Ka Morning Girl II

Ka Morning Girl II

By: Hniangsinpa

Sizung ka hung thleng zik thlang. Ka moto cycle cu ka ti ding ta ih, a thlalangah ka zohaw ta. Ka zing tho kha ka hmai ka phiah lo maw si aw? ka ti aw deuh nan, ka vun ruat ih, ka phiah ko in ka thei fawn. Ka Morning Girl vun hmu sal ding cun, ka hmai khal hi an zuur zik thlang a si lo sawm. Theih teh in thei lai kemmaw? Hmun teh ka hmu ngam ngai kemmaw? Hmu ngam ding e… tiin keimah le keimah ka hnemaw ih … a hmin hman ka theih hlan ihsin ka rak duh ih, zo dang hrang hmanah ka siang lo. Ka hmu ding, ka tawng tengteng ding tiin, ka cycle cu ka vun nun ih ih, siizung sung lam hawiin, phur phah, phuhrungaw phah cun ka mawng.

An umnak Room number cu Receiption ah ka vun hawl ih, theih a rak har lo zet. A hmin an rak thei zet ih, cu hleiah an Receiptionist i zoh dan kha … ka kiangah ka Morning Girl a um lo pam… tiih thu hnihkhat vun thlah ta ka duh nan, ka lung tur rang ut-o cun hmailam pan lohli dingin i fial sawn in ka thei. Corridor ah ka phei ih, an room ka thlen hlanah, cleaning room ah ka lut ta ih, cunah ka hmai le ka sam cu awmang tawkfang ka rem ta. Hmuh lohli ka hiar fawn, kum tam lamah ka ning lamlam a zak thup lala fawn. Falam phunsang pawlih an VCD LiveShow tuahih hla pakhat, “Um ngaihnak khal ka thei lo” timi kha ka hrang hmang ha ti ruah a ol te.

Mu le mal khal ka thei nawn ngai lo. An room sangka ka vun ong, ihkun parah mi na besia ti theihthei ngaingai a um. A hmel ka hmu fiang thei lo ih, form raang hruh, sam dum sau lam deh hin i rak phen, ka thinlung cu an sualaw zet. Ka Morning Girl kha a na a si kemmaw? Ziangah in sim lo ih a um mai thei? A…a…a a si thei lo, ka lut sual a si ding… ka ti aw thul, ka hnok tuk. Zianghman ka ruat thei ngai lo ih, ziallam zoh ih ka kun lai fangah, “U Simpson…” ti aw thei in ka thei aw. hiar lo zet cing cun ka hun hawi suak cu!!! Ka hmaiih ding, form raang hruh kha …. Ka Morning Girl kha a rak si !!!…

Tong ding thei lo in kan pahnih in tawkfang kan um ih, zohaw duh si, ngam ciah si lo, ngam zik vek ih vun zohawk le mit le mit a tawngaw cutci lala fawn… ka hmai ah thlan a luang ti ka thei nan, ka hnul ngam ciah fawn lo… upa sawn ka si nan, ka dang cuang lo. Zawhte zinghnam bawh vekin ka um khiokhi. Sangka a ongaw ih, sayama pakhat a rung lut. “Doctor, ziangtin kan tuah ding?” tiah, ka morning girl cu a sut a si cu!!! Mak ka ti tuk… ka thinlung ten, “Ka rei!!! Dawktra (Doctor) maw a rak si…” ka tiih, ka ttim sungso khin ka thei aw.

An sizung coffin ahcun kan cawlih, worker pakhat hnenah kan ei le in ding cu a vun cah. Tong hmaisak ka vun tum ih, anih khal a ka a rak aang ve ciah. Zohmanin capoh an tuah lo nan, kan pahnih cun kan hni ciamco ta. “Tonghmai sa aw” ka tiih, “nangmah mipa na si kha, na upa sawn thawn” in rak ti. Cumi hnu cun, kan boruak a zaangkhai deuh sutsi in ka thei. “Dcotor na rak si zo maw? khuilam ah ha na zir, na tthehnak a rei maw?” ka tiih, a ni cun “Aw, ka si cu a si ve thlang hi. Saint Petersburg I. P. Pavlov State Medical University, Russia ah ka kaiih, ka tthehnak a rei hrih tuk lo, nangteh ziang na tuan?” tiah in sut ve. “Kei cu, Singapore Polytechnic, 500 Dover Road, Singapore ah, Technical Engineer ka ttheh thei fangfang” tiah ka rak sawn.

Ka eile in ding khal a cem theh zo nan, kan thurel cu a muril kan thleng hrih lo veve. Thusuhduh tam zet ka neih vekin, a ni khal in a nei ko ding tiah ka ruat. Ka suhduhbik cu, ‘Ziangah ka tlai zo maw? in ti’ ti hi a si nan, ka sut ngam ciah lo. Kan tlawngkai lai thu pawl kan ruahaw phah, kan hni phah nan, kan thinlungih um cu a si lo. Simawk kan duh veve vek khin ka thei nan, kan ngam ciahlo veve a bang. Pasal a neih le neih lo ka thei lo nan, a kut kehlam ih zunghruk ka hmuh lo ruangah le, hruh bangnak awm hmel ka hmuh lo ruangah ka thupten ka hna cu a ngam ko.

Emergency um pang ka phang. Ka fehsan siang lo, in taan khal ka siang fawn lo. Ka sim ngam ciah si lo, sim lo ih um le ka phang fawn. A lak le lawh ah ka heraw ih, thu mumal ngailo ka ttong suah mi a um ko ding nan, educated a sinak ruangih i theihthiamnak zawn khal a um zet ding. Russia ram hmuh ka hiar lo a si lo, a thuhla theih duhlo khal ka si lo, ka duhmi a dang hrih…anih khal ziangdang va ruat ce hlah… kha laifang ahkhan kan thinlung kha Scan theih sehla, kan tong suahmi thawn a bangawk lo zia cu … khuahlan phun III ong lo khalin va palh vek ta hlah hai ci.

Neiaw kan si fawn lo, fala le tlangval cu kan thenaw lo thei lo cu a si bik hi … “Zanah ziang na tuah ding?” tiih kan tlan zawngih in suhnak cu, ka sawn hiar zawng tak a si vek in, ani khal in ka sawnnak awka cu a ngai hiar zet mi a si ve thotho ka zum. “Ziang dang tuah lo ding” ka tiih, “Cucu, na ra leng man ding tinak maw?” in ti cu, ka duhthusam a si, i ti lo khal sehlah, ka leng thotho awm zik si, “Leng ding lo sawm. Na Coffee tuah ka in lonak a rei thlang si” tiin ka hei sawn ih, hni siamsi phah in “Bye… se u soon” i tiih, a kut in zaap. Kei khal in ka kut cu ka rak thlir ve.

Zanriah in ka pum i ti puar theu nan, khai zan kha cu, manglam rawlei vek ka si. Ka kim lo, ka kaa a thaw lo a si lo, rawlhmeh khal ka duhlo zawng a um fawn lo. Ziang dang a si lo… Ka Morning Girl tei inn lam ihsin hiipnak a nasa sawn a si hi. Rawlkhawh veten vun suah cih ka duh mai nan, a tuan tuk. TV hmaiah ka to nan, ziang a suak ti ka thei lo. Ka nu in, “Simp… thaizing khualtlawng ding na si kha” ti phah ih, ka vorhlam liang i run ben hnu lawngah si innsungah ka um ti ka theihawk fang. Cui kan tlawn ding cu kan Senior Engineer thawn kan tlawn netabik ding a si. Kan tlun cun a dinhmun cu keimai luah ding a si thlang.

Khua a thim har sualso in ka thei. Ni tlak khal a tlai ce in ka thei. ‘Joshua khan ni a kai ding lala hmang ha? ti a olte!!! Kuak bawm khat rori ka zuuk theh thlang ih, a thar on phah in inn lenglam cu ka pan hruanhro. Pasaltha sahrang dawi cu ka cangvaih dan thawn cun bangaw lo tak an si. Ka khulfung dah lo nan, lamzin tluanin thu ka ruat. Motorcycle ka keng lo, a san cu a ke in in thlah phah dingih, zan zilthli dai hawp phah in, thunuam kan rel tlang ding ti ka duh ruang sawn ah a si.

“Rung lutaw” tiih ka sangka kingmi in sawn hnu ah, kei khal ka lut ve cih ih, a pi thawn an rak um. Tonak in khih hmuhmi ah ka to ih, cumi hnu ah, thu mallai a pi thawn kan rel hnu ah, a pi cun inn tlun lam a pan san ih, kan pahnih caan a si thlang. Tui zan cu ka thlah nawn lo ding, ka sim ding, ka sut ding, thu neta tiang kan rel ding … Mopuai khawnglawng khal kan pahnih hrang tum thlang seh… tiin ka thinlung cu keimah le keimah ka forhfialaw rero. Ka aw cu ka vun thian ih, ka kuak cu phorh in ka zual. A fel a si ding, Ashtray i laksak hnu ah, “U… kuak cu na fawp lai ko ti?” in ti ih, “Si, fala fawh ding kan hmuh silo” ti phah in, umzia nei deuh nawn in a mitah ka zoh.

Thu tam zet kan rel, zan a rei cuah co. Kan khuanu khal hi, thim hmuah ti thin har si, a thim ta ceng maw tiah, a nawt ciamco lala fawn tiih vuivai a olte zikzik. Ka duhmi sut dingin a vei thumnak coffee a om sungah tong dan ding ka hawl rero ih, Tray thawn coffee a run keng man lala fawn. Hmanseh, suupawk ka tum lo, “Morning Girl, ziangah maw.. Ka tlai zo maw?” inti? tiah ka sut lawlaw… a dang a vun thian ngah maw tiah …. a phone a ring ih, “Hello… aw. ..aw OK” a tiih, “Simp … ni dangah ka lo sim ding, sizungah emergency a um, a thi men thei… ka feh cih ding” in tiih… kei khal ziang dang rel ding thei lo in, “Si tuk” ka tiih, kan pahnih cun kan suak tlang. Sawnnak ka dawng hrih fawn lo… lung a va hnok duh hrih lai em!!!

(Visited 38 times, 1 visits today)

Comments

comments

3 Comments

  1. Rak siar tengteng uh.
    Mak tak a si.

  2. aw…………himi narel cun kan mah kansi ko ding kan naupa te kha
    zato ah emergency in kan rak ra ih khakha kan DOCTOR nu
    a tlung zo in ti ih fawn an ko ta kha siko ding tu ih MORNING GIRL
    kha si tengteng na rel dan thawn a ngil aw tuk…..

  3. Mak lawlaw.. part III siar ka hngak hlap tuk zo…

Comments

%d bloggers like this: