January 24

Nipi Ni

Huham Thawn A Khatmi Bible

Siar:

Hebru 4:12-13

Pathian ih Thu cu a nungih a cak fawn. Kap hnih hriam raalnaam hnakin a hriamsawn. Nunnak le thlarau an ton awknak le hlikhlok le thlik an peh awknak tiang a suntlang thei a si. Milai thinlung ih duhnak le ruahnak tla a thei thluh a si.    -Hebru 4:12

Kumkhat Sung Baibal:

–   Suahlannak 9-11

–   Matthai 15:21-39

Tleirawl Poh Fang cu Jesuh ih duhdawtnak theithiam in Khrih cu Rundamtu ah a cohlang. Culai ah a nu le a pa cun Khristian zumnak ih tthiatzia antheithiam lo. Curuangah biakinn a feh tinte’n amah kiltu dingah a unu an thlah cih ringring. Huham thawn a khatmi Pathian Thu in a nau kilkhawi dingin Biakinn a feh ve ttheutu a unu ih thinlung a suntlangh tikah Jesuh cu Rundamtu ah a cohlang ve.

Saam cangantu in, “Na thu pekmi pawl in… nunnak i pek,” (Saam.119:93) a ti. Himi cu Poh Fang tei’ unau le zumtu zate ih tettikhan mi a si. Pathian ih Thu cu a nung ih a cak fawn. Kap hnih hriam raalnaam hnakin a hriam sawn. Nunnak le thlarau an ton awknak le hlikhlok le thlik an peh awknak tiang a suntlangh thei. Milai thinlung ih duhnak le ruahnak tla a thei thluh a si (Heb. 4:12).

Bible in kan sualnak le a hnuthlun pawl ih thu hiti’n a sim: “Kan zate’n misual kan si ttheh ih Pathian sunlawinak kan co baan lo” (Rom 3:23); “Sualnak ih hlawhman cu thihnak a si” (Rom 6:23). “Pathian ih in zaangfahnak cu a famkim ngaingai ih in duhdawtnak khal a tumzet…Pathian ih zaangfahnak thawngin ruun mi nan si” (Efesa 2:4-5). “Na Thu cu ka ke hrangah mei-inn a si ih ka lamzin hrangah tleunak  a si” (Saam 119:105).

Bawipa, nunnak in petu le nitin ka nunnak ah lam in hruaitu huham a neimi na Ttongkam ruangah ka lung a awi.

Bible cu ttihphang lo lung pacal bangin a ding,

Tikcu caan timi thlisia tilet tho caan ah;

Kumkhua thudik thawn a ca-hmai pawl a alh,

Upat tlak tleunak in a vaang.

Bible cu bu tampi asinan uk khat te ah a cangmi cabu a si.

(Visited 16 times, 1 visits today)

Comments

comments

Comments

%d bloggers like this: