Biazai Pathum : Hausum Fanu

Ninu leh Vanruah

Pangpar kan tuh mi khi hei zoh hnik hman!
Vuai siapsi ten leiah a tlu khi na hei hmu maw?
A kilkhawi tu nang leh kei in
Partha suah dingih kan tiamawk mi
A ziam men ding maw a uai mi parbang
Kan thei cia ko, hi parmawi cun
Ninu eng leh vanruah a tul ti in
Parmawi hrangah kei Ninu si in
Nang vanruah si hram kan rak ti kha!
Ruahti a tul caanah kuilam na rak pial?
A lo ko rero nan maw
Hnaset tun men in thei lo bang na hoi san!
Ninu a tap khi na hei hmu maw?
A uaimi par ruangah a lungkuai khi maw
A theihhmuah suah in a kilkhawi nan
Parmawi hrangah a ennak lawng a tul tawk ual lo
Vanruah te aww ka lo hlam ruahro
Rasur hrih aw kan ruuninn ah
Ninu in a lo tah”ka lo tul” ti in
Ra tlungsal aw
Kei leh parmawi hrangah ti in!
__________________xxxxxxxxx___________________

Ka Lo Duh Kumkhua

Duhdawtnak cu ka hnenah na runkeng
Dawtnak lungthin cu ka sungah in pek
A thawtnak cun ka lung in hnem theu sun leh zan in
A nuam ka ti nang thawi caan hman
Ka lo duhnak cu ka simfiang thei lawn
Boruaklak ah hmuh theih rual lawn
A hmun camcin na hrangah ti in!
Ra aw na tinak ah kei ra in
Feh aw na tinakah ka feh theu
Duhdawtnak huham cun ka lung i aa ter
Na lungawi cun ka rak hlim theu
Na riahsiat ka hmuh cun lungsia in ka ngui ve
Na lungawi theinak kei si theisehla ka va duh em
Na caan mawi ter tu kei si sehla ka va duh em
Na hmin mawi te cu ka thinlung sungah ka ngan
Na duhnunnak cu ka theihnak ramah ka ret
Ka dawt mi val nang cu ka lungsungah ka lo khum
Tik cu leh caan cu an dang leh sal ding
Boruak leh mero khal an hmun lo ding
Ka kham theih lawn caan duhnungkhal an ral lai ding
Si nan maw,
Ka lo duhnak thinlung te cu
Ka thawthawt sungah ka lungthinah
Anhmun kumkhua ding Ka lo duh kumkhua ding sii!!
—————————-xxxxxxxxxxxxxx—————————–

Na Kiangah Ka um

Dawtte ziangah na tap?
Na lungsiatnak i tawm ve aw
Ka lo hnem ding ka lo tuar pi ding
Na kiangah ka um tap nawn hlah maw
Dawtte ziangah na thinhar?
Na beidonnak i ruah ve aw
Ka lo sim ding a tuar thiam daan
Na kiangah ka um thinhar hlah maw
Dawtte ziangah na riahsia?
Na tuarnak pawl i hlawm ve aw
Ka lo hmuh ding tuar nomnak lamzin
Na kiangah ka um riahsia hlah maw
Minung nunnak cu lungawinak hlir in a hruai lo
A caanah kan tap,a caanah kan hni
Siam tu’i duhdaan a rak si kha
Ziangkhal thlengseh na kiangah ka um ding
I sim aw ka kut i kaihnget ding ti in
Harnak buainak in duhdawtnak cu ti danglam hlah seh
Siam tu’i hnenah kan diltlang ding
Tuar theinak in pe ding in kan ngen tlang ding
Na kiangah ka um, na hrangah ka um ring ring ding!!!
————————–xxxxxxxxxxxx———————–
By: Hausum Fanu

Comments

comments

5 Comments

  1. Na nau na ngan thiam thei tuk…ka rak siar rero so khaw.

  2. Na ngan thiam thei lawlaw.

  3. crazylove Mawite says:

    Ka NAu na thiam thei tuk aw…
    ka siar nasa…an tha tuk hai…
    zuam sin2 aw maw..:)

  4. Siangte Senhri says:

    Siar a va nuam em! Na thiam ,..,ka hrangah in ngan sak…ka lungawi

  5. Dear Hausum fanu,

    Biazai ngan hi na thiam hrimhrim ti zo hmanin in el thei lo ding ka zum.
    Biazai hi lungkuai lam a tel tam theu ih lungkuai lawng in biazai an nganthiam ce abang ka ti hee…. asi ngaingai ah cun kei khal kuai zahra in a kuai zo mi ka lungthin thuanthu hi ka rawn lo sim ding ih in rak ngansak hram aw maw……..
    Salai Zilthli

Comments

%d bloggers like this: