A Dik Lomi Simsungnak

July 8

Tlawngkai Nili 

A Dik Lomi Simsungnak 

Siar:

Matthai 24:36-44 

Jesuh cu Olif tlang parih a tolai ah a dungthluntu pawl a thupte in a hnenah an ra ih, “Hih thil hi ziangtikah so a can ding? Cun na rat saalnak caan le sancemnak langtertu ziang thil so a um ding, in sim hnik” tiah an sut.   – Matthai 24:3 

Kumkhat Sung Baibal:

–   Job 36-37

–    Tirhthlah 15:22-41 

Thuthangca pakhat in raalrinnak thu hiti’n a simsung: “July 22, 2009 ah Ni a thim ding. Ni thimnak in gravity timi leilungpi ih dirh theinak tha parah hna a ttuan dingih electronic plates pawl an kuai dingih Japan ram ah linghnin le  siatsuahtu tsunami a suahter ding.” Himi thu thawn pehpar aw in American Scientist pawl in, “Zo vek scientist hman in ling napi a hnin ding timi an simsung dah lo, ziangti’n a cang ding ti an thei lo, hmailam khal ah theih thei ding an ruat dah lo,” tiah an ti.           

Jesuh Khrih ratsaalnak ding ni simsungnak khal a dik lomi tampi a rak um zo. Bawipa in, “Cuih ni le caan cu van ih a ummi vancungmi siseh, Fapa in siseh, zohman in an thei lo, Pa lawng in a thei,” (Matt. 24:36) a ti. A dungthluntu pawl hnenah Jesuh in a ratsaalnak ding ni simsung ding ai ah hngak uh (c. 42), raalring te’n um uh (c. 44) tiah a sim.        

Peter in, “Bawipa ih Ni cu rin lopi ah fifir bangin a ra ding (2Pet. 3:10-11), nan nunlai ahhin ziangbangtuk ih nung ding so nan si? Nan nunnak cu a thiang-hlimmi sisehla Pathian hnenih hlanmi siseh,” tiah a ti.

A maksakmi kan Pathian le in Rundamtu Jesuh Khrih ih sunlawinak a lang ding tiin kan ruahsanmi ni sunglawi hngahnak ah kan thazaang cahnak hmang dingin Jesuh in in duhsak a si.    – C. P. Hia 

Pa khatkhat in Jesuh ratsaalnak ni

A cekci in ka thei a si tiah

Lo bum in a pengah lo hruai hngai hlah seh,

Bawipa in a ni ka thei lo a ti. 

Khrih ratsaalnak hngak awla Khrih sunlawinak ah na nung ding.

(Visited 18 times, 1 visits today)

Comments

comments

Comments

%d bloggers like this: