A Cang Menmenmi A Si Maw?

December 10

Tlawngkai Nili

 

A Cang Menmenmi A Si Maw?

 

Siar:

Ruth 2:1-12

 

Na tuahmi kipah Pathian cu thei ringring awla,

Amah in lamzin dik a lo hmuh ding a si.               -Thufim 3:6

 

Kumkhat Sung Baibal:

–   Hosea 1-4

–   Thuphuan 1

 

Zumlotu Tuluk scientist Huang cu 1994 kum ah Minnesota (USA) ih University ah ca a ra zirh phah ttheu. Cuih hmun a rat tikah zumtu hrekkhat thawn an kom aw ttheu ih a nuam awzet. A tlun zikah a rualpi zumtu pakhat in Beijing ih ummi a rualpi pakhat hawl dingin thu a cah ta.

     

Beijing lam pan in a zuang tikah, a vanzam tomi engine a tthat lo ruangah Seattle ah zaan khat an riak. Vanzam hnattuantu pawl in Huang ih riahnak ding khaan an pekmi ah Beijing a thlen tikih a hawl ding mi pa thawn an riak tlang ngelcel. Beijing an thlen tikah an pahnih te’n, zaan tinte Bible an siar tlang. Cuti’n kum khat a rung rei tikah Huang cun a nun cu Khrih hnenah a pek. Hih thu hi a cang menmenmi a si lo, Pathian ih remruat khuakhannak a si.

     

Ruth bung 2 sungah, Ruth cu Boaz ih Lo sungah a rak thleng (c.3). Boaz in himi nu hi zo a si? ti’n a hnattuantu pawl a sut (c.5), tikah a parah tthat duhnak a neihter lohli. Ruth in ziangruangah ka parah na ttha ti a sut saal tikah Boaz in, “Na thuhla cu ka hnenah in sim ttheh, na ni parih na tuahmi hmuahhmuah …Bawipa in lo rul hramseh. A thla hnuai ih humhimnak na hawlmi Bawipa Pathian in a laksawng cu famkimzet in lo pe hram seh,” tiah a ti (cc.11-12).

     

Ruth le Huang hnen ih a thlengmi hi a cang menmen mi an si pei maw? A si lo, Pathian ih lairelnak sungin minung pawl zohman a luat theitu an um lo.

 

Kan hmailam tikcu caan kaitu ka thei,

Ka kut i kaitu khal ka thei;

Pathian tel loin thil a cang lo,

Ziangkim hi Amai’ remruah an si.

 

            A cang menmenmi khal hi Pathian ih remruat ciami a si thei.

(Visited 32 times, 1 visits today)

Comments

comments

Comments

%d bloggers like this: