatnak ih Rahsuah Pawl

A hnuai ih ca pawl hi Daisy ih nganmi a si….

・Phunhra ka siih ka damcak theilonak tla Pathian duhnak a rak si.

・Sibawi line ka ngah lonak tla Pathian khawkhan a rak si.

・UFL ka theihnak le ka kai ngahnak tla rualpi tha hmangin Pathian lam hruai nak asi.

・Phunsang tlawng ka kai theinak, Japan ka rat thei nak tla sumpai lamih ka u nu nih in zoh nak, in duhsaknak, ka nu le zumtu unau pawl ih thlacam saknak, ka pai kohhran parih a rinum nak pawl ruangah asi.

Kawlram laam a zirh lai…

・Japan ih mah le tawk ih hlawh tlinnak le hivek dinhmun ka thleng nak tla, Pathian thatnak rori asi. Biaknak ka hawl hmaisabik nakin duhdawttu ramdang mi pawl thawn tonawknak can tha in pekih, thlawsuahnak tampi ka ngah nak hrampi a rak si.

・Ka khuk ah tisa nih in kang hmansehla, asaa zetmi tisa kha ka hmailam hrangah a thawzetmi khuaitizu burhmi vek a rak si.

Kan theih thiam hlan ahcun naa kan tiih tuar har kan tih mi tla can a kim tikah Pathian laksawng asi tih kan hmu thar sal theu.

・Ka nu nih in zirh theu mi cu ‘Khui tawk nan um khalah siseh, ka lo thihsan hnu khalah siseh, nan ngahmi sumpai ihsin Pathian ram thenhra then khat cu dikzet in nan pe pei’ tih mi asi.

Japan ka feh zik tla ah himi hi a thucah mi a rak si. Cumi thei ringringin Japanih part time hlawh ka ngah hmaisabik cu thenhra then khat si lo in, azaten biakin ah ka pek (tam cu a si lo nan). Cui mal takte ka pekmi Pathian nih in cohlan sakih a let tamsawm ah I belh sak. Tlawngkai sung hmuahhmuah sumpai buainak um lo tiangin in kaihrui.

10997517_10205921856704607_3185544119097805274_n
Tlawngta pawl Lai thuam thawn laam zir thu, thuthangca ah suah

A vision

A hnuai ih a vision hi amah ih nganmi a si.

Ka nauhak lai ihsin, tusun ni tiang fimthiamnak ka zir thei nakin, mi tampi ih bawmnak ruangah asi.

Cuvek asi ruangah, kei tla mi bawm thei tu si khi ka duhbik mi asi. A hlece in, tlawng kai a duhzet nan, tlawng kai thei lo nauhakpawl tlawng kai ter theitu si ka duh. Bank hnatuan hi hnatuan thazet asi nan, ka tuan duhzetmi hnatuan cu a si ngelcel lo. NGO, NPO tih pawl, Education Foundation tih vekpawl ih mibawmnak pawl ih hnatuan khi ka duhmi bik asi.

Pathian rem atisile ni khat nini ahcun Education Scholarship Foundation dinsuak thei tu si ka duhbik. Asi lobik hmanah Scholarship Foundation pakhat khat ih member pakhat si dingin ka vision tumbik asi. Mi tampi bawmnak ruangah tuni tiang ka thleng vekin fimthiamnak a zir duhmipawl bawm theitu si ding hi ka duh bikmi asi. Pathin hnenah sungkua zoh theitu i siter aw tin thla ka camih, inn lam ka zoh nak kumkhat hman kim hrih lo nan, Pathin nih ka thlacamnak in kim ter. Tui ka thlacamnak cu, Mibawm theitu I siter aw tih mi asi.

unnamed (5)

PS- Mai Daisy Thang hi Rev. Ro Khar Thang & Nu Tawk Nei Cang ih fa rilrah 8 sungih 6 nak a si. A nulepa tufang Rangoon ah an um.

(Visited 4,818 times, 1 visits today)

Comments

comments

One Comment

  1. Zo si na zum mi Pathian dik tak ti na thei maw?
    Tu nai te ah thu ka thei mi pakhat poi ka ti zet mi a um asi. Cu cu ziang asi ti le CHRSTIAN za ih 90& hmuah2 pawl ih ka CHRISTIAN thurin(Doctrine) thu asi. Mi tam pi sawn in Christian pawl ih kan biak mi Pathian hi mi nung 3 asi ih Pathian ah 1 ti ih pomdan(Trinity) hi asi.

    Thu kan thei mi ah Hindu biak nak ih an Pathian hming Brama le Shiva le Ashinu ti mi Trinity an ti mi le Christian Pawl ih Pa le Fapa le Thiangthlarau 3 kom Pathian trinity thawn zo pathian so a cah ih huham a nei sawn ti ah zuam awk nak an nei ih,
    A cuih zuam awk nak ah khawsia ih hmang mi nu sung ih khua sia kha an dawi ter ve ve. A hmasa in Christian Trinity Pathian zum tu Saya pakhat nih Pa le Fapa le Thiangthlarau hming in khaw sia cu a rak dawi dawi hmaisa ih a dawi suak thei lo hlei ah a mah leh lam thizik in a tuah siat sawn asi an ti,
    Cu theh ah Hindi lam ih sin Hindu pawl ih Pathian brama le Shiva le Ashinu an ti mi Pathian hming in an dawi tik ah ol ten an dawi suak ti ih cu ruang ah Hindu pawl nih CHRISTIAN pawl ih zum mi Pathian hi zum tlak Pathian tak2 asi lo reng2 ti ah an hmuh suam na sa ti thu kan thei tik ah riah sia za ngai2 asi.

    Aw Christian ti aw pawl hi tluk ih Christian kan si nak ah kan thurin(Doctrine Trinity) hi a dik lo Bible doctrine asi lo ti thei na cing in kan tan tho2 lai hrih pei maw. Pa le Fapa le Thiangthlarau hi hming asi lo (Title) men asi ih acuih hming nei tu cu a mah JESU asi ti ah Dungthluntu pawl nih tla an thei ruang ah JESU hming lawng2 in Baptisma ppek nak ih sin ziangzongza a tuah ti tla Bible ACTS sung hmuah2 ah nan siar na cing in. Pa le Fapa le Thiangthlarau 3 kom hi Pathian asi ti pom tho2….
    Satan nih hman a tih lo ziang hman Trinity hming in a tuah thei si lo. Trinity hi dik sehla Satan tla a dawi suak thei ding. Ziangzongza tla Trinity hming in kan tuah thei ding nan cu teh…. Zum nak thurin dik lo hi thei na cing in na pom tho2 hrih ah cun nang tla Satan pa nih a lo thlek darh theuh lai ding hoh khaw ti duh sak nak thawn ka lo sim mi asi…. Phuah cop men asi lo hoh khaw….

Comments

%d bloggers like this: