FALAM KHUA

Falam Khua

Lungbawk Brother

Falam khawpi na thleng dah maw?

Tusan Falam mi Falam khawpi thleng dah lo nan tam ding ka zum. Falam mi na si ahcu voikhat tal thleng tengteng tum hram aw. Mikhual pawl nih ziang ruangah FALAM!!! FALAM!!! an rak ti, timi na mit rori’n hmu tum ve dingin ka lo forh duh. Na thleng dah lo ahcu va tlawng tengteng leh aw. Na sir aw lo ding.

Falam Khawsung Van Kau Tlang Ihsin, Zuktu : Alfred Paro

Kawlrawn lam ihsin na so si le, Falam lut hlanah Vaar kan timi Ruun tiva na thleng hmaisa ding. Cutawkah, Laitlang ih lilawn turu tak an don mi na hmu ding. Vaar cu Falam khawpi electric pek tu khua a siih, a hlum dan cu kawlrawn vek thotho. Kawlram ih a um mi thingkung le thingrah pawl khal an nei kim theh. Curuangah Falam pawl cu Kawlrawn suk rero tul loin Laitlang ih um lomi ‘Kawlrawn rah’ ei ding kan nei ve ringring.

Vaar in na so bet dingih, rul vek ih a ngerhaw mi lamziinpi na zawh vivo ding, cule Falam khawsung lutnak ah Salai Sun Ceu khaan a si dingih, cawlhnak le zukawknak tha zet a si.

Falam na thleng si le, Salai Tuan Ling Thang hla sung ta Van Kau tlangih Sizung pi, Canmary vengih Tlawng inn pi, Nurse tlawngkainak NTS, Chinram Bible tlawng hminthang Zomi Theological College (ZTC), Ciinmual thiamtah zirnak, Ciinmual paan-chyan, Canmary vengih Lungkuai tlang ti pawl zoh ding an um. Cuhleiah, Falam thawn peng 7 hrawng a hlatnak ah Lailun lungkua a umih, a kiang naite thotho ah Zawngto tlang a um. Cupawl cu Falam ih zohtlak deuh hmin nei pawl an si.

A minung

Falam a hminthang nak hi a Khua le Ram hnak hmanin a minung pawl ruangah ti a si theu. Chinram sungih hnam tinkim pawl hleiah, Kawl, Kala, Nepali, Taluk miphun pawl tiangin umnak khua a rak siih biaknak phunphun thawn, ‘melting pot’ taktak an rak si.

Cuhleiah, Falam khua tohtu lakah Mirang pawl an tel a si kan ti thei. Mirang pawlin Chin ram khawpibik dingah rak hril ta lo sehla, tuvekin Falam a si lo ding. Falam khua a rak um pek ah, miphun dang a si mi: Mirang, Kala le Taluk siseh, Kawl pawl tiangin zunghnatuan, hnatuan bawmtu le sumpai hawl in an rak um. Tuih Falam peng sungsuak pawl tla cu mi malte lawng an rak sisawn.

A hlan ihsin innteek a rak si tu hnamdang miphun dang pawl le an sungkhat unau pawl cu tuni tiang laihlum tampi an um lai. Cuhleiah, an tefa pawl le sungkhat unau pawl cu an thlengnak kipah Falammi rori an si vivo. Himi an theifiang ruangah, Falam khuasung ih a um dah tu le a theifiang tu taktak pawl nih cu Falammi pawlih an hnamhmin le an miphun sinak an buaipi ve lo. Ziangah tile, Falam cu hnam tintian cawkrawinak le miphun tinkim um khawmnak khawpi a si timi an theifiang. Curuangah, Falammi kan ti theu tikah a hnam le miphun zawngih sim rero ding a si lemlo. Falam peng sungsuak pawl cu Khua kan nei ih, an nih pawl riangri hi Falam lo bak khuihman khuadang an nei ve lo, tla an um.

Capoh pakhat an sim theu mi cu: Parsat (Kala) le Myint Oo (Thet Mon Myint pa) Monyua ah an tongawk. Falam an thlengsal tikah Myint Oo nih, “Tuit’um Kawl ka suk cu Laimi an um lo nasa, keimah le Parsat lawng kan si,” a ti, an ti. Cuti vekih inn tek thinlung a nei rero tu pawl hi hnawl rero ding kan si loih, midang pi vek in zoh ding khal kan si lo.

Anetabik ah Falam mi kan lungrual ding duh ahcu, Falam timi hmin sungah ziangmi khua pawl a um, ziang phun le hnam pawl kan telih, zo pawlin inntek kan tuan timi theifiang hmaisa a tul. Cuhnu ah theithiam awknak a ra dingih lungrualnak in a peh vivo ding.

Mitampi nih Chin Ram a thatnak ding hrangah hna kan tuan ciamco. Taktak te’n sim ahcu, kan Ram a that hlanah, kanmah minung pawl kan tha hmaisa a tul.

(Visited 289 times, 1 visits today)

Comments

comments

3 Comments

  1. Thaten siar uhla a netabik tluan kha kan zate hrang chorus si hram seh.

    Falam khua a rop nan timi tuah that rero a si. Falam thotho ah Chin state sungih karbat tuah a si.

    Falam cu a rop thei dah ding maw?

  2. Ca nganmi cu a ‘tha ka ti nasa, ka lungkim ngah ko, kan Falam hi hitivek ih ‘thangso zo kan si ih ‘thangso lai, cun ‘thangso vivo lai ding khal kan si, lungtak ih Chin rampi duhnak thawn

  3. ka ngai ka ngai kan senkeh ih ka suah nak Falam …..
    tu fang te ah na tang hlum te ah leh na thli thiang te
    hop in ka zau duh………
    ka lung a leng ro ri si…zuk leh ca nan tar mi ka hmu ih
    ka thin lung cu Falam kan inn ah a tleng rori ta……….
    lung awi um tuk ,Falam in ka rak suak ih rei lo te kum
    2 lai hnu ah hi rual leh bawl nih kan Falam cu a siat ngah
    zo e,Mi no ti ding ih kom ding tla an um nawn lo ….Falam
    Laan Sung tla cu sun rori si nan Mu Thla nih thih khop ding
    khop in a thing in ti ih….ka mit thlam te ah kan Falam te ka suai
    nan ka thin nuam lo nasa….nan tu ah cu Thang so nak lam kan
    pan thlang ti thu hla ka thei leng ah hih nan ca ka sar ngah cu ka
    thin nuam tuk ..ka hna ngam law2 si….kan za ten kan zuam sin2 ding uh
    Kan Falam pi thang so sin2 hram seh……

Comments

%d bloggers like this: