SUAHCAM LUNGAWI (Happy Birthday)!

Salai Liante

Titi nuam men aw. Khirhkhan (serious) tukih lak ding a si lem lo. Ziangtivekih kan rak hman khalle sawiselnak si loin hiti’n a mawiin a dikdeuh kei maw ti thu men a si.

Suahcam lungawipinak ah Mirang ih Happy Birthday hi kan Chin ṭawngte’n ngantu kan hnihthum vivo ih a lungawium nasa. Asinan, kan ngandan lawngte a bangaw lo ruri. Suahcam Lungawi, Lungawi Suahcam, Suahcam Cibai, Suahcam Sunglawi, tvk.

Chin ca le ṭawngtei’ suahcam, neihawknak le cibaiawknak hmang duhtu kan tam vivo ih a lungawium zet. Hivekin Chin ca le ṭawng ih hman hi uar thluh thei sehla a duhum sinsin. Amahlawngte Mirang ih kan hman lar zet mipawl hi dairekin kan Chin ah kan let pang ṭheu vek a bang. Maklote vek a bang nan dik lo ih kan hman pang le zawngsang a awlte ih thlengsal a har zet ṭheu.

Rel duhmi tampi lakah a hleicein suahcam lungawipinak hi zohbik sehla tiah thulu khal hiti’n kan run tarnak a si.

Mirang le Chin hi catluan kan hmandan a tlangpithuin a linglet. Tt.”I am reading the Newspaper” cu “Ka siar lai Thuthangca” kan ti lo ih “Thuthangca ka siar lai” ti’n kan hmangsawn. “I’m working in Singapore” ti cu “Ka hnaṭuan ah Singapore” kan ti ve lo ih “Singapore ah hna ka ṭuan”kan tisawn.

Cuvekin kan ṭawng le cangandan dung le hmai hi kan linglet thluh deuhthaw a rak si. Tt. Good Morning (Zing Ṭha), Good Night / Sweet Dream (Mang Ṭha), Beautiful Lady (Fala Mawi), True Love (Duhdawtnak Dik), New Year ( Kum Thar), tvk… A hleicein Lungawipinak, Cibaibuknak, Lawmpinak, Catar, Thupi/thulu tivekih Adj le Noun hmankawp a si tikah Mirang thawn kan linglet lawlaw.

Tt. Mirang cun Merry X’mas, Sweet December, Happy Birthday, Beautiful Lady, Good Morning, Happy Journey, tvk an hmang. Kannih Chin ca ah, hmin hmaiih kan ret le a mawimi fala, a lianmi ram, tvk., hmin dungih kan ret le Fala Mawi, Ram Lian., tvk.

A tlunih Mirang ca kan hman lar zet mipawl khi Chin ca ih kan hman tikah, tt. Sunglawi X’mas, Thlum December, Lungawi Suahcam, Mawi Fala, Ṭha Zing, Nuam Khualtlawng, tvk., si loin X’mas Sunglawi, December Thlum, Suahcam Lungawi, Fala Mawi, Zing Ṭha, Khualtlawn Nuam, tvk, ih hman ding khi a sisawn ding a bang.

Curuangah “Happy Birthday” khal “Suahcam Lungawi” ti ding khi a bang.

Comments

comments

Comments

%d bloggers like this: