Thitumnak Thianghlim Maw A Si, Neihawknak Thianghlim Sawn?

Just married couple, holding hands and walking in nature

– Uk Lian

Nupi le pasal neihawknak puai ka fehnak kip ah mipi hmuh dingih kan catar mi pawl ka zoh tikah bangaw lo celcel in ka hmu ringring. A tlangpi thu in pathum in an then aw. Cuipawl tla cu “Thitumnak Thianghlim”, “Thitawknak Thianghlim” lole “Neihawknak Thianghlim” tiah catar bangaw lo pathum a um theu.

A tlun ih pathum lakah a hmaan le a dikbikmi pakhat tal cu a um hrimhrim ding tiah ruahnak ka nei. Ziangtik ihsin “thitumnak thianghlim” tivek tongfang kan rak hmang ti tla theih a har zet men ding. Nupi le pasal neihawknak puai hi mopuai ti lawng tla in a ko tu kan um thotho. Mopuai asi ahcun monu lawng hrangih puai tuah vek khalah a cang thei ruangah mopuai tilawng khal a famkim thei cuang lo.

Himi hrangah a dikbik dingmi le a hmanbik hmang thei sehla a tha ding. Kan rak hmang uar zo ti siloin a dik mi hman thei cu thil tha a si. Curuangah nupipasal neihawknak ih kan catar daan hi zoh tlang khawm sehla:-

Thitumnak Thianghlim

‘Thitumnak Thianghlim’ timi cataar hi tongkam mawizet vek bang si in, sullam danglam zet nei thei a si. Nupi le pasal tthi aw tiah kan ti theu ih minung hi puan le thinghnak vekih thitawk a theih ding maw si? A hrimhrim in “tthitawknak thianghlim” ti hmansehla malte cu ngai a nuam deuh lai. Tthit ti hnu ah – umnak tivekin ca fehter a si tikah a mawi lo tuk deuh maw tiah thlirnak pakhat ka nei. Himi catlang cun nupi le pasal neihawknak thuhla a fuun thei deuh lo in ka hmu.

Thitawknak Thianghlim

Himi hi mawi deuh in a lang. A tlun ta hnakin ngai le siar khal a nuam deuh siarsi. Asinan, sullam nei malzetin a lang lala. Minung le minung tthitawk hi a cang thei lo deuh. Thitawk timi ih a khihhmuh duhsan cu puan bangin kan tthi aw ih thenaw thei kan si lo timi a si men ding ka zum. Cuti asile, hlapi feh thei nawnlo ding vek tla a bang lala fawn. Thuamhnaw a tlek mi khi kan tthi ih taksa a tlek mi lawng thiit a rak si theu ti deuh in ka hmu.

Neihawknak Thianghlim

Himi cu ngai nuam le theih nuam men lawng siloin sullam dik le hmaan a kengtu catlang a si in ka hmu. Monu cu mopa ih ta a si thlang ding ih monu in mopa a nei thlang ding. Monu cu zota khal a si nawn lo, a neitu mopa ta a si thlang ding. Cuvek thotho in mopa khal, monu in a nei ve. Nunau dang ih ta a si nawn lo. An nei aw zo. Curuangah monu le mopa neihawknak cu neihawknak ngaingai a si tiin ka hmu ih kawh daan dik le hman bik a si in ka thei. Curuangah “Neihawknak Thianghlim” timi hi a dikbik ding tiin ka hmu.

(Visited 142 times, 1 visits today)

Comments

comments

Comments

%d bloggers like this: