Revival Hrang Pathian Hman Mi Evan Robert

REVIVAL HRANG PATHIAN HMAN MI EVAN ROBERT

                                                                                        Timothy Sui Lian Mang

1904 October ah Wales ah revival a thleng ih, cucun leitlun ram tin a hngawr. Revival hrangih Pathian ih a hmanrua ih a hman mi cu lung meihol laitu, mino, Bible duh zet le thlacam taima Evan Robert a si. Hih revival ah hin mi 100000 lai an piangthar tiih record a si. Evan Robert hi a thih tikah ropi zetih phum le mi theih a si lo.

Kum 100 liam zo ah khan Pathian in Wales nitlaknak lam cu revival in a hnin ih, mi a thawng  a thawng an piangthar. Cui revival cun leitlun ram dangdang khal a hnawng nasa. Cui revival hrangih Pathian ih a hman mi cu lung meihol lai, Bible duh zet, thlacam nun nei, Bible zirnak khal nei lo, mirethei te, kum 26 mi Evan Robert a si. (Evan Robert ih umnak inn, revival a thlennak biakinn le Evan Robert phumnak thlanhmun pawl ah hi cangantu hi 2009 ah a a va thleng ve).

Thla kua sung, November 1904 ihsin August 1905 sung hi cu Evan Robert hi Wales ram ih milarbik a si. Leitlun hmun i kipin amah hmang ih Pathian thilti revival ra zoh dingah Wales ram ah mi an ra. Cutlukih milar Evan Robert cu 1951 ih a thih tikah mi in an thei tuk lem nawn lo.

Evan Robert cu 1878 kum ah Khristian sungkua, Bwlchymyndd khawte, Loughor, South Wales ah a suak. A pa hi lung meihol laihnak ah a tuahmawhaw nasa tuk ih, a fapa tlawngkainak ding hrang sumpai a neih thei nawn lo ruangah, Evan cu ca phunsang zir loin tlawng  a suak ih, a pai hnaṭuan a bawm. An sungkua tidan pakhat Bible byheart hi a nunpi ih, lung meihol an laihnak khalah Bible cang tete a byheart rero. A Bible hi lungkua ah a thup ṭheu. Ni khat cu a lung meihol laihnak hmun a kang ciamco ih, Evan ih Bible te cu kang loin a him. Evan hin Pathian halnak nasa tuk a nei, a halnak cu a ṭhang deuhdeuh. A rualpipawl an leh lai tivek khalah Biakinn ih feh, hlasak, thlacam, Bible siar tivek hi a duh sawn. Kum 20 a ti tikah Bible a byheart mi a tam zet thlang. Thla a cam, thuk zetin a siar mi Bible a ruat, cutivekih can a hmannak ah rawl ei tivek khal a hngilh ṭheu. A thuhla an ngannak ah larnak phun, mang lam vek phun ih Pathian thawi pawlkawmawknak hi a nei phah ṭheu ti a si.

Evan parih Pathian kut kha an Pastor in a hmuh tikah, Bible tlawngkai dingin a fawrh. Asinan Evan in thlacam le Pathian thusim a duh sawnnak ruangah a kaisuak ta lo.

September 1904 ah Evan cu khawte evangelist Seth Joshua ih thusim ngai dingin a rualpipawl thawn an feh. Joshua cun kum reipi Pathian in  mipi lak ihsin “Elisha” vek     “puan huham nei” tungding dingin thla a rak cam. An khawmnak ah Joshua cu Pathian hnenah, “ Bawipa in khuai aw, in bawkter aw,” tiih a au kha Evan in a theih tikah a sungmuril a hnin nasa tuk lawmmam. Cule, “ I khuai aw, i bawkter aw,” tiah Evan cu Pathian hnenah ring zetin a au ve. Cun Pathian duhdawtnak a nun ah ahleice ih hmuhsuahnak a nei ti a si. Neta lamih a mah ih a relsalnak ah cun, “Khai can ah khan Pathian in a duhdawtnak in i bawkter, i kunter, cumi cun ka nunah hlimnak maksak, hnangamnak maksak a khat,” tiah a ti.

October thla ah Evan cun thlapi  a zoh ih, Wales ram lam hawi ih ban phar vek khi a hmu. Cutikah mi 100000 piangthar dingih a thlacam mi a phi si dingin a ruat. Cuticun revival cu a thleng ngaingai.

October 31, 1904 zan ah Evan cun mimalte rual cu revival thleng dingin thlacam a hruai (Hih cangantu khal cui hmunah a va thleng, 2009 ah). Cui zan ah cun thlacamtupawl nun ah Thlarau Thianghlim in hna a ṭuan ih sual theihawknak nasa ngaingai an nei. Cutin thlacamkhawm cu zantin an nei. A cancan ah cun zanṭim tiangtiang, a cancan ah cun zing nazi 4 tiangtiang tla thla an cam. An khawmawkdan cu danledun tiṭheṭhe ih hruaiawk khal si lem lo, an ṭap, an hni, an lam phah-hlim tuknak ah- an kekkuai, sual ṭemṭawnnak ihsi hlihsak an si ruangah an hlim, an ai a puang. Mi tampi Pathian lam an hawi.

Cutivekih an khawmawk laiah Evan in tidankel vekin thu a sim lo, khawmawknak hmun laifangih mipi fehnak ihsin a feh, a kirsal, a topawl thu a sut phah. Thlarau Thianghlim in mipi nunih hna a ṭuan laiah Evan cu kaihruaitu vek phun khin a cangvai men. Evan cun revival hruaitu tivek phun ih mi ih an ti ding le an theih ding khal a duh lo, thla an lakpi ding tla cun pulpit dung lam tivek ah a relh, a thupaw. Wales rampi ah revival cu reilote sungah a darh thluh. Zudawrpawl an khar, an sualzia an theiaw ih Bible an siar, an zir.

Cutivekih revival a thlen laiah cun sawiseltu cu bo lo a si – an khawmawkdan cu thupi lo tuk a bang, an hoha deuh a si, programe tifekfek a um lo tukaw tina an si. An khawmawknak cu milai cangvaihnak a si hrimhrim lo, a danglam ta rori si a ko. Evan cun nunau group hlasaktu a nei, annih cun hla an sak, an hruai, an ṭap, cutin mipi thlarau boruak an hlumter. Amah Evan rori khal pulpit tlunah thla a cam, a ṭap ṭheu. Mit rori ih hmutu pakhat ih a relnak ah cun, “ Evan cu a lungkuai tuk ih pulpit ihsin a tla, mipi cau zetih an um laiah,” tiah a ti. Mipi cu rawl ei khal hngilh in a khawm can a um.

Vei hnih vei khat ah cun Evan hin Thlarau fimnak nei in thil theih theinak a nei, sualphuang lo an um tivek tla a thei. Cule an sual an phuang ih, an khuk an bil, an ṭap, thla an cam. Pathian Thlarau cun Evan cu a thuam ih, mipi Pathian lamah a hruai vivo. Mihrekkhat cu sual theihawknak ruangah an ausuak, mihrek an ṭap, mihrek Pathian huham ruangah an khur. Thuthangca suahtupawl khalin Thlarau Thianghlim a cangvai a si ko tiah an suah.

Amah Evan Robert rori in revival cu thil pali parih ṭhumaw a si tiah a zum:

(1)   Theih mi sual hmuahhmuah phuan.

(2)   Thuthup hmuahhmuah le rinhlelhnak hmuahhmuah hawlsuah le phawrhsuah.

(3)   Langhngan ih Jesu phuansuah.

(4)    Thlarau Thiangghlim thu lung rori dingih tiamawk.

Wales ram ah revival a thleng ti an theih tikah, leitlun ram kip ihsin mi an. Thilumdan an hmuh mi le thu an theih mi cu anmai ram cio ah an phur ih an than.

Revival Umdan

1904 revival hi thil maktak cu a si. Phusing vek rori in Thlarau in a nuai hai ih, Nitlaknak lam Wales ah cun mi an piangthar curco. Zarh 10 kim lo deuh ah mi 3000 an piangthar.

Abertullerry khua ih Ebenezar Baptist Church ah mi 1000 hrawng an benaw, an khat ringring. An khawmawk hi phurnak mak zet thawn zanṭim tiangtiang an khawm.

Wales ram pumpi ah cuvekin biakinn ih an khawmawkdan cu a si. Thungaithlak suahin thla an cam, hla an sak, an khawmawk hi nazi in a uk hai nawn lo. Hla pakhat cem thei lo ih, an sak nawn rero mi pakhat cu “ Here is Love vast as the Ocean” ti mi a si.

Ziangsiarlo ih ra zohtupawl khal an sualzia an theisuakaw ih, thin na zetin an ṭap, thla an cam. Thlarau cun phusing vek rori in a ram huap in mipi a nuai. Hmun tin ah, biakinn tin ah revival a thleng. Evan Robert hi revival hruaitu ti ih theih a si tak ko nan, Evan Robert a thlen lonak biakinn le hmun khalah revival in a nuai hai thotho.

England le Scotland lam ihsi tla hin Thlarau cangvaihdan zoh dingin an ra suakkhawm ciamco. Wales revival hi reilote ah a reh, ziangruangah a rei lo si pei ti hi zumtupawl an titi mi le an elawk ringring mi pakhat a si. Mi 100000 rori piangthar ti hi thil mak tuk mi a si. Kan Lairam khalah, Kawlram khalah thleng sehla a duhum tuk nan! Man pe ih thlacamtu kan ṭul ta a si bik ko.

London khawpi Westminster Chapel ih Pastor hminthang, Pathian thutiam zet Dr. Morgan khal Wales revival thu a theih tikah bawm an ṭul pangah tiah Wales ram ah ni hnih a va cam. Thilumdan a zoh tikah minung cangvaihnak a si lo, Thlarau cangvaihnak kan cawlter sawng pang ding a ti ih, a tlungkirsal ti a si.

1905 ah cun Evan in hminsinnakpawl le buaibainak tete a langter. Amah hi Khrih-ih tuarnak ih lut in le a rawngbawlnak khal zianghman lole hmantlak lo ih ruahawknak a nei. Kawhhran mipi le rawngbawltupawl khal Pathian lamah nan dai tuk tiah a kawk hai. Mipi khal Pathian cangvai thei loin nan dawnkham ti tla in a kawk hai ih, an khawmawknak ihsi tla in a suak.

Can a rung feh vivo tikah Evan ih umdan, nundan cu kel a awh nawn lo, a phun dang deuh vivo. Neta lamah tla cun ṭihnak a nei ih, khawmnak khal ih a feh lo can a um. Khawmnak ah Evan Robert in thu a sim ding an ti mi khal an ṭhulhsal can a um.

Ziangruangah cutin a um si pei? A san cu hitin a si tiah an zum: Revival huham le cangvaihnak ah khan Evan Robert cu a taksa, a thinlung a hmang tuk ih a cau. Cawlh can a nei lo, rawl hmanhman a ei lo. Mipitlingpawlih thurawnpeknak a dawng lo tla  a si men thei.Taksa tuamhlawmtu, duattu, kilkhawitu ṭhiṭha a nei lo khal a si thei.

Sawiseltupawl cu an lungawi in remcang lain an sawlsel sinsin. A taksa lam a hngilh, bukawtawn a ṭul sisi ti tawk bo lo. Evan cu tawkfang hnuah rawngbawl in a umsal ko nan, a cak thei nawn lo ih, khawm ding ti an than hnu khalah an ṭhulhsal ṭheu.

Tawkfang hnuah cun Evan cu a hung cak deuhsal ih thusim in can a hmang theisal. Asinan “Thlarau in thusim lo dingin i kham,” ti in thusim an sawm tik khalah a el can a um hnuaihni. Rawngbawlsal in a um tak ko nan, kel a awh taktak thei nawn lo. 1906 ah causal.

Jessie Penn-Lewis in Evan Robert cu Wales suahsan in a England ah a hnenih um dingin  a sawm. Jessie Penn-Lewis hi milian a si ih, a pasal thawi inn tumpi an neih mi Leicester, England ah Evan Robert cu Penn-Lewis te nupa hnenah  a um. Evan cu a taksa le a khawruahnak rori khal a cau hnephnep. Ihnak pindan ah kum khat rori a um ti a si.

Hitin cangantu hrekkhat cun an ti, “ Jessie Penn-Lewis ih Evan Robert hnenih ca a kuat mipawl ihsi thil fiang zet mi cu, Penn-Lwis hin Evan hi Wales revival lak ihsi la tahratih  amai thlazar hnuai, a ciahneh theinak hnuaiih umter a duh ti a fiang. Cutin Penn-Lewis in an rawngbawlnak tla a lar phah ding tiah a ruat a si ding. Revival hruaitu si ko hman sehla, Welsh kawhhranpawl ṭhanso lonak ah a cang sawn pang pei maw ti tla Penn-Lwis in a phan ruangih a hnen um ding a sawm khal a si thei,” tiin.

Penn-Lewis cu nunau a si nan, Thlarau lam fimnak nei a si ih, Evan Robert cu Pen-Lewis in doctrine dik lamah a ciahneh thei. Minung hlun thihnak lam hi a uar mi  a si. Evan Robert cu Jessie Penn-Lewis te hnenah kum 8 a um, a um sungah Jessie Penn-Lewis ih magazine “The Overcomer” ti mi ah ca a ngan ṭheu. Cun Jessie Penn-Lewis ih  “War on the Siants” ti mi cabu ngan tla  a bawm. Evan Robert in neta lamah cui cabu cun revival canih buaibainak donak a si, amah Evan rori khal a telnak, Pentecostal cangvainak donak a si ti a theisuak.

Evan Robert cu a rung damcah tikah Evan cu Pen-Lewis-ih conference counselor tla a ṭuan ih, Thlacamnak tlawng ti mi tla ah a zirh. Neta lamah cun midang hrang thlacam ih pekawk pumhlum a duh ruangah Evan Robert cu mipi hnenih rawngbawlnak ihsin a bang ih, amahte in a um.

1920 hrawngah Evan cu Brighton lamah a ṭhawn. Cutawk ihsin Wales ih a sungkuapawl le a rualpipawl a dawr. 1928 ah a pa a thi ih amah Evan rori in phumnak sermon-nak a nei. Cui ṭum khalah Moriah ah revival can reilote a um ti a si. Khawmnak ah mipi an ra ciamco. Evan cun damnak hrangah le runsuahnak hrangah thla a camsak hai. Hmai lam thu phuannak phun tla a hmang ti a si. Asinan kum khat hnuah cun Evan Robert cu mipi hmaiah lang nawn loin a um lanta.

1931 ihsin Mrs Williams te hnenah a um ih rawngbawltupawl hnenah ca a ngan ṭheu. 1949 ah a harhdamnak in siat lam a pan ih, January 1951 a thi. A ruang phumnak can ah mi za tel in Wales revival hrangih Pathian hman mi Evan Robert cu upatnak an ra pe.

Evan Robert nun zoh tikah ka thinlung khawruah a har. A pekawknak, Pathian a duhdan, thlacam nun a neihzia, nun thianghlim a neihzia pawl hin i neh zet. Revival hruaitu a si, mitangdawr a sinak khal hi upat tlak lawlaw a si. Mi 100000 rori piangthar ti mi cu a mak tuk. A nun neta lam zoh tikah cun mizangfahum pakhat a si. Amai ram Wales khal suahsan thlul, rawngbawlnak ṭhiṭha kha nei thei tuk nawn lo tivek hi a si. Asinan  revival can rei lo te sungih mipi 100000 lai piantharnak hin khawvel pumpi a hninter rori. Leitlun thuanthu khalah hminsin a tling. Pathian ih mi a hmandan hi kharuahharza a si ko.

*****

(Visited 83 times, 1 visits today)

Comments

comments

Comments

%d bloggers like this: