Thinlamtah Raalthatnak

June 18 

Tlawngkai Nili

 

Thinlamtah Raalthatnak

 

Siar:

Tirhthlah 4:5-13

 

Khonsil upa pawl in Peter le Johan cu fimnak le thiamnak a nei lomi mi menmen an si nain ziangtluk in an raal a ttha ti kha an hmuh tikah an mang a bang ngaingai. Cule annih cu Jesuh ih rualpi an si ti kha an mang saal.   – Tirhthlah 4:13

 

Kumkhat Sung Baibal:

   Nehemiah 10-11

   Tirhthlah 4:1-22

 

England ram London khuapi hnar ih Hounslow ah mino pakhat cu lamzin parih mivak pawl hnenah thuthangttha a sim. Ziang siar lotu, zawmtaitu, le a thusimmi ngaitu pawl kha thinheng lo le awka neemte’n cakzet le fiangzet in a thinlung sung ummi pawl a sim hngai thluh. A mit-men daan, a mit-hmai um daan le a aw-suah daan in, zaangfahnak lungput a neih zia a langih mi soiselnak thu a sim lo. Jesuh ih duhdawtnak le zaangfahnak thu lawng a sim.

 

Kawhhran an rak thoklai caan ah Peter le Johan khal in raaltthazet in thu an sim dah (Tirhthlah 4). Culai ah biaknaklam hruaitu pawl in an rak hmuh daan cu ziangvek a si? Peter le Johan cu fimnak le thiamnak a nei lomi, mi menmen an si nain ziangtluk in an raal a ttha ti kha an hmuh tikah an mang a bang ngaingai. Cule annih cu Jesuh ih rualpi an si ti kha an vun mang saal (c. 13).

 

Cuvek raaltthatnak cu saya ttuan dingih zirnak ah an zir ruangah si loin Sayapa hnenah reipi an um ruangah a si. Jesuh thawn a pehpar awmi thu le kumkhua nunnak thu pawl cu an thinlung thukbik sungah a taang ringring.

 

Cuvek thinlung sungih raaltthanak cu Hounslow ih mino pa ih mit-hmai ah a cuang. Mi in cuvek mit-hmai kan sungah an hmu ve pei maw?

 

Thuthangttha na sim ngam pei maw?

A hlomi hnenah Pathian Thu?

Jesuh in ttuanman a lo pek leh ding,

Misual an tthangphawk ding.

 

Khristian pakhat cu siangpahrang pawl ih Siangpahrang bawibik hrangah ttongsaktu palai a si.

__._,_.___
(Visited 12 times, 1 visits today)

Comments

comments

Comments

%d bloggers like this: