Rev. Dr. Ro Hming Lian Leh CT: Part II

Part II

Rev. Dr. Ro Hming Lian Leh CT

Zumtu Nun Leh Ruahsannak

Mai Sokhlei Par le Dr Rev Rohminglian le innsang nu

 

 

  1. Tuarnak (Suffering) hi thu ngailotupawl lawngih ton ding mi maw a si ih, zumtu hmuahhmuah ih ton ding hrimhrim? Tuarnak hi ziangruangah?
  2. Mi pakhat in a zawh ding mi lamzin hi Pathianin a hrangih a tumtah mi a si le si lo ziangtin a theithiam thei ding?
  3. Mipiangthar a si ko nain nun ih lang thei lo (a rah hmuh ding um lo) Kristian kan tam tuk hi ziangruangah a si pei?

Chin Mipi Leh Pathian

  1. Chinmi tampi refugee dinhmun kan thlennak san hi ziangruangah a si pei?
  2. Cangan thiam si dingin ziangtin kan zir thei ding?

Innsang Nun

  1. Nupi pasal kan hrilawk tikah Pathianin kan hrangih in remruatsak mi a si le si lo the ziangvekin kan thei thei ding?
  2. Nupi dam thei lo, a kum telih ihkhun parih ngor ringring, neitu mipa hin a nupi hi a then thiang maw? Asilole, minu dang hnenah a taksa diremnak tuah teh a thiang pei maw?

Calai

  1. Milai hrangah calai hi ziangtlukin a thupi? Ziangruangah ca siar a tul?

Zumtu Nun Leh Ruahsannak

  1. Kan hlapawl hi ‘van ngainak’ le ‘leitlun nun ninnak’ lam a tam tuk deuh maw kan ti! Praise & Worship hla kan tlasam tuk hi ziangruangah a si pei?

RHL: Na thusuh mi hi kan miphun hrangih poimawh bik lakah a tel ban ding! Chinmipawl hi zawng le ngau umnak ram ah kan rak um ih, curuangah leitlun hi nuam kan ti thei ngaingai lo. Miphun dang hnakin vanram kan ngai ce! Ziangruangahtile mai ei ding rawl kha bawmpi thawn hmun suk le hmun so ah phur ih a nungtu miphun kan si ruangah vanram kan ngai ih leitlun nun hi kan ning deuh ce a bang.

Cun, vanram hi thlarau ta lawng a si ti kan fiang loih, kan tisa thawi thleng ding vekin kan ruah ruangah vanram kan ngai ciamco. Vanram hi tisa le thisen thawi luhnak ram a si lo ti hi fiang deuhdeuh sehla cu taksa hrangih nomnak dingah vanram hi kan beisei nawn lo ding. Cun, taksa hrangah leilung hi Pathianih in pek mi a si ih, leilungah harhdam zet le lungawi tak le tlasam loih kan nun hi Pathianih tumtah mi a si. Hihi Chinmi in kan thleng hrih lo!

Leitlun harnak tong lo dingin in rundam a si lo nan, leitlun harnak hnuaiah hin nuam zetih kan um hi Pathianin a duh; kan len khal Pathianin a duh; kan fim khal a duh. Mi bom mi siloih, mi bawmtu kan sinak ding hi Pathianin in duhsakbik mi a si ti thei sehla cun vanram kai ding ruangih lungawi lawng si nawn loin, hi leitlunih nuam zetih nung dingih in rundamnak ahhin kan lung a awi kei, van ngai thu le leitlun nun a har hla lawnglawng phuah nawn loin, tu ahhin Pathian ram (Kingdom of God) kan thleng thlang ti thei in, nitin kan ei le in, kan taksa hrangih Pathian thatzia hi hla ah a tam tik le kan miphun hi leitlunah kan nuam dingih kan thangso ding.

Himi cu na thusuh mi lakah poimawh ka tibik mi a si. Rel ding a tam nasaih, Kristian mipiangthar kan si ahcun leitlunah hin fim ding le lian dingih Pathianih ret mi kan si ti hi kan miphun in kan theih a cu. Kan Baibal ahhin thu pahra um sehla, pahnih hi vanram thu a si ih, pariat hi leitlunih ngah ding mi a si. Curuangah vanram ngai thu lawnglawng hla kan sak ciamco hi leitlun malsawm don lonak hrampi pakhat a si ti hi kan theih a tul zet mi a si.

  1. Zumtupawl hin ‘vanram’ thlen hlanah lei thlawsuah hi beisei ding kan si maw? Pathian hin zovekpawl hi thlawsuah a pe in a cawisawng theu?

RHL:  Na thusuh mi hi a poimawh zet. Kan Baibal ahhin Pathian tihzah (Fear of the Lord) ti mi hi vei 100 lenglo a um ih, Pathian tihzahtu hin vanram an kai ding ti a um loih leitlunah malsawm an dong ding, an tefasin tiang Pathianin a kilkhawi ding ti a si. Vanram kainak cu Jesui thihnak kan rin tikah kumkhaw nunnak kan co ih cucu vanram kainak a si. Pathian thu awih ih Amah tihzah hi vanram kainak a si lo; leitlun malsawm donnak a sisawn.

Curuangah leitlun malsawm beisei hi mai zawnruah le duhham ruang a si lo; Amah Pathian sawnin in tiam mi a si. Joseph in mipapawl ih neh lo mi, Potipher-ih nupi lakah Pathian duhnak a thlun tentoih vanram kainak ah a hman phah lo. Sal a si mi kha Prime Minister a tuanter sawn. Curuangah Pathian tihzah ih a thu awihtu pawl hi vanram kai a tiam loih, leitlun malsawm tinkim ngah a tiam ih, a tiam lawng siloin, cupawl cu an ngah zoih, an ngah reroih, an ngah lai ding ti kha ka rel duh.

  1. Tuarnak (Suffering) hi thu ngailotupawl lawngih ton ding mi maw a si ih, zumtu hmuahhmuah ih ton ding hrimhrim? Tuarnak hi ziangruangah?

RHL: Tuarnak hi thu ngailopawl in an tong dah loih, thu ngai lopawl ih ton mi cu nunsimnak sawn a si. Krifa si ruangih tuarnak hi Pathianin a duhsak mipawl hnenih a pek mi a si ih, martarnak sinsin tla cu Pathianih duhsaknak lo cun ngah a har zet. Tuarnak Pathian thu ruangih dik loih puh ruangih thawng tla le vuak le hremnak a tuar mipawl hi Pathianin a lakin a tuarter loih a lehhnu lamih mipi hruaitu ding le hmantlak si dingih a buatsaih mipawl an si theu. Zumtu hmuahhmuah in Pathian ruangih tuar mi pakhat khat cu neih lo a cang lo! A pumpelhnak a tuah lo hrimhrim. Thil phun khatkhat cu Krih ruangah tuar dingin in ko ih, cucu Pathian duhsaknak ruangah a si.

Ram thim feh le zumlopawl ih hmuhsuamnak tuar lawng hi tuarnak a si cuang lo. Ram engih a um mi le mai inn sungih um men mi hmanin tuarnak hi cu kan tong ding; a tong lo mi cu Pathianih fa ngai an si lo. Cui tuarnak kan ton mi cu Krih ih dung kan thlunnak a si. Krifa hmuahhmuah cu Krih dungthluntu kan si ruangah tuar mi nei lo Krisitan a um kel lo.

Tuarnak ti mi hi phun (3) in rel a theih: Pakhatnak, zumlotu’n zumtu parih an zomtaihnak, martarnak le thawng tlaknak a phunphun a um ih cucu tuarnak kan ti mi lakah hin tuarnak a ‘sit’ deuh ce a bang! Pahnihnak, zumlotupawlin in donak lam siloin zumtu le zumtu karlakih Krih ruangih tuarnak tampi a um ih, zumlotupawl ruangih tuarnak hnakin a ol cuang lo. Taksa martar lo khal sehla martarnak tlukih a har mi Krifa lakah hin Pathianin tuarnak a pe theu. Cumi a pek mipawl cu miphun hruaitu ah le thil pakhat khat tisuaktu dingih Pathianih buatsaihnak a rak si theu. Pathumnak cu, nunsimnak a si. Fate thu awih lo Pathian in a vuaknak a si ih, fa ngai cu Pathianin a vaw theu ih vuak tong lo fa cu sawnfa men an si tin Baibal in in sim. Hi khal hi tuarnak a si ve thotho. Cui nunsimnak cu rimnak diktakah in hruai ih, cui rimnak cu Pathianih duhdawtnak famkim ngahnak a rak si theu. Curuangah tuarnak pakhat tal ngah lo cu Krifa ngaingai an si lo ti hi thil diktak a si.

  1. Mi pakhat in a zawh ding mi lamzin hi Pathianin a hrangih a tumtah mi a si le si lo ziangtin a theithiam thei ding?

RHL: Himi thuhla ah cun Rick Warren ih ngan mi “The Purpose Driven Life” ti mi cabu hi leitlun cabu hminthang a si ih, tui kan tuan lai mi hi Pathianin kan tuah dingih a ruah mi ngaingai a si ahcun hna dang tuan sehla ti mi thinlung a um nawn lo. Keimah ahhin ka fiang nasa; Evangelist ka tuan ih hna dang tuan ka cak dah lo, mi hna khal ka daw dah lo; Pathianih in retnak tak a si ti hi fiangten ka thei.

Curuangah tu ih na tuan lai mi hi na pian san, a lo tuahtu Pathianih tuanter a lo tum mi a si le si lo cu tui na hna tuan lai mi kha Pathian thangthat theinakah maw na hman, Pathian thangthat theilonakah maw na hman ti mi kha a finfiahnak tha bik a si. Ziang hna khal tuan sehla cui hnatuannak ah cun Pathian ka thangthat thei ti mi hi a thupi bik. Ka hna kha Pathian thawn pawlawknak ah ka hmang thei maw, maw in dawnkhamtu ha ti kha a finfiahnak ding cu a si’n ka thei.

  1. Mipiangthar a si ko nain nun ih lang thei lo (a rah hmuh ding um lo) Kristian kan tam tuk hi ziangruangah a si pei?

RHL: Himi cu fiangteih lo sang dingin ka theihnak a mal tuk ruangah na duh vekin ka lo sang thei lo men thei. Ka hmuh mi hrekkhat cu kan Chinmipawl hi pianthar kan duhnak cu thih tikih vanram kainak dingah a si ih, evangelist le saya thatha in fiang tukin an sim. An theifiangih a ngah khal kan ngah ko. Kan ngah mi cu thih tikih kumkhaw nunnak nei dingih hnangamnak a si bik. An nunih a lang lo khalle vanram kai ding cu an fiang tukih curuangah nunih lang lo kan ti mi kan tamnak a si ding tin ka zum.

Pahnihnakah, Pathian thu theifiang, nun thleng lo, piangthar a ti-aw mi hi kan tam ding ka zum. Theithiam, theifiang hi piangtharah kan ruataw theu ih, sungmurial thlakthleng lo a si ruangah nunih lang lo ti mi hi a tam si’n ka thei.

Pathumnak, in zirhtu saya le evangelist pawlin tuahnak tel lo, Pathian zangfahnak lawng kan uar tukih tuahnak ziang khal nei loih zangfahnak ring maitu kan tam. Khatlamah, minung lam tuahnak uar ciamcoih lenglam thianhlimnak hi Thlarau nun vekih zirhtu saya kan tam lala. Hmuh thei mi thianhlimnak uar ciamco hi zumtu nun a si cuang lo. Thlarau nun tel lo, lenglam thianhlimnak hi zumlotu lakah an tampi. Curuangah nunih lang lo ti mi hi a tumtah ngaingai cu Krih neitu hi an nunah lang lo a um thei lo. A nungcang mawi ruangah Krih a lang kha a si cuang loih, ziangtiklai khalih Pathian thawi thenawk duh lopawl hnenah Krih a lang theu. Hmuh lo tla a theih lo. Biakinn sung hnakin, biakinn loah Krih neitupawlih nun hi tlang par khua bangin thuh theih loin a um. Cucu ziangruangah a lang kan ti le, an thlarau lawng si lo’n, an taksa thlik le ruh tiangin Pathian a ngai ruangah a si. Cupawl cu tlang par khua vekin an nunah a lang theu.

A tlangpithuin kan sim asile, an Pathian thangthatnak ah a lang theu. Cucu biakinn tengtengah a si cuang lo; khuitawk hmun le ziangvek dinhmunih an um khalah an nun hin Pathian an thangthat ringring thei.

Chin Mipi Leh Pathian

  1. Kan Chinram hi ziangtin Pathianih cawisantlak a si thei ding?

RHL: Pathian thu ruangih doawk ciamco kan ban/colhsan a tul. Kawhhran dangdangah kan um ih, kan fehdan cio ah Pathian hnenah lungawinak kan nei cio a bang. Mai hnen lawngih Krih hmu loih, a rualpi hnenih Krih khal kan hmuh thiam a tul. Taksa roriih Pathian thu awih le Pathian tihzahtu kan tamsawn tikah kan Chinram cu Chinram lawngah siloin leitlun pumpi ah cawisan deuhdeuh kan si ding. Tong dangdang kan neih mi hi doawknak ih kan hman loih tong dangdang uarpinak kan neih thei tikah kan miphun hi miphun ropi takah Pathianin in ret leh ding.

  1. Chinmi tampi refugee dinhmun kan thlennak san hi ziangruangah a si pei?

RHL: A naibikah cun kan ram acozah that lo ruangah a si bik dingih, kan ram acozah cu ziangruangah a tha lo kan tisal vivo asile Pathianin a that lo a sian ruangah a si. Ziangruangah a siang kan ti vivo hrih asile, a sungih hnam pumpulukih Kristian a si mi Chinmipawl cawisannak dingah a si. Izip siangpahrang Faraw-ih thinlung haktertu kha Pathian a si ih, Faraw-ih thinlung hak ruangah Israelmipawl hmun tha le ram tha an co phah bangin, kanni Faraw ve cu Kawlram roreltu khi an si ih anni thinlung that lo ruangah kan Chnmipawlin leitlun ram cangkang le ram ropi kan thlen phah. Hihi Pathianih program pakhat a si.

Canada ram ka feh ih kan Chinmipawl hnenih ka sim theu mi cu Izip ram ihsin Israel-pawl Kanan ram an thlen hnakin Chinram ihsi America ram kan ram dingih Pathianin a rak tuah hi a sangsawn daih ka ti theu. Izip ihsin Kanan ram cu peng 200-300 lawngte a si ih, Chinram ihsin America ram cu peng siar cawk lo a si. Israel-mipawl hnakin kan sangsawn ka ti theu. Curuangah refugee ih ram dang kan thleng hi kan Chinram Pathianin sunloih a tum ruangah a sisawn. Chinramih umpawl in Chinram an timawi thei nawn loih, a suahsantupawl in Chinram an cawimawi thok rero a si hi!

Innsang Nun

  1. Nupi pasal kan hrilawk tikah Pathianin kan hrangih in remruatsak mi a si le si lo the ziangvekin kan thei thei ding?

Dr. Rev. Rohminglian le innsang

RHL: Himi thuhla ah cun mipiangthar le piangthar lo tla kan bangaw loih, nunau le mipa si hnuhnu cun a zo khal neiaw sehla neiaw thei dingih Pathian tuah mi kan si. Pathian remruah thluh an si ko____ piangthar lo hrangah cun.

Piangthar ngaingai nupi pasal ding khal Pathian hnenih thungaithlakih dil theutu an si ahcun Pathianih pek mi cu theih lo thei a si lo! Kan duh mi umtudan le kanmai thinlungah fiangtein a si tingamnak a um theu. Pathianih remruah mi hi rem lo zet a bang duh nasa! A remlonak tampi, neiaw ding tei pahnih karlakah siloin mi dangdang hnenin a um thei thotho. Hmansehla Pathianih remruah cu el sin sehla a fiang duh bik! Tum ttengtteng hnakin tum lo vekin um sehla cunah fiangten a lang theu!

  1. Mipa in a nupi, minu in a pasal, hi ziangtin a hlimter thei ding?

RHL: Minu-ih duhbik mi cu duhdawt le duat hi an lawmbik mi a si. Duat zetih kilkhawi hi minu-ih hlimnak bik a si. Minu hin mipa hnakin farahnak le harsatnak an tuar theisawn ih, an tuar thei lo bik cu ‘thikthusiatnak’ ding hi an tuar thei lo. An thikthu a siat hnuhnu cu an thinlung a kuai ih an duh zet khal kha a kumkhua’n an hua lanta thei. Curuangah minu cu a thikthu si lo dingin a pasal rinum sehla, a duhdawtnak thu hi tongkam in sim tam sehla, a duatnak cu a tuah ih tuahnak in langter sehla, cutikah minu cun leitlunih an vanram nitin ten an ngah thei.

Mipa cu a lungawinak ding hi a nupi ah Pathianin a ret tlat ih, a nupi lungawinak kha mipa lungawinak dingah Pathianin a tuah mi a si. Kan Baibul in minu in a nulepa fehsan in a pasal a kom ding tin a ti loih, mipa in a nulepa tan in a nupi a kom ding a rak tinak hi mipa hi amahte um menah lungawinak Pathianin a pe loih a lungawinak ding hi minu ah a ret ruangah a si. Minu lungawinak hi mipa hrangah a rak si. Cucu thei sehla a nupi a tilungawi tam le amah ah lungawinak a suak tam dingih a nupi a hlimpi deuhdeuh ding.

  1. Nupi dam thei lo, a kum telih ihkhun parih ngor ringring, neitu mipa hin a nupi hi a then thiang maw? Asilole, minu dang hnenah a taksa diremnak tuah teh a thiang pei maw?

RHL: Na thusuh mi hi Baibul hmang cun fiangtein lo san a har zet. Thenaw lo dingin Baibul khalin a rel ih, thu tla kan tiamaw. Nupi dam thei lo, zanlam thil ih hmantlak lo, a pasal le harhdam zet fawn, hin a nupi then mai a thiang maw ti a si ih, nupi dam lo ruangih nupi then hi an cang fuh lem dah lo a bang! A nupi rinum zetin a tuamhlawmih a thih tiang thaten a zohkhentu pasal cu amah in malsawm tampi a donnak a si theu. A tisa hiarhalnak midang parih hrikthlak thuhla ah cun an nui’ remtinak si sehla a rem deuh ding a bang! Mipa cu minu tel lo khalin diriam takin an hrikthla-aw thei thotho. Cumi hmang sehla a tha deuh kei cu maw!

  1. `Fate hnenih pai’ tuanvo siseh, nui’ tuanvo siseh, fate fingkhawdan ding tla in hlawm aw.

RHL: Himi thuhla cu a zirh ih zirh le kaa ih sim cu a ol zetih, practical ah cun a tha kan ti mi hi a rak tha thluh lemlo mi tla a um a bang. Europe lam cun nauhak hi funghreu in an vaw nawn loih, Asia ram cun kan vaw lai. Europe ah maw mipitling tamdeuh Asia ah vun ti sehla thlanghlam ram cu an sangdeuh sawn a bang. Fatepawl hin kan duhdawt ti an rak thei lo theu. Nulepa cun kan duhdawtzia kan sim nan kan fate in ka pa in in duhdawt tuk ti hi an thei lo thei tlat a si. Cu te cu kan tlaksamnak zawn cu a si. Thil dang cu thil tha tampi kan thei ih, kan rel rero. Kan fate in an kum 15 le kum 20 karlakah in ngaina thei maw? Hihi nulepa in tahawknak ih kan hman ding mi a si.

Kei, fapa pahnih le fanu pakhat ka nei ih, ka fapa cu kum 22 le 25 an si ve zoih tlawng kai ruangah ka hnenah an um nawn lo. Kan tonawk tikah tlangval a si zo mi hi ka kawngpi parah to hmaisa loin tu tiang an um hrih lo. Picnic le khuimaw va feh dingah hin ka tel lo hnakin ka tel hi an duhsawn theu. Himi hi Chinmi in kan poimawhbik mi thil pakhat a si. An nauhak laiah cun nulepa loin an um thei loih, fala tlangval an rung si tikah in ngaina nawn lo; kan tellonak lawnglawngah lungawinak an hawl a si ahcun kan rak peaw nawn lo tinak a si.

Curuangah na fate in na duhdawt ti mi hi a thei maw? Kaa ih na sim lo khalin na duhdawtzia an thei maw ti hi kan tahfung ding cu si ringring sehla.

Curuangah na fate in na duhdawt ti mi hi a thei maw? Kaa ih na sim lo khalin na duhdawtzia an thei maw ti hi kan tahfung ding cu si ringring sehla.

Calai

  1. Cabu tampi na rak ngan zoih, bu ziat ciah na rak ngan zo? Tu ah teh na ngan lai maw?

Mai Sokhlei Par Ih Interview Lai

RHL: Daniel le Thuphuan simfiangnak hi ka cabu netabik a si ih, hihi bu 88 ka ngannak ciah a si’n ka thei. Ngan lai mi ka nei ih, ‘Baibul Doctrine 100’ ti mi cabu a si. Hihi cu kum 60 ka kim hlanah theh ka tum ding. A dang cu tumtah mi cu tampi ka nei ve lai.

  1. Milai hrangah calai hi ziangtlukin a thupi? Ziangruangah ca siar a tul?

RHL: Ramsapawl hi zirh tul loih an thiam ding mi thiam thei dingin Pathianin rem a rak ruat. Minung cu zirnak tel lo cun zianghman thiam bet mi a nei thei lo.  Curuangah calai a poimawhnak cu minung hi minung a si theinak cu calai lawngin a si ruangah a si. Calai tel lo cun minung hi ramsa pakhat tluk lawng a si.  Cuvekin ca siar lo mi cu a thluak kha kholh nawn lo a si ih, kan lenglam taksa ti kan kholh vekin kan thluak hi calai ih kholhfai ih a thar thun ringring a tul. Hmai bal kan ngainep bangin kum 20 lai a thu theih mi bak thei nawn lo, kha lawnglawng rel ringring minung cu an hmantlak nawn lo. Mirangpawl cu an tar le an fim deuhdeuh ih, Chinmi cu kan tar le tar-at kan nei ciamco. Hihi ziangruangahtiasile ca kan siar lo ruangah a si. Ca siar ringring mi cu tar-at an nei loih, an tar le an fim deuhdeuh.

  1. Cangan thiam si dingin ziangtin kan zir thei ding?

RHL: Na thil theih mi kaa ih sim loin ca in mi theih thei dingin sim a tul ih, kaa ih na sim le na sim lai lawngah a si dingih, ca ih na ngan le leitlun a hmun sung a daih ding ti thei awla. Cutikah cun cangan poimawhzia na thei dingih cangan thiam leitlunah hin zohman an um lo, an theih mi le an hmuh mi kha mi theih dingin ngansuah tul an ti tuk ruangah an ngan ih, hmuh lo mi tiang ca ih an ngan ruangih mi’n an rak hmuh thei tikah cangan thiam ah an suak a si men. Curuangah ngan mi ca a um loah cun leitlun hi a thim ih, nangmah khal cangan pakhat hman na neih lo ahcun na khawvel kha a thim in na hmang a si ti kha thei awla ca ngan aw. Thiam tum loin ngan awla, na ngan mi kha mi’n an rak theihthiam ahcun cangan thiam na si mai.

Cabu tuah ding cun thupi thendan thiam a tul. Thupi na then thiam le ngan ding tampi a ra suak kei, na thawtnak pakhat lawng na ngan ciamco le na tum mi na rel hlanah ngan ding thei lo’n na um ding. Tahan ti hi ngan zik awla, Tahan hmin khuiin a rak suak ti mi kha na ngan hmaisat a tul kei, ziangtik kumah an rak din, zopawl an si ih khui ihsi ra an si na vun ti bet kei, cuvial hmanah tampi na ngan a tul thlang ding. Thupi na then thiam le cangan thiam ah na suak ding.

Cangan ahhin mi cabu hmang loih cangan a theih lo. Mi cabu hmang naih hmang lo vekih um hi khawvel danah cun fifir tumbik a si, ti a si ih, curuangah cangan dingin siar tam a tul ti kha thei fawn sehla. Na thih hnuah leitlun hrangah thu pakhat tal ret tumnak nei awla, cangantu ah na rak suak mai ding.

  1. Leitlun hel ih Thuthangtha phuangtu na si ih, kan ram le ram dang zumtu pawl dinhmun na khaikhindan le kan zir dingih na duhsak mipawl tla theih kan duh zet.

RHL: England, America, Australia tvp hi Kristianpawl in kan rinsan ram an si ih, Kristiannakih an tlakniamzia ka ruah ahcun ram dangah zohthim ding tlak a um loih zohthim lo dingih ka duh mi a tamsawn! Ram dang tidanih zohthim ka duh lo mi cu pastor thuneihnak kawhhranih hman hi a si. Zirnak a nei mi lawng pulpit par kaiter hi ram dangih uar mi a si ih, cucu kawhhran siatnak a si. Ram dang kawhhran a tlakniam ih Biakinn tumpi pi khawmtu um lo’n a lawng thluhnak le Biakinn an zuar reronak san cu pastorpawl le thuneitupawl in bawi tukin kawhhran an hruai ih, theology degree a nei lotupawl hnenih Pathian phuanawknak an ngainep ih cuisi cun an kawhhran kha niamlam a pan ti fiangten ka hmu. Pathian thangthatnakah Pentecostal lam deuh uarpawl an thangso ih, cumi uarlopawl in niamlam an pan.

Khakha zohthim dingih ka duh lopawl ka sim hmaisa ih, zohthim ding tha cu vanram lawng focus ih zumtu an si ve lo. Leitlun khawvelah hin Pathian hmel an hmu tam. Chinmi cun vanah, thlarau lam thil lawngah Pathian kan hmu ih, annih cun leitlun thilah Pathian an hmu. Thlarau hrangah vanram, taksa hrangah leilung, Pathianin a pekdan hi an thei tlat. Mai unau duhdawt an thiam. Minung zumtui hmelah Pathian an hmu theu. Himi hi nitlaknak lam Krisitan a thapawl ka uarnak cu a si. Minung taksa le mithmaiah Krih hmuh an tum tlat; hmuh khal an hmu theu. Kannih Chinmi cu rualpi hnenah Krih kan hmu thei lo. Rualpi tlinlonak lawng kan hmu theu. Thlaraumi cun zuripai’ hnen khalah Krih hmuh theinak an nei theu. Himi hi kan zir a tul zet.

Mirang ram hi kannih hnakin an niamnak a tam tukih kannih Asia ih um mi Krisitian hi Mirang ram hnak cun kan caksawn a bang. Anmah hnenih ka hmuh mi thil tha cu rualpi hnenah Krih an hmu tam. Himi te hi Chinmi in kan zirve dingih ka duh mi cu a si.

  1. Ziangtin kan lo contact thei ding?

RHL:         Mercy Home, Tahan Bazaar.

Phone: 073-22002;

Email: jedidya22hminga@yahoo.com.

  1. Can tampi in peknak parah le thu thatha in hlawmnak parah CT a lungawi tuk.

RHL: Kei tla hlawmawknak can tha ka ngah ruangah ka lungawi tuk.

(Visited 177 times, 1 visits today)

Comments

comments

3 Comments

  1. Salai Demure says:

    Tha tak a si. Siar rero a tlak a si. Thin a dam duh nasa.

  2. A ropi thei hle mei! Kan rel vek cekci tehin kan nunpi ke maw? Mai nunpi thei loh tehhi kan sim thei ke maw? Kristian dik tak le mi piangthar dik tak kan si cun, LUNGRUALNAK, REMNAK le IN PUMKHAT nak hi kan nunpi a tulin ka thei. Kan ram, Malaysia le USA ih kan Pastor le Evengelist hrekkhat pawl hi Kohhran rem aw cia le Hlawmtah cia khal an Tikuai/Then aw tir cing cing hi an PIANGTHAR that tuk ruang asi thei ke maw? Kan Pastor le Evangelist hrekkhat Piangthar dan hi, an sansungah Kohhran/Pawl pakhat khat ti Tikuai/Then aw tirih (Kohhran or Pawl) pakhat tal an Din loh cun Vanram kai theilo dingah an ruat aw si berin ka thei ta….Mangbang za cu a si! SINAK, THUNEIHNAK le TANGKA kan duh ruangmen asi thei ke maw? TANGKA a tam/um lohnak ah cun RAWNG KAN BAWL tha duh lemlo a bang. Mahin Nunpi cuang silo in, mi nunpi dingah Bible in Tangka kan hawl asi ber thlang hi!!! A lutlam lawng silo in, a suaklam(Tangka) KAWL lakih kan RAWNGBAWL khal a cu tuk zo!!! KOHHRAN/PAWL VA TIKUAI/THEN AW HLAH!

  3. Zodai Zilthli says:

    Ka hrang ahcun hi hmaitonak cu a va tha lawmmam em! Vei 2/3 tal cu ka siar suaksal ding.

Comments

%d bloggers like this: