Nu, Mi Sunglawi

NU, MI SUNGLAWI

 

 

 

 

 

 

 

 

 

 

Nunnak thapin i rak hringtu
I cawi liantu sunghno ka nu,
Na thi-tha seng in kei i cawm;
Zattial na kut in kei i pom;
Na ttang nuamte ah kei ka him;
Na duhsaknak ah lung a kim;
I rak awihnak zaihla tla khi,
Ka hrang zaihla mawibik a si.

Nun in simtu na aw zaidam,
Khui hmunh thlen cang khalah ka hlam.
Duh-duat zet ih i pawkcawinak,
Ka nat caan ih na retheihnak,
Ka hungdam ih na lungawinak,
Ka hringnun hrang khua na khannak
Ka hrang catlo’n thla na camnak,
Fahniang hrangih na parmawinak,
Sungkaw hrangih na tuahttuannak,
Ka hlawhtlin ih i lompinak,
Ka hlawhsamh lai i ttawmpinak,
Man khung hlei ee, fahniang ka hrang.
Tluktu a um lo, ni bang ( a ) tlang.

Cemthei lomi na lainatnak,
Ngah sal ruahsanh lo pekawknak,
Zatei’ neitu duhbik ka nu;
Duhnung hleice na sul le hnu,
Fahniang hrangah na hminmawi cu
‘Vawlei Pathian’ hmin pek a phu.

Na hnawithlum ti forkhat hmanh khi,
Hlawn thilri thawi lei thei lomi,
Cemtheilomi nunnak cirhti,
Nunnak hnemtu vancung zilthli,
Hluanih sunglawi mankhung a si.
Cun…sam cawk lo ding leiba a si.

Kianghrol

(Visited 50 times, 1 visits today)

Comments

comments

6 Comments

  1. Zang Tai Lian says:

    Biazai sayapa na thiam.

  2. Phianghang duh says:

    Ka rual na thiam.

  3. Na huat lo nute says:

    Ka u na thiam … ka rak siar.

  4. Maikhuaitizu says:

    Salai kianghrol, na biazai siar a man hla nasa. Na thiam tuk.

  5. Na nganthiam riai.

    Mother’s Day le a nai zo fawn.
    Ngan theu aw.

  6. Jesse Penn-Lewis (JC Kip Ling) says:

    Mhingte, na tittha z. Ka duh hliahhliah. Kei ka ngan tum ve nan, a pum-uh daih. hehe

    Nang cingcing na ngan ngah … a ttha fawn. Ka siar lo, ka tuar.

Comments

%d bloggers like this: