7.2.10 Falam Times

Kawlram thu

UN Card kai zo pawl hrang thuthang Tha

Malaysia cozah in ram sungih um raltlan pawl UNHCR ih register tuahzo mi pawl hrangah ramsung um theinak Card a tuahsak thlang ding. Himi Card kaitu cu kaihkhihnak ihsin a luat hleiah hna khal a tuan thei ding.

Himi Card thar hi ziangtik ah a tuahsak ding ti theih a si hrihlo nan UNHCR thawn lungkim tlangnak an neih zo thu UNHCR ih Officer Mrs. Yante Ismail in a sim.

Himi thu a umnak cu tulai fang ram dangmi kaih le khihthu ah UN Card neizo khal kaih  an si ringring ruangah UNHCR zung le Cozah lam biakawknak a buaithlak theu ruangih UNHCR ih dilmi a si.

Palik hotu pawlih sim daan ah Card ngahzo tu khal kaih an si nak san cu, minung tampi in Card lem an tuah ih cumi an keng theu ruangah a si tiah an sim.

Tu ah Malaysia ram sungih Refugee register tuahsak zomi hi (75,000) hrawng an um ih (60,000) lenglo pawlcu Kawlram mi an si tiah UNHCR cun a phuang.

Japan in Kawlram Refugee pawl a ko.

Japan cun Thailand ramri (Mela Camp) ih Kayin raltlan pawl cu kum khat ah minung (30) in kum (3) tiang ko ding in tawlrel nak a nei.

Kandung Feb 2 ah Japan ihsin tuanvo neitu pawl ra in Interview an nei ih Japan feh duhtu (30) hman an kimlo ti a si. A tamsawn cu US lawng an duhcio ve. Mela Camp Chairman Saw Htun Htun ih, ‘A feh duh tu ngai an um lo ih Japan pawl hmaisong an um lam lam” tiah a sim. Japan cu a ram ih a hruai ding pawl cu kum (40) hnuailam, hnatuan thei, innsungsang an si ding ti a si. Hih an Palai pawlih an sim daanah tui kum 3 Project theh ihsin khal Project thar tu hnakih tamsawn in lak a si vivo ding ti a si. BBC

Thailand ah Kawlram mi (9)that.

Kan dungzarh sung, daanlo vekih Thailand ram ra lut tu Kawlram mi (12) pawlcu Mesouk ihsin Bangkok an fehnaklamzin ih Gate pakhat ah palik pawlin an rak kai ngah.

An kaihmi hi minung (12) an si ih Palik pawlcun an unau sungkhat pawlin paisa ih ra tlen dingin an sim. Asinan minung (9) cu tlentu an neihlo ruangah Palik bokhat  1, khawsung mi 4 le Kawlram mi 1 pawlin cuih an kaihmi (9) pawlcu hruai tahrat in an kap that theh ti a si.

Himi thu cozah in a theih veten a kapthat tu pawlcu a rang theibik ih kai dingin thu a  suah nan hipawl hi Kawlram sungah a va luttiah Mesouk Palik zung ihsin an sim. Himi kahthat thu cu a rak kaihnak Gate hotu pa in a theih veten a mahle a mah hri thawn a thlai aw that tiah No 6 palik sakhan hotu cun 2.2.10 sun,thuthang latu pawl hnenah a sim.

An thahmi (9) lak ihsin ruak (7) lawng an hmu ih ruak hnih an hawl rero lai. Khitpyaing.

Gen. Aung San ih fapa Budhist biaknak ihsin dawi

Kawlram Budhist biaknak hotu Phungki upa pawlcun, Zalennak Pa Aung San ih fapa upabik  Aung San Oo (US ih um) cu Budhist biaknak ih dawisuak a si thu Feb 2 sungah an phuang.

Phungki hotu pawlcun, ‘a nau rori a simi Suu Kyi cu ram le miphun hrangah harsatnak phunkim tuarih a um rero lai ah a nih cu ralkap hotu pawl bawm le an duhzawng ih rak um rero mentu a si. Kan Dungih Suu Kyi inn remsal mi an cawlhter thu khalah Aung San Oo ih cawlh termi a si’ tiah an sim. Phungki hotu pawlin Jan 27 sun ahkhan Suu Kyi suah a si theinak ding le ram sung mi pi hrang ziangtal tuahsuak ve dingin ca an kuatih an ca ngan mi ah, Jan 31 tiang ziangthu hman in letlo a si le Budhist biaknak ihsin kan lo dawisuak ding timi ralrin peknak khal an ngan cih.

“Ni kan khiahmi tiangah ziang thu hman in simthei sal lo ruangah kan dawisuaknak a si” tiah Budhist biaknak hoha tu le thuphuangtu pakhat in a sim. Khitpyaing.


Leitlun Thuthang

US a thinphang

Kan hmai thla 3 ihsin thla 6 sungah Al-Qeada pawlih siatsuahnak tuar ding a phan um thu Intelligence hotu pawlcunCongress hnenah thu an than.

CIA Director Leon Panetta cun, “Kan dung X’Mas lai ih vanzam siatsuah tum thuhla thawn kan zoh a sile Al-Qeada pawl cun US siatsuah hrih a tum ticu a fiang. Cumi cu hmai thla 3-6 sung hrawngah a si a zum um ruangah nasa sinsin ih ralrinnak neih a `ul” tiah a sim.

National Intelligence Director Denis Blair khalin, Al-Qeada pawlin Binladen thih hlanah 9/11 hnakih rapthlaksawn in siatsuah an tum hrimhrim  tiah a sim ve. Fox News

US le Taiwan parah Tuluk lungawi lo

Tuluk ram cun, US in Taiwan hnenah raldonak hriamhrei le thilri tamtak ($ 6.4 billion) man a zawrh ruangah US parih a lung awilo thu official in a phuang. Taiwan hi Tuluk ih lungkimnak umlo in Tuluk hnen ihsin suak ih mahte cozah dingmi a si.

Tuluk cun himi thu ruangah a hlanih US thawn an lungkim tlang zo mi pursum leilawnnak hrek khat pawl khal a el sal. US ih Boeing Company cun himi pursumnak thu ahcun Tuluk ih kham theinak a um lo a ti ih Taiwan hnenih  a zawrh mi pawlcu kuat dingin a tawlrel rero.

Boeing Company ih hmanmi thilri hmuahhmuah ih `hen 3 then 1 cu Tuluk hnen ihsin a leimi an si ti a si. BBC

Obama in thlapi par kai sal ding Project a el.

NASA pawlih tumtahmi Thlapipar kai sal ding project cu President Obama in a elih cu hnakin leilung par ah research tampi tuah sawn dingin a forh hai. Cun NASA hrangah hmai kum 5 sungah $ 6 billion suahsak ding khalin thu a kam ta.                 Obama cun thlapi par kainak sumpai tamtuk a cem ruangah le, tuhlan hnakin thilri tha deuh an neih cuanglo ruangah kum 2028 tiang cu kai tum hrihlo in leilung parah thilri thatha le fimnak lam thangso sinsin dingih zuam dingin a forh.

Internet King South Korea

S.Korea cu leitlun internet pehtlaihawknak rang/cak bik (highest average connection speed)  a si ih Second pakhat ah 14.6 Megabyte a hmang.  Japan cu pahnihnak a si ih  (7.9 Mbps) a hmang.  Hong Kong in 7.6 Mbps a hmang ve. Cuih hnu ah Romania, Sweden, Ireland, Netherland, Switzerland, Denmark le Czech pawl in an thlun ih US hi 3.9 Mbps a hmang ve ih 18 nak a si. AFP

Nauhak 33 phurtu kai

US Baptist  Missionary pawl cu Haiti ram ihsin nauhak 33 an phur ih ramri ah ziang Ducoment hman an neilo ruangah nauhak zuarnak (trakficking) a si tin an kai. Hi pawlhi mipa (5) le nunau (5) an si ih anmah cun “Bawm ding ti lo bak zianghman tumtah mi kan neilo, hih nauhak pawl hi cawm dingih kan hruaimi an si” tiah thu`hennak hmaiah an sim. Haiti ram ah rumhimnak `ha tawk ih tuah a  theihlo ruangah mi harsa le nauhak hrekkhat pawl cu US ih pawlkom hrekkhat pawl le cozah khalin US ram sungah a lutpi thei, a sinan haiti cozah ih siannak cu lak ta a `ul, tin Haiti Prime Minister Max Belleriver in a sim. An hruaimi nauhak pawl ah kum 2 ihsin kum 14 karlak pawl an si. BBC

John Terry ih mualphonak

England Captain John Terry (tuih Chelsea ih lek) cu a nupi khal `hen cuang silo ih a maih bawhlung leh pi Wayne Bridge ih fala hlun French Model Vanessa  Perroncel thawn an rak it tlang theu ti a si.

Himi thuhla a nupi Toni (kum 28)in a theih cu ningzak le beidong ioh Dubai ah a tlan. Terry cun Valentines day cu a nupi thawn hman theisal a beisei thu a sim. Terry cu himi hminsiatnak ruangah England Captain a sinak ihsin suah a si. Media hrekkhat pawlcu Terry hi tuih a nupi thawn an `hitawk hnu (kum 11 a sizo) ah nunau dang 10 lai thawn a sual a si tiah an ngan.

A (Terry) thu hi England bawhlung hotu pawlin an relsak nan relsuak theilo in Coach Capillo ih thencak dingin an rel. Capillo cun, “Himi ruangah buainak a umlo, World Cup khalah `hazet in a lek thei ding” tiah a sim. Kan dung  (tlawngkai ni 3) Hull City thawn an lehnak ah mipi pawl cun, “Terry, na nupi khawi tawk ah?” “Na nupi ngai cu zo si?” tiah an auh ciamco. Star

2010 Miss America

Las Vegas: kandung zarhte zaan ih an tuahmi Miss America zuamawknak ah Miss Verginia Caressa Cameron cu a zuamtu 52 pawl hleih in Miss America Crown a co riai.

Cameron hi laksawng US$ 50,000 (Rm 170,700) a ngah. A pahnih nak cu Miss California Kristy Cavinder a si ih US$ 25,000 a ngah ve. BBC

Mipa in Fahnihnak a nei

Leitlun hmaisabik pacang fa hring (pregnant man) tih an kawh mi Thomas Beatie cun a fa pahnihnak a hringsuak sal.

Kan dung kum June thla ahkhan fanute (Susan) a hringzo ih tuitum cu fapate a hring. Thomasa Beatie (kum 35) hi a mipa sinak an thlengsak mi a si. CNN

Kum (9) nute in fapa te a hring

Tuluk ram saklam ih Songyoun khua ah nauhak kum (9) nute cun Jan 27 sunah fapa te (2.75 kg) a hringsuak tiah ramsung thuthang MX in a ngan. “Naute pa teh” tih an suh tikah, hinu te in, “Zo thawn ti ka thei ciah lo” tiah a sawn. Hinu te in a ihpi mi pawl khal kum 14 hnuailam lawnglawng an si thu a sim bet.

Shanghai Hospital ih a phuan daan ah tuluk ram sungih nauthlak (abortion) hmuahhmuah ih 35% cu tlawngta nauhak pawl an si ti a si. Tuluk ramih fa hring nauhak bikcu kum 1039 fapa te hrin suak tu Lina Madina a si ih kum (5) a kim ah fa a hring. Xinhua

Heart Disease ruangah US ah 400,000 thi ding.

British Scientist pawlcun US ram mi pawlcu Lung natnak ruangah 2010 sung ah hin minung (400,000) tiang an thi ding tiah an phuang.

Himi hi US ram sungih 2000 ihsin mithi pawl an natnak zohfiang in le ramsung minung pawl ih harhdamnak lam zohfiang hnuih an sim mi a si. A tamsawn cu kuakfawp ruangah a si. Bristish mifim pawlcun, “US minung pawlcu Lung hrangih a `ha mi tirawl  an ei leh kuak fawp an ban a `ul” tiah ralrinnak an pe. Reuter


Malaysia ram mi ramdangih thawngtla tam

Ram dangdang ram (10) ah Malaysia ram mi thawngtla 1,410 an um tiah Straits Times in a ngan.                              Himi pawl lak ihsin 710 cu rittheih thil (Drug) ruangah a si ih  Document falsification ruangah 246, Human trafficking 38, rukru 68, mithat 18 …pawl an si.

An tlaknak tambik ram pawlcu Thailand ah 270, Taiwan ah 116, Singapore ah 107, Australia ah 22, Indonesia ah 22, Spain ah 20, Argentina ah 8, Brazil ah 8, Brunei ah 8 le Japan ah 8 tin a si.

Himi tlun ah thuthensak hrihlo mi (lock-up ih ret laimi) tamnawn khal ram tinkim ah an um ti a si. Strait times

Theih Kau nak (General knowledge)

Leitlun minung (damlai) ih Power nei bik pawl

Forbes Magazine in 2009 sungih power neibik pawl a hrilsuak mi pawl cu-:

1. Barack Obama (US President)

2. Hu Jintao (China President)

3. Vladimir Putin (Russia Prime Minister)

4. Ben S. Bernanke (Federal Reserve Chairman, US)

5. Sergey Brin le Larry Page (Google Founder)

6. Rupert Morduch (News Corp. Chairman)

7. Micheal T Duke (Wall Mart Stores,Inc President)

8. Abdullah Bin Abdul Aziz al Saud (Saudi Arabia King)

9. William Gate III (Bill &Melinda Foundation Co-Chairman)

10. Pope Benedict XVI (RomanCatholic Pope)

Osma Binladen hi (37) nak a si ve.


Christian tambik umnak ram pawl

No.Ram Hmin        %           Kohhran tum deuh pawl

1.   Vatican City  -100%         Roman Catholic 100%

2.   San Marino     – 99%        Roman Catholic 99%

3.   Romania         – 99%        Orthodox 86.8%, Catholic 4.7%, Protestant 7.5%

4.   Armenia          – 98.7%     Orthodox hlir deuh an si

5.  Greece            – 98.3%      Orthodox 97.0%, Catholic 1.0%,Protestant 0.3%

6.  Moldova          – 98.2%      Eastern Orthodox

7.  Malta               – 98%         Roman Catholic

8.  Venezuela       – 98%         Catholic 96%, Protestant 2%

9.  Bolivia             – 97%         Catholic 78%, Protestant 16%, Kristian dang 3%

10. Paraguay      – 96.9%       Catholic 89.6%, Protestant 6.2%, Kristian dang 1.1%

Biaknak lam hruaitu ropi bikpawl

1. Moses ( 14th century BC )    Hebrew Prophet

2. Buddha ( 5 or 6 century BC )    Nepal

3. Jesus of Nazareth ( 6-4 BC )    Israel

4. Gregory the great ( 540 – 604 AD)  Italy

5. Muhammad ( 570 – 632 )               Western Arabia

6. St. Benedict ( c 480 – 547 )           Italy

7. Francis of Assisi ( c 1181 – 1226 )Italy

8. Martin Luther ( 1483 – 1546 ) Germany

9. St. Ignatus of Loyala ( 1491 – 1556) Spain

10. John Calvin ( 1509 – 1564 ) France

11. John Wesley ( 1703 – 1791)  England

12. Sir Ramakrishna ( 1836 – 1886 ) India

13. Pope John Paul II ( 1920 – )  Italy

14. The Dalai Lama ( 1935 – ) Tibet

(Visited 124 times, 1 visits today)

Comments

comments

One Comment

  1. Kan Falam Times ih ca hi voi tampi ka rak lei theu ih tu cun siar ka paih nawn lo! Kan Lai tong ih ngan theih mi rori hman hi Kawl tong hmang ih nan ngan mi a tam tuk ih luak asuak men! Phunhman duhdawt ih hnatuan tu taktak nan tling lo! Lai tong hlo sinsin ding ih zuam rero hi nan bang!!!!!

Comments

%d bloggers like this: