SONNET SETUENCE

San-seu1
Thahram le tleuzung tha2 suah ‘radon’3 cun
Ni in, pathum le hmun hra ih then riat4
Caan a hman sung a suah a tha neihsun
San-seu kim in a atom hrek a siat.
Ka suahkeh lungthin zoi’ dai loi’ himmi
‘Radioactive’5 thil a can ri’n a sah
Duhnak thahram le tleuzung vek cumci
A hrek a mot kum hleihnih kauseu ah.

A nget lo na’n a tet, a vun a hik
A letza in a hnget hauhruang dawlsang
Hmu vek hlah hai mithiam khalin a hrik
Sivai hmang ih hlawm in tum kei, duh hlan’ng!

A hrek tangsun khal cu hmantlaklo in
Phiang repro vek ruh reureu in a rel
Hlanih san-seu a rak hmanmi ahkhin
A rauthla, thazang hmuah a rak hlanfel.

Nithla siarnak khalin a uk lo hnu
A ruhseh, an ziam a hmuinak neihsun
Manpulomi sehsol tio lungtum cu
tialca ngan hnu’n khanlung raang ah ka phun.

J C Kip Ling

1. san-seu (half-life) : Radioactive element pakhatih cahnak thahram neihmi pawl a kauseu siatral (decay) dingih a reimi caan. (asl) A atom kauseu siatral dingih a reimi can

2. tleuzung tha : tleu(light) si loin ‘ray’ tinak.

3. radon: nuclear thahram a suah theimi radioactive thil phunkhat. A san-seu cu ni 3.8 ( 3.8 days ) a si.

4. Niin pathum le hmun hra ih thenriat: 3.8 days

5. radioactive thil: nuclear tleuzung a simi alpha, beta or gamma ray suah theimi thil.

SONNET SETUENCE

Ngunthi Tang

Fur khawdurih suahcak…..ruahnak…

Durpi sungah a cor….a for….

Zingni tlang maw,Ngenfung a hrol!

Sun ni tlangah Runti a sang

Zuun hriphangah Ngunthi a taang.

Joe

Ngaihla-Zaihla
Sahnar rawn liamcia Chinhrin pi le pu,
Thlanhri le thisen Chinram hrang’h hlantu,
Tian ni rei hmanseh nan nun, sul le hnu.
Chinland zautlang ah tlaitluanin a fu.
Tet in heu hlah seh nan lungsung zaihla,
Nget in ei hlah seh nan sermi an-ka,
Santiluan dawi nunphung le tesinfa,
Sangih khaitu ah cang seh, nan khanca.

Lungthlitum zo dairial luang hrih ko law
Dolhtu ramcar do in na tha suah aw;
Sunmang tla an lennak ruun ah cun maw,
Rimhmui pardawh phunkim’h zilthli a thaw.
Ruun-inn nuam cu ramro ah zosi ser?
tiabeuhter hlah uh kan lennak zualpher.
Hrinhnam lungput phunhnam bawmtu siter,
Zuam uh pumkhat sinak sundir a her.

Santiluan thlun tluangkip hrawng Chin fahniang,
Pawl in sungnu mangpai’ ngaihla, aw-thiang
Hoisanh hla’uh law, ninu a mih hlan tiang.
Vanhnuai ah kan hu a tiau, zosi siang?
Zilthli hrang law, Chinland hmuifu co seh,
Vanlam daifim le lei daifim co seh.(Sem.27:28a)
Zingnui’ taanghlum ah par bang ee sal seh,
Pipupawl keneh kan nun in hruai seh.

Kianghrol

Ka Pi’ Khanca
A hi pialrem dai’h hin ka pi zal ngai.
Vawlei hrinih pelh loi’ thlun mi zalam;
A ruangpum cun cawlhnak ka pan titai,
A thlacam aw ka lungthin sung a cam.

Zatial a kut nem cu damnak nunfu,
Ruuninn tin hin ngai hai a thlacam hla.
Zalam hmuahin hrelh lo’n a sul le hnu,
Sumtual rawn hi a thlacamnak thlawhhma.

Sungkaw kip hrang hmuifu dilin,
Ruun kip hrawng maw rawl-ti hlei loi’,
A hrang hrahhmun a thlacam-cuk si ngai.
A vahvaihnak ram in, a tu, a tin,
Vancung a Pai taang hlum sungah cawl ai.

Vang-ar

#( Ka pi Phun Awi ngansanmi a si.)

Lairam Laihnam Hualvan
Thimnak lal Awk nunrawng’n Ninu a dolh,
Sunvang lai cu thim in a ram a luah;
Voiziat khal keu loin a pum’n a volh.
Buainak phunkim siarcawk loin a suah,

Thimnak ralphaw hmang in fifir, suamhmang,
Pawl in duhtawk saam an rak cai lailai:
Ramkipah zu le va pawl an rak hrang,
A tleu themte hmuh cak lung a anhai

Ninu riantu si-ar, thlapa pawl le
Tuan timtuah thei loin thim in a khuh;
Eicop hlawh-aw pawl hrang tuar har hleice,
A tleu hmuh cak ruahnak a molh thim thluh,
Zalam tluan hawl hmu thei loin ka hawr
Ninu suah beiseinak thinlung a mawr.

B. Ngur

Nunu Papa

Thuanthu phunkim

Pipi’n i sim

Cakbik pupu

Muthla a neh

Fimbik uu

Tlawngkai a feh

Vanlai thlapa

Tluktu papa

Sundir ninu

Hluantu nunu

Ninu Thlapa

Nunu Papa.

S. Kei Uk

(Visited 59 times, 1 visits today)

Comments

comments

Comments

%d bloggers like this: