7.3.10 Falam Times

Refugee Pawl in Lairam

An Tlansan Maw??

By. Sui Lian Mang

“Lairam ka duhdaw titu le Lairam duhdawtnak thu reltu pawl in Lairam an tlansan” ti tongkam hi nan thei ve cio ding ka zum. Lairam ( Chin State) tlan santu kan ti ahcun Kalay myone le Tamu myone ih um Laimi hmuah hmuah le Yangon le Kawlram hmun tin ih um Laimi pawl teh Lairam an tlansan maw ti thusuh ding a um. “Tlansan” kan ti tikah ruah ding tam pi a um. Tah thimnak pakhat thungai ka tarlang duh. Cicai khua Mino Pawlkom ( CMP) kum 25 kim Silver Jubilee an tuah ah Cicai khua in vai zo tu Pu Lian Cung Nung le a naupa Pu Tuan Ceu in an Jubilee rawl an dar. Pu Tuan Cung Nung tei unau in Cicai khua an tlansan maw? Cicai khuami pawl in the In tlansan an ti kem?

Kan sim zo vekin Lairam ( Chin State) ih umlo Laimi pawl in Lairam an tlansan kan ti thei kem? Refugee pawlteh Lairam an tlansan kan ti thei cuang kem? Inn sungih RULHRENG a um ahcun  mi cuk hmang, thihthei nak a si ti theitu pawl cun inn ihsin an suak lawk ding ih rulhreng a suah hnu ( a um nawn lo hnu) cun inn luah sal can tla a um leh lo ding sawm? Refugee pawl in Lairam an tlansan silo in Kawl Ralkap Uknak an tlansan sawn a si lo maw! Lairam kan tinan Laimi pawl uktu siloin Ukmi kan si sung ahcun Lairam ti ih mi sal ih tan feufeu hi a dik bik a si ce pei maw?

Zoso Lairam hrang `hansonak tuahtu? Zoso Lairam siatsuahtu ti tla hi kan cek a tul ding. Chin State ih um pawl in Lairam an duhdaw cuang maw? Lairam thansonak dingah an tang ngaingai maw? Ram leng um pawl in teh an thansoter maw, an siatsuah sawn saw? Lairam tupi pawl a kolhtertu teh zoso? ti tla hi na ruat dah maw? Lairam duhdaw cingin ram leng ih umtu pawl in Lairam an tlansan kan ti thei ngai pei maw?

Thus 2:  sungah Ziang hmuahhmuah hrangah can a um a timi kha ka von ruat. Israel pawl khal an ram midang  ih an rak uk ruangah an thendarh aw thluh can a rak um ih mahte ukawk theinak can a ra thlen tikah hmun tin kim in kirsal ih ram dinsal can a um. Kan Laimi pawl hrang khal ah tu hi kan thendarh awk can a si ih kirsal ih ram dinsal can tla a um leh ko ding. Ram sung ram leeng vuaivai aw lo in Laimi kan zaten kan umnak hmun tin in kan tang tlang ding ih Lairam a harhdamnak dingah zuam tlang ding a thupi sawn.Neh 2:18 ih “Tho in dinsal uhsih”ti ih Laimi pawl ih Lairam kan dinsal ih kan ukawk thei can hngakhlap zetin,

Kawlram Thuthang

Kawlram ah Nazi pakhat ih peng-120 tiang hrangthei thlisia thleng thei

April thla sung ah nazi pakhat ih peng-120 tiang a cak mi thlisia cu Kawlram hmun dangdang ah a hrang vivo thei a si ti thu nikhua tahnak `uanvo nei tu cun an sim. Hiti ih thlisia hrannak dingih an zum nak hmun pawlcu Sagain Division saklam, Kachin ramkulh, Mon ramkulh, Ta-nintayi ram `hen, Shan ramkulh ah a hrang dingih Tipi kap tluan hmun dangdang ah phu-sing (tornado) her in le hmun hrek ah cun ruahpi nasa tak sur thei a si ti thu khal an sim bet.  Hi mi thlisia a hranpang cun Inn nasa zet a siat dingih har nak tampi ramsung ah a thlen thei ti  thu khal nikhua tahnak tuanvo nei tuin ralrin nak mipi hnen ah a pek hai.

Vangtlang ralkap training

5.3.10 Mizzima, Kawlralkap cun Mon mino 100 hrawng cu Kawlralkap pawlin Pituhsit trainining kaiding in an fial ruangah duh lo in Mon New Land Party (Kawlralkap thawi rem nak tuah tu party) pawl hnenah humhim nak hawl in an tlan tiah MNLP palai in a sim. Ralkap pawl cun hranhram in an training an kai ter ih cui kai thei lo pawl cu thlakhat ah Kyats. 7000 nan kuan ding an ti ruangah cu mi harsat nak duh lo ruangih tlan an si thu a tlan tu pakhat in a sim. Kawlram hmun tin ah hiti vekih vangtlang training kaiter an si ruangah a tlan an tam pi ih a bik tak in Mon New land Party humhim tu hnen ah sungkua in siseh a bur bur in an ra thleng a si tiah an sim bet.

Kalaymyo ah mobile phone hman theih ve  thlang ding

Kawl ralkap Acozah in Kalaymyo ah mobile handset model 4000 CDMA-450 le CDMA-800 phunhnih cu a tum hmaisabiknak ah  2000 a pe suak ding. Hmailam canah hi aiih tam pek sinsin khal a tum. Dil tikah Kyat 2000 ih dilnak thehlut ding a siih hmatpungtin le inthawngsuhcazin tivek pawl telin Telecom department ah dil theih a si. Thuneitu lam in CDMA-450 handset pakhat cu Kyat 53,000 in zuarsuah a si dingih CDMA-800 handset pakhatah Kyats ting 15.5 in an zuar ding. Tu ah himi mobile handset lei duhih a diltu hi mipum 10,000 an kim zo. Himi kiangkap ih um pawlin hitivekih pursum leilawn nak ih tangkai zetmi hand phone an hmang thei ve ding cu an lung awi zet hai tin thu dawn asi.                                                                    

Lai pacang pakhat tlen man Kyat ting 300

March2,2010 ni zan nasi 9.00pm hrawngah mipa5 hmaituam in Paungmu khua ih um Hait Htun timi pa cu ram khawleng lamah hruai suakin ramlakah an fehpi. Cun, himi pawlin an hruaisuahmipa tlenak dingah a sungte pawl  hnenah paisa ting zathum(300 lakhs) an dil. A sungte pawl le himi zah paisa an neih lo tikah ti ngaih nak thei lo in Sinletwa khua ih  Kawlralkap pawl um nak camp ah an va sim. Asinan hitawkih um ral kap thuneitu pawl khalin tui ni tiangin zianghman an tuah hrih lo thu an khawmi pakhatin a sim.

Hi khua ih um pawlih rel danin himi misual 5 pawl hi Mara tawngin an mah le mah cu an biakawk hai thu an sim ve. Himi kiangkap ah CNA(Chin National Army) le MPA(Mara People’s Army) pawl an um hai. CNA thusimtu lamiih sim danin himi thuhla ah CNA cu a hnawihnihawklo thu le mi zo ti theihlo mi pawlin khaw sung mipi hnenin an pawlkawm hmin hmangin paisa an dil thu a sim  ve thung a si.

MPA hi July 15, 2009 ah Kawl ralkap ih rak tuan dah, cawl zo mi pawlih hoha nakih dinmi a si. An tumtahmi cu Mara miphun pawl lungrualte ih umtlan le Mara Autonomous Region(Mara mahte thuneih theinak ram) neih thei tumtahnak an nei a si.

India-Myanmar in Tapung do beihpi thlak tum

India thuthangca pakhatin G.K.Pillai (Union Home Secretary) cu February 19-21 ah  Kawlram ah va tlawngin kawl ralkap Acozah thawn lungkimnak an nei. Himi lungkimnak cu India-Myanmar ramri ih um Acozah dotu tapung pawl cu ramhnih tanrualnakih thenfaihna tuah ding a si. United National Liberation Front (UNLF), People’s Liberation Army (PLA) NSCN (Khaplang) and NSCN (Isak-Muivah) pawlih khawsak cangvaihnak area ram zuk pawl cu Brig. Gen. Phone Swe(Burmese Deputy Home Minister) hnenah a pek zo.India ram  Acozah do tu Tapung hrekkhat pawl cu Tonzang, Cikha township le Tamu township Sagaing division tlunlamah camp neiin an um. Kawl ralkap Acozah uknak duhlo ih a dotu  Chin National Army (CNA), Zomi Revolutionary Army (ZRA) le Arakan Liberation Army ralkap pawl khal himi hmunram pawlah an khawsa hai. Himi ramhnih thurualih thenfaihna thawk ding ni le thla hi theih ciah a si lo.

Pu Do Thawng (NLD MP) Kalay hospital ah

Pu Do Thawng(NLD MP) cu February 16,2010 ni zinglam nazi 9.00 hrawngah a nupi thawi an biakawk rero lai ah arinlopin a ban kehlam cu cangvai theilo in a um. A fanu in Sizung fehpi nak ih lirthei a hawl rero lai ah a kehlam ke khal cang thei lo in a rak um lala. Cuhnu ah Kalaymyo hospital ah fehpit a si tiah a fanu Siami in a sim.

A nih hi kan ram politik ah NLD(National League For Democracy) party member a siih kum 1990 ram pumpi hrilawknak ah Kalaymyo, Sagaing Divison bial ihsin MP(Member of Parliment) tiangih hriltlinmi pakhat a si. 1996 ah  kaih a siih Ukgu thawng inn ah ret a si ih 2003 ah suah sal a si. Hiti thawng a tlaknak ah ralkap pawlin an sawisa nasa ih himi ruangah 2005 ah khal kutke zeng in a  rak um dah. Hi lawng si lo in tu ahcun thisenthlum natnak tla a vei bet.

Hitivek ih kawl ralkap Acozahin sawisak tuar zo hman khal si sehla kan ram le miphun hrangah zalen ram(Democracy ram) dinsuahnak dingah a rak zumih a fehpit vek thotho in tui ni tiangah cak zetin a fehpit ringring lai tu a si.

Leitlun thuthang

Thailand billionair ih sumpai neihmi hrek laksak

Mr Thanksin Shinatwatra cu an ram Thailand ih  Prime Minister a tuan lai ah a thuneihnak hmangin a mah le a sungte lennaka tuah tin an ram ih dam lamih roreltu sangbik(Supreme Court ) in February 26,2010 ah khan puhin a tlunthu relsak a  si. Curuangah a sumpai neihmi  billion 76 Baht ihsin billion 46 cu laksak a si. Himi sumpai laksakmi pawl hi an ram Aczoah neihmi ih ret ding a si.

Tulai ah UAE ram  Acozahih zangfahnak in a khawsa rero lai a si. An ram ih ram uktu hnatuan a tuan lai ah khawpi lenglam ih um mi farah tam zet pawl hnenah ei le in an cawmawk theinak dingah tin sumpai a hman ter ih an lungawi zet. Tui ni tiangah an ram sungah a mah tantu hi mi ting tamz et an um lai. Tui kan dungte, himi an tlunthu relcahmi phuansuah ding ni ah  Supreme Court hmai ah mipi tam zet an ra pungkhawm.  Rorelnak in an sungkaw neihmi ihsin sumpawi a billion tam tel cu Acozah in laksak siseh tiih an hun relcahmi an phun cu mipi tam zet tam le thinheng in an um hai. Bangkon khawpi hmun thenkhat ah bomb a puakih Bangkok Bank tla bomb puah a si. Himi Bangkok bank hi a mah zuarthlai rerotu pa ih telnak bank a si ruangih bomb puah a si.

Thansin in “Himi ni ih Supreme Court in ka tlunthu a than dingmi khal hi a hlankhan in ka rak thei cia ko. Asinan, ka neih hmuahhmuah cu in lak sak lo ding timi khal ka rak thei cia” tiah a ti. A um nak ramleng ihsi video a zukmi ih a tawngnak ah “Ka  suahsemnak kan ram ih tlunkirih nuam zetih khawsak ka duh” tiah a sim fawn a si.

Linghin ruangah Axis(Leilung dinnak) thawn: NASA

4 March, 10. Chile Ram magnitude 8.8-a thakcak tak linghnin ruangah leilungpi dinhmun (Axis) thawn awk ruangah ni a tawi phah ding tiah NASA scientist pawl cun an sim.

Scientist pawlih tah dan ah tui tum linghnin ruangah leilungpi dinnak (axis) cu cemtimeter 8 tluk in a thawn aw tin an sim. 2004 kumih Indian Ocean ih tsunami rapthlak linghnin kha magnitude 9.1-a ih tha cak a si ih kan leilungpi dinnak axis a thawn ter ruangah nikhat zikte ni a tawi phah zo tiah an sim.

Hamas dintui fapa Israel thlingthla tu `uan

Kan dung February 26 ah khan, Hamas khua dintu lakih pakhat Sheikh Hassan Yousef ih fapa kum-32 mi Mosab Hassan Yousef cu Israel thlingthlatu ah a thupten a rak tuan a si ti thu Israel thuthang cun a puang. Mosab ruangah Hamas pawlin Israel an do zik can ih an thuthup cu Israel hnenih a rak sim theu ruangah an ti fuh thei dah lo. Cui tlunah West Bank ih Hamas ralbawi Ibrahim Hamid leh Israel siatsuah nakdingih bomb tuahtu Abdulla Barghuti hi a mai ruangah an kai ngah a si tiah Israel thu thang ca cun a sim bet.

Mosab hi Muslim ihsin Christian ah a let aw ih tu ah cun California ah a um. Hi ti ih a hna tuan nak pawl cu “Son of Hamas” ti mi thuthang ca ih sin an theih nak a si. Thlingthla tu hna hi 1997 in a tuan ih a hmin ah “The Green Prince” ti in a phuah aw, a ti duh san cu a pa kha Hamas dintu a si nak suang ih a sak mi a si. Cui hmin ruangah mi in thlingthla tu ti an theih lo nak khal a si.

Leitlun lek nak lam

Bosingwa tel thei loding

Chelsea FC ih rinsan zetmi Bosingwa cu tui kan dung October thla ih a khuk natnak ruangah operation (ah ding) a si. Himi ruangah Barclays Premier League, FA cup le an ram (Portugal) ai awh  ih Africaa World Cup lehnak ih a leh thei lo ding thu assistant manager Ray Wilkins in  an club official website ah a sim a si.

Michael Essien (Ghanaian) cu a kaikua thahri cat ih a hliam awknak ruangah a mal bik zarhhnih a cawlh a tul lai ding.injury. Champions League (16th March) ah Inter Milan thawi an lehnak  ah cun a tel thei zum a si.

Ashley Cole khal a ke ngamit a hliam ruangah lek thei mai ding a si hrih lo. Tu ah Michael Essien thawn France ram ah an dam lohli  theinak dingah tin an um hai.

Petr Cech cu tui kan dungte ah a hliamaw ve ih thlakhat hrawng cu a cawlh lawk a tul ding.

ManU in leiba ngah tuk ruangah zuar tul : Man U in leiba $500 million tlun lai a neih ruangah a neitu Glazer  family (American mi)tlunah Man U fan pawl lungkimlonak a phunphun a um. Himi sungkua in ManU club hi zuar dingin Red Knights pawlkawm in mipi sawmin tan an la ciamco. Asinan Glazer family cun zuar suah suah an tum lo thu an sim ve.

(Visited 81 times, 1 visits today)

Comments

comments

2 Comments

  1. ka lai mi hi malasia ah hi

  2. Dear ll,

    Internet sung in PHone Bible (Falam ca) in ka duh download na ding link in pek thei maw ka email cu tualnang@gmail.com

    lung awi

    Tual Nang

Comments

%d bloggers like this: