January 26

Tlawngkai Nihnih

A Tlaimi Hnuthlun

Siar:

Ezkiel 12:21-28

“Nan hnipuan thlek loin nan thinlung khuai sawn uh; Cule ka hnenah ra kir uh,” tiah a ti. Bawipa nan Pathian hnen ahcun ra kir uh; ziangahtile Amah cu zaangfahnak le lainatnak neitu a si; A thin a fual ih a ttunghmunmi duhdawtnak in a khat; Hrem a tummi khal a suup saal ttheu a si.      – Joel 2:13

Kumkhat Sung Baibal:

–   Suahlannak 14-15

Matthai 17

Nauhak ka si vekin ziaza ttha ka zir. Upa pawl in ka nunzia a tthat tikah laksawng in pek ih a ttha lo tikah cawhkuan in pek. Ziaza ttha asilole ziaza sia ka tuah hnu rei lote ah laksawng asilole cawhkuan in pek cih ttheu ruangah ziang ka tuah le ziang ka ngah ding, ti ka thei. Ka upat hnu cun thil sia ka tuah nain a hnuthlun harsatnak ka ton lohli lo tikah Pathian in ka thiltuahmi a poisa lo ti’n ka ruat.

Israel pawl khal cuti’n an rak si ve dah. Pathian thu an ngai lo nain a hnuthlun harsatnak an ton lo tikah, “Bawipa in kan ram in dungtun zo ih kan tuahmi khal in hmu lemlo,” an ti (Ezekiel 9:9). Pathian in a dungtun hngai ih an ziaza ttha lo khal a poisa nawn lo tiah an zum. An lungruhnak a ningkhop zettu Pathian in, “A rei nawn lo ding. Ka ttongmi cu tuahsuak a si ding,” (cc. 12:28) a ti tikah an zummi cu a sual, ti a lang.

Nunsim dingin Pathian a tlai tikah sualnak a poisa lo ruangah a si lo, thinheng dingah khulfung ttheumi Amai’ mizia ruangah a si. Sualnak tuah dingah a siang tiah mihrek in an ruat sual ttheu, sir aw dingin a hruaimi sawn a si (Rom 2:4).

Thlacam:

Bawipa, zawnruahnak thawn na khat ih thinheng dingikh na khulfung ruangah ka lungawi. Ka sualnak hnuthlun a um lo ding tiah na zaangfahnak ruat sual  hlah ning. Ka sual phuang sawn dingin i bawm aw. Amen.

Thudik a suah theinak ding cu sual phuannak lawng a si.

(Visited 22 times, 1 visits today)

Comments

comments

Comments

%d bloggers like this: