Top-Down Admin System Vs Building Unitary State

TOP-DOWN ADMIN SYSTEM Vs BUILDING UNITARY STATE
(Image of Federal Reflection on Myanmar)

Ngun Than ( Robert Pa )

Federalism timi tongfang cu Latin ihsin rami a si ih, Foedus le Fides kommi a si. Foedus ih sullam cu “Tiamkamawknak” ti a si ih, Fides ih sullam cu “Rinumnak” timi a sawh. Curuangah, Federalism timi cu, “Mi tampi kha thlauthla-aw lo, bangran te’n umkhawm ttuantlang dingin rinumnak diktak thawn tiamkamawknak nei ih, cumi vekih khawsak”, a sawh deuh bik ding. Santhar ukawknak a phunphun a seem vivo vekin Federal khal kan simfiangdan a bangaw lo deuhdeuh. Kan varpawhdan a bangaw thei lo tinak a si. Cu ruangah tu lai ahcun, cozah pakhat cun thuneihnak kha Daan hmangin siseh, thutthennak in siseh, mipi hnenah in hlawm lawng kha tawk mai nawn loin, cozah pakhat hnakih tam, a tlun le hnuai karlak ah thuneihnak bangran tei’ zemawknak” lam sawhkhih in tulai ahcun Federal hi an simfiang.

Mithiam pawl cun Federal tlamtling si ding cun a hnuai ih pathum hi a neih tengteng a tul an ti.

(1) Cozah pahnih lole pahnih hnakih tam cozah neih
(2) Himi cozah pahnih lole pahnih hnakih tam cu thuneihnak thuhla ah Daanhrampi ah felfai te’n neihih rualrem tei’ zemawk
(3) Cumi cozah pahnih lole pahnih hnakih tam cu an karlak ah thubuai hlabuai, rualrem lonak, relfel tul a um tikah cumi relfaltu ding pawlkom dang pakhat neih

Federal diktak ahcun Central acozah le State acozah karlak ah khat le khat tlunta si cuhaw, thuneihnak cuhaw in an um dah lo. Cui cozah pawl cun anmah le dinhmun parah thumaw in an thuneih theinak zat cu cuhawk tul rero loin, daanhrampi ah neih cia a si ttheu. Cui cozah kaitu pawl cu mipi pawl ih hriltlin mi an si tengteng dingih, cuti’n mipi duhdan, mipi thuneihnak thawn hna zemawk, lairel, siah khon ding a si. Curuangah fiang sinsin dingin mithiam pawl cun Federalism diktak tahnak cu a hnuailam ih phunruk in a si an ti.
(1) A malbik ah cozah pahnih a um ding. Cu ai tam khal a si thei. Pakhat cu rampi huap cozah a si dingih, pakhat lole a dang cu a hmun “State” ih zirih cozah a si ding. Cui cozah pawl cu mipi hriltlin mi pawl in an hruai tengteng ding.
(2) Daanbu thuhla ah hngetter zo mi Daan kha remthatsal kan duh tikah, cui cozah pawl cun anmah te an remfel a thiang lo. Rem ttulmi a thuhla ih zirin mipi simaw, a ttulmi mipum duhnak, diriamnak a tel tengteng ding a si. Thuthimnak ah, ramri thuhla si bang sehla, cui ram ih umtu mipi pawl ih duhnak khal, cu lawng si loin cozah ih lungkimpinak a ttul veve a si.
(3) Daanbu sungah cui cozah pawl cun sumpai thawn pehpar in le thutthennak thawn pehpar in anmah te zalen takih an tuah ve theinak dingah hngetter cia ding a si.
(4) Ramri hmunram thawn pehpar in Central cozah in thu a botcat tikah, cui ramri thawn pehpar ih ai-awh theitu palai tel theinak, rel ve theinak Hlutdaw pakhat khat a um a ttul. A hleice in cui ramri kiangkap ih umtu mipi pawl cu midang ai-in thuneitu bik an si ding a si.
(5) Cui cozah pahnih lole pahnih ai-ih tam cu an karlak ah thubuai hlabuai relfel ttul a um tikah, anmah te cun a felhar ttheu ruangah, feltertu pawlkom pakhat khat a um tengteng ding a si.
(6) Cuih cozah pawl cu khat le khat rualrem tei’ hna an ttuan tlang ih an pehtlaihawk theinak dingah cumi bawmtu Institution simaw, cumi bawm theitu khawkhannak pakhat khat a um ding a si.

Myanmar le Federal

1947 lamah kirsal a ringring a ttul. Himi lai ih Panglong ih thurualremnak hmin an kar \um ah kan hruaitu hmaisa pawl khal in thu tampi ruat tain an tuah ve ih, an thurualpi Aung San thah a si zarah hiti can kan cang ta a si hi! A hleice in Chin, Kachin, Shan le kawl a si lo mi miphun dang pawl thawn an ruat khawm ciamciam ih, Judiciary, Legislature le Management dik zetin kaihruaiawk a si dingih, tlangpar mi pawl khal in an \ong, an nunphung le an calai pawl tla an duhdan vekin an kilhim thei ding a si. Himi lungrualnak ah \humaw in Ramdinkhawm ropi zet pakhat dinsuak kan tum ding timi lungput thawn an tuah ve cu a si kha!

Panglong Conference lungrualnak parah tthumaw in Aung San cun Ramdinkhawm kaihruaiawknak hrang Daanhrampi Draft cu a tuah ih, 1947 May thla ih tuahmi Pha-Sah-Pah-Lah Conference ah an zohkhawm hai. Himi ttum ah Aung San in thucah sau zet a sim. Rampi Federal in fehpi ih, ramdinkhawm tungding theidan ding mitthlam nei phahin a thiam tawkin a sim hai. Rampi sungih um mi, mipum mal le mipum tam phun pawl zokhal bangran tei’ kan umkhawm vialvo theinak ding ruahsannak thawn a tuahmi a si. A tuahmi sungah cun, Burma ram ah, State pariat – Chin, Kachin, Karen, Karen Sen (Kaya), Mon, Burma, Rakhine le Shan tiin um ding a rak duh. Daan thiam, Dr. Mg Mg ih hmuhdan vek asile hivek ih kan feh ding a si ahcun State (8) dinmi cio ah mahfek Parliament, Cozah, Thutthennak, Ukawknak hnget zalen takin kan nei cio ding timi a si.

A simmi lakih ttha zet pakhat cu, “Burma ramthar kan din ding kan ti tikah, Union timi Ramdinkhawm maw kan din ding lole Unitary State timi ramkhat sakhat ram so kan din ding? Himi thu ahcun kei ka hmuh vedan ah Union hi a ttha sawn ding tiah ka ruat. Kan rampi sungah ttong, hnam, biaknak, calai, nunphung bangaw lo tam zet kan umkhawm dingih cumi pawl humhim le kilhim, lungrual tei’ ke kan kar theinak dingah cun cumi thawn pehparmi kaihruaiawknak Daan tla kan tuah a ttul ding ruangah Union in an feh tengteng a ttul”, tiah Aung San in a rak ausuahpi rero.

A tlunih thu pawl Aung San ih ausuahpi rero khal sehla, amah bik an that ih thuneihnak midang kutah a thlen zarah thil ziangkim hi a linglet in a fehsal lala a ttul ih, Daanthiam U Chan Htun in cui Daan Draft cu linglet zetin a remfel thluhsal. Cumi a remfelsalmi Daan ahcun Kawl kha State pakhat ah ding loin Rampi cozah thuneihnak kha kawl kutih thlenter a duh ruangah State zawngih umter loin Division in a tuahnak san a rak si. Cu tiih an tuah lawnglawng ah cozah uknak Executive, Judiciary, Legislative lam khal an kutah a um thei ding thu an fiang tikah an tuah ttulmi hrimhrim a si. U Chan Htun ih kutsuak vek cun in fehpi tikah a rei hlanah State dang pawl cu an kut hnuaiah Daan in a thunlut cu a si ko. Annih fang sarih an co tikah, midang cu fangkhat ciar lawng kan co thei, tivek ah a cang. Aung San dam laiih lungkimnak kha Aung San thih hnu khalih hnuthlurh duh lo lawng si loin, a linglet zawngih an herdanglam tikah tuini tiang tlangpar mi tampi lungkim loih ral an thawhnak khal a si.

Cu vekin Sachuk ah rak tuah khal sehla, Aung San in thihsan hnu ahcun an thuthu in daan kha an herhkawi ih, Central lawngah thuneihnak sangbik an umter. Cumi Central theihpinak, siannak tel lo cun State hruaitu zo khal in zianghman an awn-au ngam lo. Daan pah an si thei. Himi hi mithiam pawl cun “Top-Down” an timi cu a si.

Federal ukawknak diktak ahcun tlunlam ihsi ret cop mi hruaitu a um ding a si lo. Tui kan dinhmun ahcun tlunlam ihsi ret cop hruaitu, uktu kan nei hnenhnen lai. Ramdang hmuh ah le mipi lungawiternak ah Vote in thlakter ciamco ih a thupi le a laimu cin ahcun anmah Ralkap Thanah ihsi ret cop kan si thotho. Curuangah Federal kan duh ih kan dil, kan aukio a si hmanah, Federal ziangvek timi parah kan ralrin a ttul. Kawl miphun tum duhdan Federal cu in fehpi ko ding. Tlangpar mi kan thu in el siang loih, zawng ih hmai hman kan zah ti vek phunih, “Awle, kan lo pe ding Federal” in ti caan ah ziangvek timi kha hngilh lo ten ralring hram kung.

(Visited 43 times, 1 visits today)

Comments

comments

Comments

%d bloggers like this: