Hling Fatakte

rose-thorns

Šianglianuk Ķianghrol

Mizansun cu thingkung pakhat hnuaiah ka mawttaw ka cawlhter. Cumi thingkung parih a ngerh aw mi hling hri (kung) ro pawl cu an kiak ih mawttaw parah an rung tla. Ka kut thawi’ ka hlon paih lo ruangah, mawttaw a fehsuah ahcun anmahte’n an tla leh mai ding ti in ka tanta pang.

Tuini ah ka pasal in kan mawttaw ke hling ih a sun pop thu i ra sim ih ka mang a bang zet. Ka pasal cun mawttaw ke suntu hling khal cu a rak phawi ih i hmuh. Hling cu fatakte ngaingai a si. Asinan mawttaw ke ih a paatnakbik zawn kherkher ah a lut ngah.

Workshop ih kan va feh tikah mawttaw siat remtu in a paatnakbik zawn kherkher hling ih a sun ruangah belh a theih nawn lo thu, belh a si khalle pressure tuar thei lo in a kuai sal thei thu in sim ih, mawttaw ke dang thleng lawlaw ding in thuron in pe.Centimeter hrek hman a kim lo mi hling fatakte in a sah zet ih ih ka ruat mi mawttaw ke pakhat a siatsuah thei. Ka pasal in hling a hmuh vete’n ruat ta hran lo ih a phawi tikah thli suak awn a theih cih thu i sim. Thli suah dan cu a muangcang ko nan a suah thluh ahcun kan buai ding. Curuangah thli a suah thluh hlan ah workshop ah kan fehpi lohli.Cui hling fatakte pakhat cu ka thinlung ah ka hminsin.
Ziangtluk ih a hnget mi nelawknak le ngainatawknak va um khal sehla, rualpi le nupi pasal karlak ahhin hling ih sun pop thei mi a nemnak zawn pakhatkhat cu a um thei tiah, keimah le keimah ralrinnak ka pe aw.Kan ttong mi ttongkam kam khat hi “A poi lo ding” ti ih ruat in, hling fatakte vekih tanta daithlang men ding a si lo. A poi tham lo ding ti ih ruat mi hling fatakte in mawttaw ke vekih a sah mi ngainatawknak khal a siatsuah pang thei.Pakhat le pakhat kan komawk can ah mi nuam aw thei, mi nel olsam kan si ruangih ralring lo in kan ttong mi simaw, kan cepoh hrimnak ttongkam simaw khin midang ih an nemnak (paatnak) zawn, an ngai thupitnak zawn a va tuahmawh kherkher can a um pang thei.
Cutikah ngainatawknak thli pawl nuamtete’n an mal vivo ih, a netnak ahcun nel aw nawn lo in mi thar vekih can a theih. Mawttaw ke thar thleng a theih vekin, rualpi khal a thar thleng a theih ko. Asinan a hlun le a thar cu ziangti hman in an bangrep thei nawn lo ding.Kum le can tampi cem ih dinsuah mi ngainatawknak le duatawknak hruangkulh pi kha hling fatakte siseh, hling tumpi siseh sunter pang lo hi a tthabik. Thaisun ah ziang a cang ding ti zohman in kan theih lo cuh!
Hram: Nine Nine Sanay ih leh mi “Ahmat Tamae Shu.”
(Visited 153 times, 1 visits today)

Comments

comments

Comments

%d bloggers like this: