A Dik Maw?

September 22

Tlawngkai Nithum

A Dik Maw?

siar:

Galati 1:1-19

An thusimmi pawl thinlungtak te’n an ngai ih, nitin te’n Paul ih simmi cu a si ngaingai maw, si ngaingai lo tiah Ca Thianghlim an siar ih an zohtthim.     – Tirh. 17:11

Kumkhat Sung Baibal:

–   Thusimtu 10-12

–   Galati 1

Ka pasal in American President hlun Ronald Reagan ih thusirhsan: “Rinsan aw, asinan zoh fel aw! (Trust, but verify!)” timi thusirhsan hi a duhzet. Reagan cu President a ttuanlai ah ram uknak thu thawn pehpar aw in mi ih an simmi hmuahhmuah zum ttheh a duh. Asinan a ram ih himnak cu thudik a theihnak parah a hngat awk ruangah an simmi hmuahhmuah zoh fel a duh.

Berea khua mi pawl khal thudik theih duhnak lungput an nei ve (Tirh.17:11). “An thusimmi pawl thinlungtak te’n an ngai ih, nitin te’n Paul ih simmi cu a si ngaingai maw, si ngaingai lo tiah Ca Thianghlim an siar ih an zohtthim.”  Simmi pohpoh olte’n an zum lo, an zoh fel.

Cumi cu kan hrangah a thupizet ve. Kawhhran, Nipi tlawng, radio, TV tivek ih Bible zirhnak pawl hi Pathian Ttongkam thawn a kalh awk ahcun kan zohfel a ttul a si (2Tim. 3:16-17). Pathian thudik thuthangttha cu dikzet ih a sim fiangtu si dingah Pathian lungkimnak ngah dingin zuam aw (2Tim.2:15). Culawngah an lenglam tuu bangtuk asinan an sunglam cinghnia hraang vek a simi zirhsualtu pawl (Matt.7:15), Khrih ih thuthangttha thlengh a tum rerotu thuthangttha dang simtu pawl ih siatsuah kan tuar lo ding (Gal. 1:6-7).

“Rinsan aw, asinan zoh fel aw!” timi hi hngilh hlah.    – Cindy Hess Kasper

Zirhsualnak ihsin humtu thil cu

Pathian Ttongkam siar tamnak in a ra;

Baibal thudik veikhat kan thei le,

Zirh sualmi cu aat thlak hnihsuakza a si ding. – Sper

Zirh sualmi thei thei dingah karbak pakhatnak cu

thudik theih hi a si.

Comments

comments

Comments

%d bloggers like this: