7th FDW Day “We Got Talent” Winner Mai Van Lal Awmi Le CT Suhtonnak


CT
:: A Hmaisabik ah Awmi, Big big congratulation!!! Nehnak na comi parah kan lo lungawipi tuk tiin cibai kan lo buk.
VLA :: Aw, ka lungawi tuk.

CT :: Zangfahten, na hmin, na nu le pa hmin, unau paziat nan si, khuitawk in na ra ti le Singapore ah ziangtluk rei na um tipawl in sim thei pei maw?
VLA :: Ka hmin Vanlalawmi, kan sungkua hi member 8 kan si.  Ka pa hmin cu Thang Lian Mung. Ka nu cu Lalengzami a si. Unau 6 kan siih nunau 4 mipa 2. Tufang ah ka U nu le ka tapa thawn kan unau 3 in Singapore ah hna kan tuan. Kei cu kum 2013 in Singapore ka thlengih kum 4 zikte ka um thlang. Cu lo ka sung le dang zaten Tamu ah an um.

CT :: Ziangtik in hla na rak sak thok? Cule himi  “We Got Talent”? zuamawknak ah tumtahnak nei in na tel maw ti tla theih kan duh?
VLA :: Ka nauhak kum 12 hrawngin hla ka rak sak thok. Cun, kum 2008 kum keimah kum 13 ka si lai ah kan khua Tamu ah “Kan sak ding, kan nuam ding (ဆိုၾကမည္၊ေပ်ာ္ၾကမည္။)” timi hlasak zuamawknak ah ka telih pakhatnak ka rak ngah. Atu hi hlasak zuamawk ka tel a veihnihnak a siih winner ka ngah khal a veihnihnak a si.

Ka zumnak ah kan sungkua in hlasak kan duh, awnmawi kan ngaina si ding. Ka unau dang tla cu keimah hnakin hlasak an thiam sawn.

CT :: Cucu, a thok ihsin himi zuamawknak ah ka neh rori ding tiin nangmah le nangmah na ringaw maw? Confident na nei maw?
VLA :: Aw. Ka tih phah, ka phur phah(nervous and excited.). Practice caan ka nei mal tuk. Ziangahtile nauhak pahnih kum 2 mi le thlahnih mi ka kilkhawi.

CT :: Oh!!! Cucu ziangtin na  practice?
VLA :: Aw, zarhkhat vei 3 ka practiced. A caan ahcun zarhkhat pumhlum practice caan nei loin tla ka um. Ziang hmuahhmuah hnakin Pathian hnen lungawi thu ka sim duh. Pathian tel lo cun himi zuamawknak ah nehnak ka co thei hrimhrim lo. Ka sungkua(Ka employer & kids) an dam lo thluh. An khuhkhuh, an raibur. Ka thlacamnak cu raibur lo le khuhkhuh ve lo ding hi a si. Pathian hi a tha kumkhua, ka kiangnai ah a um ringring ih ka thlacamnak i letsak.

CT :: Na inntek tei’ in zuamawknak na tel thu an thei maw?
VLA :: Aw, Thei ee.

CT :: Tha an lo pe maw?
VLA :: A hmaisabik audition ihsin final thleng in support. In suang zet.

CT :: Wow!!! A va lungawi um ve! An inn ah ziangtluk rei hna na tuan?
VLA :: Haaaaa …kum 1 lawng si lai.

CT :: Oh,  singai. Cun, na hla sakmin pawl, hla na hrildan ah nangmahte maw na hril? Midang in an lo bawm maw?
VLA :: Taktak te cun,  POp hla hi ka ngai duh zet, jazz music. Ka duh tuk ruangah inn ah ka sak theu. Cunah hla hril cu a ol zet. Hla fing 3 -5 ka hrilih kanmah MCFS (Mizo Christian Fellowship Singapore) in hotu Pu. F. Vanlalhruai hnenah ka kuat ih amah in I hrilsak. Culawng si loin ka U nu hnen khalah ka kuat thotho ih an ruahnak pekmi ka aanngai. Annih in, “Himi“hla hi na aw thawn a mil, himi sak aw” in ti. Final ih ka sakmi kha “Listen” timi Beyonce ih sakmi kha cu kum 2013 ihsin ka rak ngai ih a aw le a hlafang ka byheart thluh cia hlei ah khai’ hla kha ka duh tuk ruangah  final ka thlen in khami hla kan hril. Cun, Pathian zangfahnak in nehnak ka rak co.

CT :: Woww….. Theih nuam zet a si. Cun, Himi nan zuamawk laiih na harsatnak bik ziang a si? Cuih harsatnak ziangtin na pahtlang?
VLA :: Ka harsatnak bik maw! OH, Nervous and exciting. Thaten ka practice thei lo, ka buai thei tuk ruangah. Cunah ka aw a flat ding le ka aw a cat (out of tune ) ding ka phang. A hla le sak har a si fawn. Restroom ka feh tinten thla ka cam rero si ko.

CT :: Si rori,  na hla kha sak har zet si kan lo ti rero. Na titha tuk.
VLA :: Thank you.

CT :: Winner timi an von phuangih na hmin an ron kawh fangah ziangtin na feel?
VLA :: Hahahha nehnak ka co ti ka zum thei loih ka lungawi tuk rori panteh!

CT :: Neta ah hlasak zuamawknak tel theinak caan tha na ngahsal bang sehla na zuam bet pei maw?
VLA :: Aw, sinan ‘ we got talent ‘ ahcun si nawn lo ding. In tel siang nawn ka zum lo.

CT :: Na sunmang ziang a si?
VLA :: Gospel singer le Nurse si thei ding.

CT :: Aw, Netabik ah nauhak pahnih na kil phahin ziangtin hla na practice ti theih kan duh, An itthat hnu ah maw na practice? Na room ah maw khuitawk ah?
VLA :: Hhhhh khami fangte ah ka pinu  Japan a feh, keimah, ka pu le nauhak pahnih kan um. Nauhak pawl an dam lo bet. Ka pu le hna a tuan. Zanlam 5.30pm ka pu a rak tlungih rawl kan ei. Nauhak pawl ti ka kholh ih sii ka pek hnu ah ka pu nau rak zoh sung dingin zangfah ka dilih cutin ka room sangka khar in hla veihnih thum ka sak. Cuhman zantin ka tuah ngam lo. Sunah a ngai in hla ka ngai ringring.

CT :: Na caan sunglawi pekin kan thusuhnak in rak let ih kan lungawi tuk.
VLA :: Nan thusuhnak san hi sunglawi ka ti. Ka lungawi.

Comments

comments

Comments

%d bloggers like this: